Dobrjoług-Góstkow/Doberlug-Kirchhain (SN/mb). Kulturny referent Domowiny Clemens Škoda je z wuslědkami prěnjeho Łužiskeho kulturneho foruma zašły pjatk spokojom: „Pokazuje so nětko, zo so serbska tematika jako priorita při zwoprawdźenju naprawow na kulturnym polu jewi.“ Na přeprošenje wotrjadnicy za kulturu braniborskeho ministerstwa za wědomosć, slědźenje a kulturu Brigitty Faber-Schmidt je so 120 wosobow ze wšelakich kulturnych institucijow, iniciatiwow a organizacijow z cyłeje Łužicy zešło. W přichodnych lětach steji 6,6 milionow eurow za kulturne projekty w ramiku změny strukturow k dispoziciji. Na forumje zaběrachu so w dźěłarničkach ze spěchowanjom a „kulturnej marku Łužica“. Clemens Škoda wabješe w skupinje „Łužica jako europski kulturny region“ za wobkedźbowanje wšěch rěčow Łužicy: delnjo- a hornjoserbšćiny, němčiny, pólšćiny a čěšćiny.
Klětuši forum so w Sakskej wotměje. Tež Łužiski kulturny forum je wupłód zakonja za zesylnjenje strukturow w dotalnych brunicowych rewěrach, kotryž je zwjazkowy sejm 2020 wobzamknył.
Předsydstwo župy „Jan Arnošt Smoler“ Budyšin chce so dale z temu digitalizacije zaběrać. Najprjedy pak su wčera poskitki medijo-pedagogiskeho projekta Lucija SŠT zeznali.
Budyšin (kl/SN). Serbske digitalne poskitki studija Lucija je Michał Cyž čłonam předsydstwa župy „Jan Arnošt Smoler“ předstajił. Woni zeznachu na swojim wuradźowanju wčera w Budyšinje šěroke portfolio projekta Serbskeho šulskeho towarstwa z prezentacije. Při tym je Michał Cyž rěčno-pedagogiske poskitki na zakładnych šulach runje tak wopisował kaž produkciju hromadźe ze zajimcami a synchronizaciju. Čłonka župneho předsydstwa Mathilda Skatulina zajimowaše so za to, hdźe w syći přehlad aplikacijow za nawuknjenje serbšćiny steji. Poskitk serbskich digitalnych produktow je wulki, jenož zo maja adresaća tež wo nich zhonić. Dale so wona prašeše, štó serbske krótke wideja za socialny medij instagram produkuje, dokelž su widejoklipy powabne za młódšich. Z temu digitalizacije chce so župne předsydstwo dale zaběrać.
Budyšin (SN/mb). „Łužiska kultura – wobchowana jenož w formje open-air-muzeja, abo je hišće žiwa?“ Wotmołwu za swój slědźerski projekt pod tutym hesłom je wčera pjeć studentow a studentkow z kruha wědomostnikow slawistiki „Koło Naukowe Slawistów“ Waršawskeje uniwersity pod nawodom swojeje prezidentki Kingi Stanaszek w Serbach pytało. Na staciji w Budyskim Serbskim domje stej jim mjez druhim zastupjerka Załožby za serbski lud Maria Untchowa a referentka Domowiny Madlenka di Sarnowa serbske produkty w Serbskej kulturnej informaciji předstajiłoj. Zdobom stej wo systemje spěchowanja a wo žiwjenju serbskich towarstwow informowałoj. Wosebje so hosćo za to zajimowachu, kak so Serbstwo tuchwilu zachowuje a so přichodnym generacijam dale dawa. Tež za koeksistencu mjez Serbami a Němcami a móžnosćemi nawuknjenja serbšćiny su so wobhonili. Jako studenća slawistiki chcedźa łužisku kulturu druhim ludźom předstajić. Dalša stacija pólskeje skupiny běše Serbski muzej.
