Serbske tradicije sobu wožiwiła
Před wjac hač 20 lětami bu Domowinska skupina w Zušowje (Suschow) załožena, a wot toho časa je wona w njej aktiwna a jej samo předsydari. Rěč je wo Zušowčance Caroli Greinowej. Njesprócniwje organizuje w towaršnym žiwjenju wsy jara připóznata žona zetkanja skupiny, stara so wo jeje čłonow a ma předewšěm tež nowym myslam a nowym projektam napřećo stajnje wotewrjenej wuši. Greinowa wudźeržuje dobre zwiski k partneram Zušowskeje Domowinskeje skupiny, k župje Delnja Łužica, k Wětošowskemu měšćanskemu zarjadnistwu, k Zušowskej wjesnej radźe a tamnišej wohnjowej woborje. Nastupajo organizatoriske naležnosće so wona wo wšo sobu stara, hač su to próstwy, wotličenja abo naležnosće wšědneho dnja. Wona njeda sej dźěło kazać a su-li ćeže, je po móžnosći hnydom sama wotstronja.
Pjeć lětdźesatkow wjesela a radosće nad spěwom
Serbski muski chór Delany swój złoty jubilej z wosebitym koncertom połnym překwapjenkow w Šunowje woswjećił
„Jako běch šće małki ...“
na melodiju „Always look on the bright side of life“
Jako běch šće małki,
w’ hłowje jenož kawki,
po Serbach sej hwizdach dundajo.
Nětk nimale sym stary,
a dóstawam sej swary
hdyž mylu mandźelsku spěw spěwajo!
Tak ja sutam zrudnje do swěta.
Pytam dalšich starcow a wučerja.
W swojich myslach chudy
sonju wodnjo druhdy,
zo budu w muskim chórje spěwny bar.
Kaž swět so takle wjerći,
Nětk susod ze mnu šćerči,
w Konjecach je naš hłós žadny dar!
Nětk spěwamy kaž škórcy we slowkach. Hdyž nas słyšiš, pon’ sy na kolenach!
Nichtó njem’že skónčić našu štučku,
takt my mamy, znajemy linku.
Hišće dale wam w’ wušach ležimy,
doniž waš aplaws my njesłyšimy.
W našich hłowach hłós žno słyšimy,
Bjez kleska pak njezakónčimy!
Tra-la-la la la la la lalala,
tra-la-la la la la la lalala!
Marko Brankačk
Swoje stejišćo k pomnikej hišće raz potwjerdźili
Budyšin (kl/SN). Koronoweje pandemije a z njej zwisowacych aktualnje płaćiwych wobmjezowanjow dla su so čłonojo předsydstwa Budyskeje župy „Jan Arnošt Smoler“ na swojim wčerawšim wuradźowanju w Budyskim Serbskim domje w mjeńšej wobsadce schadźowali. W srjedźišću steješe plan klětušich župnych projektow. Přewjesć chcedźa znowa dźeń wotewrjenych duri w domje Měrćina Nowaka-Njechorńskeho kaž tež wšelakore projekty z dźěćimi a šulerjemi.
Přihotowali su wčera lětušu adwentničku Budyskeje župy, kotruž chcedźa 1. decembra wotměć. Zarjadowanje wobrubi Ludowe nakładnistwo Domowina z čitanjom z antologije „Susodźa“. Publikaciju předstajić chce jeje wudawaćelka Ingrid Juršikowa. Čitać budźetej Róža Domašcyna a Měrka Mětowa. Poskićić chce LND tež knižne blido ze swojimi aktualnymi publikacijemi a nowosćami. Hižo nětko předsydstwo wšitkich zajimcow na adwentničku přeprošuje. Čitanju přizamknyć ma so rozprawa wo skutkowanju župneho předsydstwa w minjenymaj lětomaj. Wězo, dyrbja wšitcy přitomni na aktualne postajenja koronu nastupajo dźiwać.
