Krótkopowěsće (17.05.24)
Domowina namołwja wolić hić
Budyšin. Z namołwu, na komunalnych, Europskich a krajnosejmowych wólbach so wobdźělić, je so prezidij Domowiny za serbsku zjawnosć wobroćił. „W demokratiji smě kóždy sobu skutkować. Tohodla je trěbne, zo zasadźamy so ze swojim hłosom za towaršnosć, kotraž so přez tolerancu, mjezsobny respekt a mnohotnosć wuznamjenja“, rěka we wčera wozjewjenej namołwje.
Z Mytom Viadriny počesćeny
Frankfurt nad Wódru. Z 23. mytom Viadridny je Europska uniwersita Frankfurt nad Wódru wčera němskeho politologu a bywšeho direktora Němskeho historiskeho instituta we Waršawje, prof. dr. Klausa Ziemera, počesćiła. Lawreat je hižo lětdźesatki znaty jako wupokazany znajer a wuběrny analyst němsko-pólskich poćahow.
Weber nachwilny intendant
Krótkopowěsće (16.05.24)
Słowakski premier stabilny
Bratislava. Strowotniski staw słowakskeho ministerskeho prezidenta Roberta Fica je po atentaće na njeho „stabilny, ale dale jara chutny“. Tole je zastupowacy ministerski prezident Robert Kaliňák dźensa słowakskej powěsćerni TASR prajił. Po informacijach chorownje su Fica pjeć hodźin operowali. Atentatnik bě wčera na 59lětneho třělał a jeho ćežko zranił.(Čitajće dale na stronje 2.)
Łužičana za prezidenta wuzwolili
Drježdźany. Twarski předewzaćel Uwe Nostitz z Bělšec je nowy prezident sakskeho foruma rjemjesła. 62lětneho twarskeho inženjera su wčera w Drježdźanach z jasnej wjetšinu hłosow za naslědnika Drježdźanskeho třěchikryjerskeho mištra Jörga Dittricha wuzwolili. Dittrich znowa kandidował njeje. Wón je mjeztym prezident Centralneho zwjazka rjemjesła Němskeje a wostanje wiceprezident w Sakskej, forum rjemjesła zdźěla.
Zrěčenje podpisali
Krótkopowěsće (15.05.24)
Zaso wjace swójbow w Sakskej
Kamjenc. W Sakskej bydli zaso wjace swójbow z njepołnolětnymi dźěćimi hač hišće před dźesać lětami. Loni su nimale 417 000 swójbow z małolětnymi dźěćimi registrowali, 2013 běše jich 375 000 swójbow, statistiski krajny zarjad w Kamjencu składnostnje dźensnišeho Dnja swójby zdźěli. Porno tomu je ličba tajkich swójbow 1996 hišće 561 000 była. Loni wučinjachu mandźelstwa ze swojimi dźěćimi 54 procentow swójbow.
Strach wohenjow dale přiběra
Pirna. Strach lěsnych wohenjow w Sakskej přiběra. Předewšěm na sewjeru Zhorjelskeho a Budyskeho wokrjesa je po informacijach statneho zawoda Sakski lěs jara suche. Mjeztym su tam zamołwići warnowanski schodźenk pjeć postajili. Pobrachowacych spadkow dla móhła so situacija dale přiwótřić.
Češa pija mjenje piwa
Krótkopowěsće (14.05.24)
Start za filmowy festiwal
Žitawa. W Žitawje zahaja dźensa wječor 21. Nysowy filmowy festiwal. W dźiwadle Gerharta Hauptmanna běži film „Ellbogen“, portret młodeje žony. Rjad Fokus ma lětsa titul „Female Perspektives“ a wopřija produkcije z Němskeje, Čěskeje a Słowakskeje. Festiwal wotměwa so w jědnaće městach, w 19 kinach Hornjeje Łužicy, Pólskeje a Čěskeje, mj. dr. w Zhorjelcu, Zgorzelecu, Žitawje, Liberecu, Varnsdorfje, Budyšinje a Běłej Wodźe.
