Bukecy (MK/SN). Po lětdźesatkach přestawki chcedźa w Bukecach lětsa zaso meju stajeć a mjetać. Bukečanska Bjesada a Kulturu spěchowace towarstwo přihotujetej nałožk zhromadnje z dalšimi partnerami ze wsy. Tak chcedźa organizatorojo serbsku tradiciju w Bukecach wožiwić a do kulturneho žiwjenja wsy zapřijeć. Planowane je, zo 30. apryla wot 15 do 17 hodź. na wulkim parkowanišću při zwjazkowej dróze B 6 meju staja.
11. meje w 15 hodź. započnje so mejemjetanje. Za to přihotuja organizatorojo tež mały program, mjez druhim z Bukečanskej drastowej skupinu. Program wobrubja dujerjo wosady, kotřiž za to hižo pilnje serbske ludowe spěwy zwučuja. Přizamknje so pisany swójbny program, mjez druhim z poskitkom za dźěći, we „Wjesnej hospodźe“ při B 6 hač do něhdźe 21 hodź. Wo hudźbne wobrubjenje postara so serbska skupina Logarhythmus. Na tutej wjerškaj kulturneho žiwjenja w Bukecach tamniša Bjesada a Kulturu spěchowace towarstwo wšitkich zajimcow wutrobnje přeprošujetej.
Kamjenc. 13. raz přeprošuja w Kamjencu na nóc cyrkwjow a muzejow, kotraž wotměje so jutře, sobotu, wot 18 do 24 hodź. Na wopytowarjow čaka 45 programowych dypkow na 15 městnosćach. W Lessingowym muzeju poskićuja klankodźiwadło, čitanja a hudźbu. W klóšterskej cyrkwi swj. Hany móža sej zajimcy pišćele wobhladać. W měšćanskim archiwje namakaja wopytowarjo schowane kućiki. Cyłkowny rogram je zestajeny w zešiwku, kiž je na mnohich městnach wupołoženy.
Na literariske čitanje
Drježdźany. W Drježdźanskej centralnej bibliotece čita jutře, sobotu, w 11 hodź. Jěwa-Marja Čornakec ze swojeje knihi „Kak su wroblik Frido a jeho přećeljo jutry zaječki překwapili“. Literariske čitanje je za małych runje tak kaž za wulkich wopytowarjow myslene.
Oldtimery hladać a skakać
Ralbicy (JK/SN). Wjele prašenjow dyrbješe zamołwity twarski nawoda Rainer Dittmer z Kamjenca při nowotwarje Ralbičanskeje pěstowarnje wčera na wodźenju po twarnišću wotmołwić. Hromadźe z gmejnskimi radźićelemi wobhonichu so zastupjerjo pěstowarnje a Serbskeho šulskeho towarstwa jako nošerja wo stawje twarskich dźěłow na tuchwilu najwjetšim twarnišću w zarjadniskim zwjazku Při Klóšterskej wodźe. Štož so wobdźělnikam wodźenja skićeše, přesahowaše mnohe předstawy a wubudźi zdźěla zahorite připóznaće. Kaž twarski fachowc praji, rjemjeslniske dźěła kaž planowane postupuja. Wulki dźěl elektriskeje a sanitarneje instalacije je zakónčeny, nětko dominuje suchotwar. Wot přichodneje póndźele lija estrich na hornim poschodźe. Wšo pokazuje na to, zo budźe pěstowarnja k planowanemu terminej hotowa. Gmejnska rada ma jenož hišće nadawk, so za pomjenowanje a napis rozsudźić. K tomu chcedźa skupinu zastupjerjow gmejny a wobydlerjow wutworić a móžne namjety konkretizować.
Slepo (AK/SN). Projekt Romus chcedźa Slepjanska gmejna a jeje partnerojo zhromadnje zwoprawdźić. Mjeno zestaja so ze spočatnych pismikow němskeho pomjenowanja za Rowno, Mułkecy a Slepo a je wuslědk šulerskeho wubědźowanja Slepjanskeje šule. Wone naruna dotalne projektowe mjeno Ekologiska milinarnja, rozłoži wjesnjanosta Jörg Funda srjedu na wobydlerskim forumje. Cil projekta je, natwarić 25 milinowych wětrnikow z cyłkownym wukonom 167 megawattow, składowaki ćopłoty produkować, mjenowane tři wsy z ćopłotu zastarać a energijowe drustwo załožić.