Test obligatoriski
Budyšin (SN/JaW). Wšitcy wobdźělnicy wuradźowanjow Zwjazkoweho předsydstwa Domowiny a jeho prezidija dyrbja so přichodnje na městnje na koronu testować dać. To je prezidij Domowiny wčera na swojim hybridnym posedźenju w Budyšinje wobzamknył, kaž nowinski rěčnik Marcel Brauman zdźěli.
Dale so gremij na to dojedna, zo płaći za tele zhromadźizny rjadowanje 2G. Tak smědźa so jeničce šćěpjeni a z korony wustrowjeni na prezencnym posedźenju wobdźělić, tamni digitalnje. Tež wčera běchu wjacori čłonojo prezidija přez internet pódla. Postajenje płaći za čas incidency nad 35.
Serbskosć twori wosebitu jónkrótnosć
Rań (SN/JaW). „Serbskosć je za turizm we łužiskim regionje wulka wosebitosć.“ To potwjerdźi referent Domowiny za hospodarstwo a infrastrukturu Pětr Brězan, kiž je zdobom předsyda towarstwa Serbski kulturny turizm, na zašłym wuradźowanju wurjadneho wuběrka Braniborskeho krajneho sejma za strukturne dalewuwiće Łužicy w Ranju (Großräschen).
Kaž Brězan w swojim přednošku na zjawnej fachowej rozmołwje přitomnym – mjez druhim zastupowacemu měšćanosće Ranja (Großräschen) Robertej Weidnerej a krajnemu radźe wokrjesa Hornje Błóta-Łužica Siegurdej Heinzy (njestronjan) – wujasni, je „serbska kultura wosebita jónkrótnosć za turistiski region, kotruž móžemy hišće bóle šěrić“. Towarstwo Serbski kulturny turizm ma w naležnosći akterow Hornjeje a Delnjeje Łužicy zwjazować. Zdobom předstaji Brězan w swojej prezentaciji strategiju za „turizm, wuwiwanje marketinga a zhromadne dźěło ze Sakskej z widom na Serbow“.
Motor wjesneho žiwjenja
Hdyž so w delnjołužiskim Gołbinje (Gulben) něšto hiba, je tež wona pódla. Ale nic, zo by jeno sobu swjećiła. Ně, zamołwitosć we wsy je jej wjac hač jenož na swjedźeń přińć. Takle a podobnje wopisuja Gołbinčanki a Gołbinčenjo Astrid Šraminu. Towaršnostne žiwjenje na wsy je pokazane na angažowane wosoby, kotrež zamóža tež dalšich zahorić. Tajka wosoba je Astrid Šramina w swojej ródnej wsy Gołbinje. „Wona njeda sej dwójce kazać, dźe-li wo to, něšto na nohi stajić. Při čimž je wšojedne, hač jedna so wo dwurěčne kemše, wo kursy delnjoserbšćiny, wo delnjoserbske čitanja, wo spěwne wječorki, wo přednoški abo wo informaciske zarjadowanja k serbskim stawiznam, swójbnym mjenam abo k wopřijećomaj ‚Sorben a Wenden‘ – Astrid Šramina njeje jenož wšudźe pódla, ně, wona je zdobom za mnohe z naličenych a njenaličenych aktiwitow motor we wsy“, zwurazni Heike Apeltowa w lawdaciji k počesćenju Delnjoserbowki z Čestnym znamješkom Domowiny spočatk oktobra w Budyskim Serbskim domje.
Wozjewja zaměrnje serbsku hudźbu
Elektroniska hudźba je z jeho mjenom wusko zwjazana. Wšako w Fredersdorfje pola Berlina bydlacy a skutkowacy Jan Bělk po swojim studiju hudźby a hudźbneje pedagogiki na Berlinskej Wysokej šuli za hudźbu „Hanns Eisler“ 1985 nadawk dóstał, nowy studijny směr Elektroniska hudźba natwarić.