Wjele prawicarskich kandidatow
Budyšin. We wšěch wólbnych wokrjesach nastupi prěni raz k wólbam Budyskeho wokrjesneho sejmika „Zwjazk Hornja Łužica“. Neonacistiscy „Swobodni Saksojo“ a zastupjerjo prawicarskeho protestneho hibanja z dwělomnymi chorhojemi mjez druhim při B 96 su hromadźe 39 kandidatow nastajili. Na wólbnej lisćinje je nimo wučerki tež wjele młódšich ludźi zastupjenych.
Ludowu próstwu hišće podpisać
Krótkopowěsće (13.05.24)
Jüngel znowa derby dobył
Hamburg. Marvin Jüngel z Kamjenca je swój titul jako dobyćer jěchanskeho wubědźowanja Hamburgskeho derbyja zakitował. Před wjace hač 25 000 přihladowarjemi je wón znaty módry banćik wospjet dobył. Kaž 22lětny po wubědźowanju zwurazni, bě jemu wažne dopokazać, zo njebě dobyće loni wuwzaće.
Dantz za fairnosć do wólbow
Kamjenc. Wyši měšćanosta Kamjenca Roland Dantz je ludnosć namołwjał, wšěch požadarjow wo mandaty při komunalnych a europskich wólbach respektować. Wón reaguje na napady na běrowy stron AfD a Lěwica a na přiběrace skóncowanje wólbnych plakatow. Dantz: „Tajki wandalizm so na nas wšěch měri, mamy so zhromadnje za demokratiju a swobodnu wotewrjenu towaršnosć zasadźować!“
„Templ“ čěskeho lodohokeja
Krótkopowěsće (10.05.24)
Zwjazk móže dźěłać započeć
Budyšin. Krajna direkcija je załoženje zaměroweho zwjazka za Kamjensku Lessingowu kupjel dowoliła. Z tym móže zwjazk, wobstejacy z Budyskeho wokrjesa a města Kamjenc, dźěłać započeć, rěka w nowinskej zdźělence wokrjesa. Kupjel ma 31,5 milionow eurow płaćić. Z toho je 28,4 miliony eurow spěchowanskich srědkow z programa za změnu strukturow. 2027 chcedźa ju twarić započeć.
Lutowarnju počesćili
Budyšin. Budyska wokrjesna lutowarnja słuša k najangažowanišim firmam „Tydźenjow wotewrjenych předewzaćow Sakskeje“. Wusahowace, na praksu wusměrjene zarjadowanje k powołanskej orientaciji sakskaj ministraj za kultus, Christian Piwarz (CDU), a hospodarstwo, Martin Dulig (SPD), a šef agentury za dźěło w Sakskej Klaus-Peter Hansen z čestnym wopismom připóznachu.
„Treningowe městačko“ natwarili
Krótkopowěsće (08.05.24)
Wuswobodźenje wopominali
Kamjenc. Pod hesłom „Wójnu dobyć njedosaha. Wažniše je, měr organizować!“ su Kamjenčenjo na wopomnišću něhdyšeho wonkowneho koncentraciskeho lěhwa Kamjenc-Herrental dźensa na wuswobodźenje wot nacionalsocializma a na kónc Druheje swětoweje wójny spominali. Zarjadowanje organizowało běše spěchowanske towarstwo wopomnišća.
Jednanja zwrěšćili
Běła Woda. Tarifowe jednanja za w Běłowodźanskej chorowni su zwrěšćili. Zawčerawšim su so tam zastupjerjo dźěłodawarjow a dźěłarnistwa zetkali. Najebać dlěše rozmołwy njejsu so na zrěčenje dojednali. Dźěłarnistwo verdi žada sej inflaciske wurunanje we wobjimje 3 000 eurow za čłonow dźěłarnistwa a zwyšenje tarifa wo dwaj procentaj wot lětušeho apryla. Nětko w chorowni dalše stawki hroža.
