Krótkopowěsće (21.12.23)
Klinika w nowymaj rukomaj
Choćebuz. Klinikum Carla Thiema přewozmje kraj Braniborska. Tole rozsudźichu měšćanscy radźićeljo srjedu. Přičina změny mějićelstwa ma puć za wysokošulsku medicinu w chorowni rubać. Kraj chce nětko wjace hač dwě miliardźe eurow do wutwara kliniki inwestować a tak wjace hač 1000 nowych dźěłowych městnow wutworić.
W nowych medijach prezentne
Budyšin. Medijowy projekt LUCIJA je wutworiło skupinu, kotraž so z wuwiwanjom produktow za youtube- kaž tež instagram-kanal LUCIJE zaběra. Prěni produkt třoch šulerkow 12. lětnika Budyskeho Serbskeho gymnazija, kotrež pod nawodom Michelle Mikławškec dźěłaja, je youtube-wideo na temu sexting, kotryž je wot wčerawšeho online.
Skućićela nětko wobskoržili
Krótkopowěsće (20.12.23)
Rozšěrjeny słownik online
Budyšin. Rozšěrjeny druhi nakład „Němsko-hornjoserbskeho słownika noweje leksiki“ steji wužiwarkam a wužiwarjam w portalu k dispoziciji. Wo tym je Serbski institut informował a zdobom na to skedźbnił, zo LND ćišć słownika přihotuje. Rěčespytnicy instituta su serbske wotpowědniki kritisce přepruwowali a nowe hesła dodali.
AOK zwyši přinoški
Erfurt/Drježdźany. Najwjetša chorobna kasa Sakskeje a Durinskeje AOK Plus, zwyši přidatny přinošk za swojich zawěsćenych spočatk lěta 2024 na 1,8 procent. Jako přičiny mjenowaše zarjadniska rada mjez druhim: Podróšenje lěkarstwow a lěkowanjow. Předsydka zarjadniskeje rady Daniela Kolbe praji, zo su tež zasahowanja politiki wudawki AOK zańdźene lěta šwarnje zwyšili.
Hudźba z najstaršeho žórła na CD
Krótkopowěsće (19.12.23)
Kaulfürst naslědnik Bartelsa
Budyšin. Dr. Fabian Kaulfürst nastupi klětu spočatk januara zastojnstwo wotrjadnika wobłuka rěčespyt Serbskeho instituta. Z nim „budźe nimoměry dokładnje wukubłany sorabist rěčespytne dźěło w Choćebuzu kaž tež w Budyšinje nawjedować“, dotalny načolnik prof. dr. Hauke Bartels podšmórny. Bartels bě funkciju něhdźe 20 lět wukonjał a chce so nimo nadawkam jako direktor SI „dale dokumentaciji delnjoserbšćiny“ wěnować.
Předsydku znowa wolili
Budyšin. Čłonki a čłonojo spěchowanskeho towarstwa Serbskeho muzeja w Budyšinje su wčera na swojej hłownej a wólbnej zhromadźiznje dr. Annett Brězanec jako předsydku wobkrućili. Jako městopředsydu wuzwolichu Clemensa Brězana, za financnika Marka Suchyja. Předsydstwu přisłušeja nimo toho Helena Pallmanowa a Andrea Pawlikowa.
Jězus w tramwajce
Krótkopowěsće (18.12.23)
Tři cyłki z Budyskeho wokrjesa
Berlin. Zwjazk spěchuje 200 projektow amaterskich hudźbnikow. Z pjenjezom po koronje struktury amaterskeje hudźby zaručeja a spěchuja jara wuměłske projekty. K nim słušeja orchester gitarow „luventa Musica Wojerecy z.t.“ z nimale 5 000 eurami, Spěchowanski kruh Budyskeho młodźinskeho orchestra a Spěchowanski kruh kapały wohnjoweje wobory Bašecy po 10 000 eurach.
Brunica jako časowy swědk
Drježdźany. Sakski krajny zarjad za pomnikoškit je prěnje wuslědki archeologiskich přepytowanjow brunicowych rewěrow w swobodnym staće wozjewił. Brošurka wo temje wobsahuje šěroke katalogizowanje powostankow wudobywanja brunicy, tež we Łužicy. Přepytowali su nimo archeologiskich tež twarske a wuměłske objekty. Změny w kulturnej krajinje su tak wobšěrnje dokumentowane.
Katalonisku zastupjerku zetkał
Krótkopowěsće (15.12.23)
Wotnětka wothłosować
Budyšin. Prěnja faza zhromadneje akcije Ludoweho nakładnistwa Domowina a Serbskich Nowin „Hornjoserbske słowo lěta 2023“ ja zakónčena. Z dohromady 21 zapodatych namjetow bu dwanaće wuzwolenych, kotrež so wotnětka krok po kroku na digitalnych kanalach LND a SN předstaja. „Dobyćerja“ postaji čitarstwo, wothłosowanje wuběži 28. decembra.
Wólby su zhromadna naležnosć
Choćebuz. Spočatk lěta 2024 chcetej župa Delnja Łužica a třěšny zwjazk Domowina postupowanje za klětuše komunalne wólby a tych krajneho sejma w Braniborskej rozjimać. Za to stej dwě wuradźowani předwidźanej, rěkaše po posedźenju župneho předsydstwa wčera w Choćebuzu. Na nim bě so referent Domowiny za gremijowe a ministerialne naležnosće, Feliks Ričel, jako hósć wobdźělił.
Wosebita renta lěkarjam?