Drježdźany (SN/mb). Zastupjerjo Domowiny su so wčera z nowym konsulom Čěskeje republiki w Drježdźanach zeznajomili. Na rozmołwje z dr. Jozefom Špánikom a generalnej konsulku dr. Markétu Meissnerovej su so ze stron třěšneho zwjazka předsyda Dawid Statnik, hłowna jednaćelka Judit Šołćina, referent za kulturu a wukraj, Clemens Škoda, a dr. Beata Brězanowa wobdźělili, nawodnica Rěčneho centruma Witaj w nošerstwje Domowiny. Konsul je nowy naměstnik generalneje konsulki. Generalny konsulat susodneho kraja w sakskej stolicy je nimo Sakskeje tež za Durinsku a Saksko-Anhaltsku zamołwity. Nowy konsul je runja swojej předchadnicy wosebje na dźěłoweje runinje za styki ze Serbami přisłušny. Nimo mjezsobneho zeznaća su so w połdrahodźinskej rozmołwje wšelakim temam wěnowali. Tak su wo dalšej podpěrje Čěskeje republiki z čěskimi wučerjemi, projektach w zwisku ze změnu strukturow we Łužicy a wězo tež wo stawizniskich a kulturnych stykach mjez Čechami a Serbami rěčeli. Generalna konsulka dr.
Wojerecy (SN/mb). Birgit Hančikowa z Ćiska budźe wot spočatka lěta 2024 nowa regionalna rěčnica Domowiny na teritoriju župy „Handrij Zejler“. Tuchwilu wona na krajnym zarjedźe za statistiku w Kamjencu dźěła. Naslěduje Sonju Hrjehorjowu, kotraž pak z čestnohamtskej čłonku župneho předsydstwa wostanje. Sulšečanka bě nowe nadawki w projekće „ZARI – syć za regionalnu identitu a serbsku rěč“ přewzała, ale tež w tutej funkciji ma swój běrow dale we Wojerowskim domje Domowiny. Na posedźenju župneho předsydstwa póndźelu wječor je so ko-županka Gabriela Linakowa w mjenje gremija dotalnej regionalnej rěčnicy za jeje wulki angažement na dobro Serbow w regionje dźakowała. Prawje bórze chcedźa so z naslědnicu zeznajomić.
75lětny Dieter Stoppel je znaty horliwy Serb z Wojerowskeho regiona, kotryž swoju domiznu a serbsku rěč přewšo lubuje. Před lětami wobžarowaše, zo na Horach hižo nichtó njeje, z kotrymž by serbować móhł. Chcyše tuž serbšćinu w swojej ródnej wsy zaso wožiwić a pytaše za ludźimi, kiž maja samsnu mysl. Předewšěm pytaše wučerku, kotraž by zajimcam serbšćinu podawała. W tutym swojim prócowanju ani njepopušći, jako prěnja wučerka kurs wjace nawjedować njemóžeše. Bórze namaka w Brigiće Rößlerowej swěrnu přewodźerku za rěčnu skupinu.
Nastupajo přinošk „Je načasu skónčnje jednać“ we wudaću SN z 19. winowca zwěsći Domowina, „zo njeje wjetšina delegatkow a delegatow hłowneje zhromadźizny Domowiny 22. apryla wotpokazała namjet ,Konsekwentne prócowanje wo kubłansku awtonomiju serbskeho ludu‘, kotryž je čłon Domowiny Sieghard Kozel zapodał. Namjet je so krótkodobnje do diskusije dał. Na kóncu tuteje je zapodar swój namjet cofnył a připowědźił, tutón kwalifikować.“
Raz diskusije bě naležnosći mało přichileny. Zo by sej na to wotpokazanje na zakładźe wothłosowanja zalutował, je zapodawar namjet diplomatisce cofnył. Kónčny wuslědk samsny wostanje, dokelž njebu za kwalifikaciju podłožka termin znowazapodaća dojednany. SN