Sakska pod přerězkom
Kamjenc. Přerězna mzda je w lěće 2022 wo 5,8 procentow stupała, zdźěli sakski statistiski zarjad wčera w Kamjencu. Tak zasłužichu ludźo w swobodnym staće wob lěto přerěznje 23 536 eurow. Po cyłym Zwjazku pak bě přerězna mzda 25 830 eurow. Z tym leži Sakska pod cyłoněmskim přerězkom.
Krótkopowěsće (07.05.24)
Wólbne plakaty wobškodźili
Budyšin. Lěwica w Budyskim wokrjesu je hižo w prěnich dnjach wólbneho boja zwěsćiła, zo so wólbne plakaty w gmejnach a městach wobškodźa. Tak su njeznaći mjez druhim w Chrósće (gmejna Wulka Dubrawa) plakaty wottorhali, štož je Lěwica policiji přizjewiła. Tohorunja su zamołwići škody w Kamjencu, Radebergu, Załomju a Budyšinje zwěsćili a wokrjesnemu předsydstwu strony přizjewili.
Mjenje wohroženych kónčin
Drježdźany. Wot afrikanskeje swinjaceje mrětwy wohrožene kónčiny w Sakskej dale woteběraja. Tole zdźěli wčera, póndźelu, sakske strowotniske ministerstwo. Wulke dźěle Mišnjanskeho wokrjesa njesłušeja nětko hižo wjace do wohroženych kónčin, ale jenož hišće do pufroweho pasma . Dale wohrožene pak wostanu kónčiny we wokrjesomaj Budyšin a Zhorjelc.
Kakteje w čěskej přirodźe
Krótkopowěsće (06.05.24)
Wjele projekty hižo přizwolili
Drježdźany. Za změnu strukturow w sakskim dźěłu Łužicy bu dotal 121 projektow wuzwolenych. Cyłkowny wolumen projektow wučinja 1,1 miliardow eurow. Kaž sakske ministerstwo za regionalne wuwiće nětko zdźěli, su zarjady hižo 78 projekty přizwolili, za čož steji 684 milionow eurow k dispoziciji.
Syły ludźi na wiki přijěli
Koćina. Wjele ludźisu sej wčera na burske wiki do Koćinskeho Krabatoweho mlokoweho swěta dojěli. Na wjace hač 70 stejnišćach kupichu sej wopytowarjo regionalne wudźěłki, chłóšćenki abo produkty rjemjeslnikow. Tež sakski ministerski prezident Michael Kretschmer (CDU) je do Koćiny přijěł a přehladku oficialnje wotewrěł.
Wenclowa nětko wuměnkarka
Krótkopowěsće (03.05.24)
Jurij Šołta njeboh
Nowa Wjeska. Jurij Šołta-Nowowješćanski je wčera w starobje 89 lět zemrěł. Za jeho zasłužby we wobłuku aktiwneho narodneho dźěła počesćichu jeho w lěće 2020 z mytom Domowiny. Jako wučer, nawoda Nowowješćanskeje Domowinskeje skupinje, w předsydstwje Kamjenskeje župy a dalšim čestnohamtskim skutkowanju je wón swoje slědy zawostajił.
Přepytuje prawicarski nadběh
Drježdźany. Statny škit je přepytowanja w zwisku z rozestajenjemi mjez młodostnymi w Trilexu po puću z Budyšina do Drježdźan dnja 15. apryla přewzał. Po tym, zo běše so skupina z něhdźe 30 wosobami z prawicarskeje sceny na Budyskej póndźelnišej demo wobdźěliła, běchu někotři z nich w ćahu na wróćopuću do Drježdźan třoch młodostnych z lěwicarskeje sceny prowokowali a nadběhowali.
Tramwajka zaso jězdźi