Krótkopowěsće (14.12.23)
Karantena žana chorosć njeje
Luxemburg. Štóž dyrbješe swój dowol korony dla w karantenje přebywać, nima prawo, swobodne dny nachwatać. Karantenu njemóžeš z chorosću přirunować. To je Europske sudnistwo dźensa w Luxemburgu sudźiło. Sudnicy w padźe z Němskeje argumentowachu, zo w dowolu so wot dźěła wočerstwješ. Tomu so karantena, hinak hač chorosć, njespřećiwja.
Serbska bjesada w sakskej stolicy
Drježdźany. Dźesać Serbowkow a Serbow zetka so wčera wječor w korčmje Am Thor barokneje štwórće znowa na Serbske blido. W serbskej bjesadźe wuměnichu sej přitomni wo serbskich naležnosćach, wosebje tež nastupajo přichod „Stup dale“ w sakskej stolicy. Klětu kónc januara ma so wotměć wobnowjenje tohole zapisaneho serbskeho towarstwa z nowowólbami předsydstwa.
Energetiske napoje wobmjezować
Krótkopowěsće (13.12.23)
Kubłanska infrastruktura wažna
Berlin. Na namjet frakcije CDU/CSU je hospodarski wuběrk zwjazkoweho sejma dźensa w zjawnym słyšenju změnu strukturow we Łužicy rozjimał. Jako wěcywustojna přeprošena braniborska rěčnica Łužiskeho kruha, Grodkowska měšćanostka Christine Herntier, wupraji so wuraznje za to, ze srědkami změny strukturow tež kubłansku infrastrukturu spěchować móc.
Wo wědomosći w Chrósćicach
Drježdźany. Z nowej kampanju SPIN2030 spřistupni ministerstwo za wědomosć, kulturu a turizm wot klětušeho januara ludnosći Saksku jako kraj wědomosće. Tak prezentuja we wšelakich regionach mjez druhim wuznam kumštneje inteligency za wšědny dźeń, přichodneje chemijoweje industrije abo slědźenjow w centrumje astrofyziki. Jedna z prěnich stacijow budu Chrósćicy.
Symbol njeswobody přesadźili
Krótkopowěsće (12.12.23)
Serbska etaža w Drježdźanach?
Drježdźany. W najstaršim Drježdźanskim studentskim klubje „Gutzkowclub“ su so serbscy studenća wčera na adwentničce z předsydu Domowiny Dawidom Statnikom, kubłanskej referentku třěšneho zwjazka Katrin Suchec-Dźisławkowej a jednaćelom Serbskeho šulskeho towarstwa Andreasom Ošiku zetkali. Mjez druhim su wo móžnym znowawutworjenju serbskeje etaže studowacych rěčeli.
Tež negatiwne wuskutki
Choćebuz. Reforma braniborskich wokrjesow před 30 lětami měješe tež negatiwne wuskutki na Serbow, rjekny stawiznar dr. Pětš Šurman ze Serbskeho instituta. Kaž Serbski rozhłós RBB rozprawja, mějachu Serbja do 1993 jednoho zamołwiteho za cyły Choćebuski wobwod. Na to dźěłaštej jenož w Choćebuzu a we wokrjesu Sprjewja-Nysa (SPN) hłownohamtskej społnomócnjenej. Serbstwo móhło so we wokrjesu SPN chětřišo wuwiwać hač w susodnych wokrjesach.
Palestinsku parolu zakazali
Krótkopowěsće (11.12.23)
SN dźěło fotografow připóznawaja
Berlin. Serbske Nowiny su nimo dźenikow Mainpost a Landshuter Zeitung znowa přikładne nastupajo prawo fotografowkow a fotografow, zo so jich mjeno wozjewja. Wo tym informowaše Zwjazk žurnalistow Němskeje (DJV) dźensa w Berlinje. Při wuhódnoćenju zwěsćachu, zo steji w Serbskich Nowinach pod sto procentami fotow mjeno awtora. „Njeńdźe jenož wo zakoń, ale wo připóznaće dźěła“, rjekny Mika Beuster, zwjazkowy předsyda DJV.
Z Choćebuza do Żaganja direktnje
Choćebuz. Direktny ćah DB Regio zwjaza jako RB93 pjeć razow wot póndźele do pjatka a dwójce kónc tydźenja nětko Choćebuz z pólskim městom Żaganjom we wojewódstwje Lubuskie. Dotal dyrbjachu pasažěrojo w Baršću do pólskeho ćaha přestupić. Změna płaći z nowym jězbnym planom wot wčerawšeje njedźele. Dotalny poskitk ćahow mjez Choćebuzom a Baršćom so njezměni.
Dźak za čestnohamtstwo
Krótkopowěsće (08.12.23)
Michał Lorenc njeboh
Budyšin. Dźiwadźelnik, režiser a awtor Michał Lorenc je 84lětny 6. decembra zemrěł, kaž Němsko-Serbske ludowe dźiwadło zdźěla. Jewišću bě wón wot załoženja w lěće 1963 swěrny. Ze starosće wo dorost bě Lorenc 1992 Młodźinske dźiwadło na Serbskim gymnaziju a 1994 Serbske činohrajne studijo załožił. Jako prěni je wot 1998 funkciju zastupjerja intendanta za serbske dźiwadło wukonjał. Jako awtor je 600lětne stawizny Budyskeho dźiwadła wuslědźił a publikował.
Jednaćela rozžohnowali
Miłoćicy. Z wjelelětnym jednaćelom Peterom Neunertom je so Miłoćanski křesćansko-socialny kubłanski skutk wčera rozžohnował. Wón bě zdobom jednaćel Sakskeho krajneho kuratorija za wjesny rum, za čož dźakowaše so jemu předsydka Marja Michałkowa. We woběmaj funkcijomaj naslědowaše jeho lětsa w meji Marko Kliman.
„Krisenmodus“ słowo lěta
