Wyši popłatk za wužiwanje gmejnskich zajimawosćow wobzamknjeny
Njeswačidło (JK/SN). Wopytowarjo Njeswačanskeho hrodu kaž tež wětrnika a doma kata pola Łuha budu dyrbjeć wot jutrow něšto hłubšo do móšnje přimnyć. Kóždolětnje gmejna wotpowědnje wotličenju zašłeho lěta popłatki za wužiwanje gmejnskich atrakcijow a posłužbow přiměri. Trěbne budźe lětsa snadne zwyšenje, dokelž su so wudawki za zdźerženje a wobhospodarjenje wažnych městnosćow a twarjenjow w gmejnje zwyšili. Zo pak by wopyt tajkich historiskich městnosćow kaž je to znaty Njeswačanski hród dale socialnje znjesliwy wostał, su so radźićeljo wutoru na swojim jubilejnym 50. posedźenju w tutej wólbnej dobje na łahodne zwyšenje dojednali. Konkretne ličby móža zajimcy na gmejnskej internetnej stronje zhonić. Nowosć je, zo karta za swójby za hród hižo njedawa. Dotalne rjadowanje, kotrež wobkedźbowaše wšelake zestawy swójbow po ličbje dorosćenych a dźěći bě překomplikowane a žadaše sej wysoku koncentraciju pokładnikow.