Wětrniki natwarić chce předewzaće Enercity z wuchodofriziskeho Leera. Wone planuje w prěnim wotrězku 32 milionow eurow inwestować. Twarske dźěła započnu so nazymu 2025. Pozdźišo je druhi wotrězk předwidźany, za kotryž chcedźa dalšich 185 milionow eurow inwestować. Z produkowanej milinu móhli hač do 86 000 domjacnosćow zastarać, štož wotpowěduje wulkosći města Münster. Slepjanska gmejna by z toho kóžde lěto dochody něhdźe 70 000 eurow měła. Nimo toho chce Enercity towarstwa Slepjanskeje gmejny z něhdźe 100 000 eurami wob lěto spěchować.
Serbska awantgarda w Krakowje
Krakow. We wobłuku 38. Krakowskeho mjezynarodneho festiwala komponistow předstajištaj Jan Kalinowski (cello) a Marek Szeler (křidło) wčera prapremjernje kruch Jana Cyža „Pax optima rerum – Pokój jest najlepszy“. Samsna wobsadka wuhotuje tež němsku premjeru, a to 3. junija na 24. Braniborskim swjedźenju noweje hudźby „Intersonanzen“ w Podstupimje.
Nalada rjemjeslnikow špatna
Drježdźany. Konjunkturna analyza Drježdźanskeje rjemjeslniskeje komory wotbłyšćuje špatnu naladu mjez zawodami. Poprawom so situacija rjemjeslniskich předewzaćow w nalěću stajnje polěpša. Tola lětsa njebě rozmach tajki wulki kaž hewak. Hospodarske ramikowe wuměnjenja su nadal hubjene, na čož měła politika z jasnymi impulsami reagować, sej komora žada.
Podij wo přichodźe Europy
Chrósćicy. Kóždolětne wopominanje padnjenych pólskich wojakow při Fulkec hórce w Chrósćicach zhromadnje z pólskimi hosćimi ze Żarow wotměje so njedźelu 28. apryla. Na wopominanju w 10.30 hodź. wobdźěla so nimo pólskich hosći předsyda Domowiny Dawid Statnik, županka župy „Michał Hórnik“ Diana Wowčerjowa a Chróšćanski wjesnjanosta Marko Kliman. Swjatočnosć wobrubi Chróšćanska serbska zakładna šula „Jurij Chěžka“.
Wolfgang Kühn turněr dobył
Njeswačidło. Na škotowym turněrje serbskich seniorow je so wutoru w Njeswačanskim „Knježim hosćencu“ škotowarka a 24 škotowarjow wobdźěliło. Štwórty turněr tohole lěta dobył je Wolfgang Kühn z nahladnymi 3 212 dypkami před Herbertom Krječmarjom (2 763) a Achimom Mejglom (2 658). Cyłkowne hódnoćenje po štyrjoch hrajnych dnjach nawjeduje dale Eberhard Kroschk před Achimom Mejglom a Wolfgangom Kühnom. Přichodne zetkanje serbskich škotowarjow wotměje so 28. meje w Kozarčanskim hosćencu.
Pančicy-Kukow (SN/MWj). Přirodowa a wučbna zahroda klóštra Marijineje hwězdy w Pančicach-Kukowje, kotrejež nošer je Miłočanski Křesćansko-socialny kubłanski skutk (CSB), wobsteji lětsa 30 lět. Jubilejnu sezonu zahaja přichodnu njedźelu, 28. apryla, w 14 hodź. Wot lěta 1994 je wjace hač 750 000 ludźi zahrodu wopytało a něhdźe 85 000 šulerjow je so na projektnej wučbje wobdźěliło, kaž CSB zdźěli.
Zahajenje sezony wobrubi kulturny program na přirodnym jewišću z kapału „Kummel Brass“ z Wojerec a serbskim wokalnym ansamblom Wólbernosće. Na nalětnich wikach namakaja hobbyjowi zahrodkarjo wšitko trěbne za swójsku zahrodu. Tradicionelnje k zahajenju sezony tež zaso štom lěta w susodnym Lipju sadźa. Lětsa je to mučnica (Echte Mehlbeere). Nimo abatisy Gabriele Hesse sadźi ju bywši statny sekretar Hermann Kroll-Schlüter. Před 23 lětami su wjerjebinu (Eberesche) jako prěni štom lěta sadźili. Mjeztym móžeš w Lipju aleju štomow lěta wobdźiwać.
Jedyn z wjerškow lětušeje 30. sezony je wustajeńca wo nastaću a wuwiću zahrody. Wopytowarjo na nazorne wašnje zhonja, što je so w zašłych 30 lětach w zahrodźe stało.