Kruty stołp serbstwa w regionje
Wona hori so za serbskosć a rady spěwa. Njeličomne lěta hižo je wona čłonka Domowinskeje skupiny w Židźinom a wot załoženja tamnišeho chóra tež z jeho horliwej spěwarku. Rěč je wo Weronice Boswankowej, kotraž zasadźuje so wo skrućenje a wuwiwanje serbstwa w swojej domiznje njedaloko Wojerec.
Weronika Boswankowa je jara aktiwna w 1986 załoženym spěwnym cyłku. „Tak stara so wona wo internetnu stronu chóra, kotryž so wosebje hajenju serbskich pěsnjow wěnuje“, rjekny w lawdaciji k spožčenju Čestneho znamješka Domowiny spočatk oktobra w Budyšinje Zala Cyžowa. „Spěwarjo a publikum sej městopředsydku chóra zdobom jako zabawnu a šarmantnu moderatorku koncertow česća, kotrež wona serbsce a němsce připowědźa.“
Mjeztym dwanaće lět syda rodźena Židźinjanka w zymskich měsacach tydźensce jónu na šulskej ławce. To wopytuje wona „serbsku bjesadu“ na Horach a so z dalšimi zajimcami w serbšćinje wukmanja. „Ze swojim starym Židźinskim dialektom a swojej wobšěrnej wědu wo nałožkach Serbow w kónčinje je wona kruty stołp serbstwa w našim regionje“, rěka we wobkrućenju počesćenja.
Chcetej wušo hromadźe dźěłać
Zły Komorow (SN). Domowina a wokrjes Hornje Błóta-Łužica budźetej w přichodźe hišće wušo na dobro serbskosće w zjawnosći hromadźe dźěłać. To je wuslědk połdrahodźinskeje rozmołwy krajneho rady Siegurda Heinze (njestronjan), wokrjesneje społnomócnjeneje za naležnosće Serbow Hanki Rjelcyneje, předsydy Domowiny Dawida Statnika a regionalneje rěčnicy za teritorij župy Delnja Łužica Heiki Apeltoweje wčera w Złym Komorowje, kaž třěšny zwjazk zdźěli. Do rozmołwy wopytachu Statnik, Rjelcyna a Apeltowa domizniski dwór w Lěskej pola Wjelceje, hdźež je jim Cornelia Schnippa staw saněrowanja kładźiteho domu rozkładła. Tež z předsydu Złokomorowskeje Domowinskeje skupiny Günterom Pawlišom sej mysle wuměnichu, kotryž so za wožiwjenje serbskeje rěče we wokrjesnym měsće a wokolnych wsach jara angažuje. Do programa, kotryž je Hanka Rjelcyna organizowała, słušeše dale wodźenje po Złokomorowskej twjerdźiznje.
Hižo jutře chce so předsyda Domowiny z krajnym radu wokrjesa Sprjewja-Nysa Haraldom Altekrügerom (CDU) w Baršću zetkać.
Čłonow dobywać najwažniše
Spěchowanske towarstwo zetkanišća Łazowskeho Domu Zejlerja a Smolerja dźěła tež pod ćežkimi wuměnjenjemi koronoweje pandemije dale. Kak chcedźa to konkretnje činić, wo tym su jeho čłonojo minjeny pjatk porěčeli.
Łaz (AK/SN). Dom Zejlerja a Smolerja we Łazu wostanje najebać wobmjezowanja koronoweje pandemije dla kulturny magnet regiona. To podšmórny předsyda spěchowanskeho towarstwa Reinhardt Schneider minjeny pjatk na hłownej zhromadźiznje towarstwa. Wone pod krizu chětro ćerpi. Dlěši čas žane zarjadowanja wotměć njemóžachu. Trajne wustajeńcy dyrbjachu zawrjene wostać, nowe dyrbjachu přestorčić. „Jako smědźachu jednotliwcy a swójby zaso přichadźeć, bu to lědma wužiwane“, Schneider rjekny.
