Póndźelu rozsudźi wokrjesny sejmik wo nošerstwje tamnišeje wyšeje šule
Budyšin (SN/at). Budyski wokrjes chce nošerstwo Malešanskeje wyšeje šule přewzać. Wotpowědny namjet zarjadnistwa předleži radźićelam za posedźenje wokrjesneho sejmika přichodnu póndźelu. Malešanski wjesnjanosta Matthias Seidel (CDU) je optimistiski, zo hodźi so zaměr, wo kotryž bě hromadźe ze swojimi gmejnskimi radźićelemi wojował, nětko skónčnje docpěć.
Malešanska gmejna je so nimale pjeć lět wo přenjesenje nošerstwa prócowała, dokelž njedowola wobstejace šulske twarjenje standardne wuhotowanje za dwučarowosć. Alternatiwne stejnišćo je zakładna šula w Barće. Twarskeje substancy dla dyrbja ju nuznje saněrować, ale stejnišćo ma so zachować. Do zakładneje šule inwestować pak nimaja za prawy puć. Tuž zrodźichu projekt, Bartsku šulu jako wyšu šulu z najmodernišimi wučbnymi wuměnjenjemi wuhotować. Za to trjebaja wokrjes, dokelž gmejnski etat tajke předewzaća njedowola.
