China za dobre styki k Němskej
Zwjazkowy kancler Olaf Scholz pola chinskeho statneho šefa w Pekingu
Peking (dpa/SN). Chinski statny prezident Xi Jinping je zwjazkoweho kanclera Olafa Scholza (SPD) na rozmołwu přijał. W domje, w kotrymž statnych hosći witaja, potwjerdźi chinski statny a knježerstwowy šef trěbnosć wuskeho zhromadneho dźěła wobeju krajow. „Zhromadnje móžemy swětej wjace stability a wěstoty spožčić“, rjekny Xi po oficialnym přełožku. „Dołhož dodźeržimy zasady mjezsobneho respekta, pytanja za zhromadnosćemi najebać diferency a mjezsobneho wuknjenja, móža so bilateralne poćahi stabilnje wuwiwać.“ Xi měnješe, zo je so „nowa doba turbulencow a změnow“ zahajiła, w kotrejž strachi za čłowjestwo přiběraja. „Zo bychmy tute prašnje rozrisali, je trjeba, zo so mjez wulkomocami swěta kooperacija přesadźi. W tutym zmysle je zhromadne dźěło wulkeho ludoweho hospodarstwow Chiny a Němskeje wažne. Tole „njezměje jenož na euraziskim kontinenće, ale po wšěm swěće swoje wuskutki“.
Porjedźenka
To a tamne (16.04.24)
Njewšědneho hrajerja – z kožuchom a štyrjomi nohami – pytaja w dźiwadle w badensko-württembergskim Ulmje. Za operu „Lessons in Love and Violence“ ma pos na jewišću stać, dwójce 15 mjeńšin w kóždym předstajenju. Činić ničo njetrjeba. Jeho nadawk je, měrnje pódla spěwarki stać. Dźesać předstajenjow w juniju a juliju tuchwilu planuja. Při prěnim castingu su třo wobsedźerjo swojeho psa předstajili, intendantej, sopranistce a zastupjerjej weterinarneho zarjada, kiž ma wustupej psa přizwolić. Kriterije zarjada su krute: Psyk ma dorosćeny, strowy a sebjewědomy być. Dźiwadłowy stres za jewišćom njeměł jeho mylić.
„Swědomje a zamołwitosć“
Bywši zwjazkowy prezident Joachim Gauck minjeny pjatk w Budyšinje
Budyšin (SN/bn). „Strach njeměli ignorować. Přiwšěm njeměł nam ze směrnicu być. Stworićel je nam mjenujcy dalšej daraj darił: swědomje a zamołwitosć.“ Z tymle słowami zakónči bywši zwjazkowy prezident Joachim Gauck minjeny pjatk 15. Budysku narěč w po dwěmaj třećinomaj wobsadźenej cyrkwi swj. Pětra, wotmołwiwši na prašenje z publikuma, „hač buchu woprawdźe wšitke móžnosće wučerpane, dalšej wojerskej eskalaciji w Ukrainje zadźěwać“.
Studenća w ekumenje
Jerusalem (B/SN) Hižo 50 lět su katolscy a ewangelscy studenća teologije hromadźe w Swjatym kraju žiwi. Z ekumeniskej Božej słužbu su 50lětnu tradiciju wukubłanja w Jerusalemje na horje Cion woswjećili. K zahajenju swjatočnosćow zetka so 1 200 nětčišich a něhdyšich studentow w cyrkwi abtownje Dormitio.
Přisłušnicy koptow
Düsseldorf (B/SN). Koptisko-ortodoksna cyrkej Aleksandrije je staroorientaliska cyrkej Egyptowskeje. Hač do jědnaće milionow ludźi so k njej wuznawa. Wot lěta 2012 je hłowa cyrkwje bamž Tawadros II. Załožena na podaća japoštoła Marka w lětach 50 do 60 po Chrystusu słuša wona k najstaršim křesćanskim cyrkwjam. Po koncilu w Chalzedonje w lěće 451 běštej so koptiska a křesćanska cyrkej dźěliłoj. W Němskej stej dwaj koptiskej klóštraj, a koptiskej cyrkwi přisłuša 20 000 wěriwych.
Za bratrowstwo a dojednanje
Hamas ze swójskim namjetom
Tel Aviv (dpa/SN). Při jednanjach w Gazaskej wójnje je islamistiska Hamas swójski napřećiwny namjet nastupajo zastajencow předpołožiła. Tón předwidźi po 42 dnjow trajacym přiměrje pušćenje israelskich zastajencow a runočasne pušćenje palestinskich jatych. Nimo toho ma Israel swoje wójsko poněčim z Gazaskeho pasma cofnyć. Dotalny namjet, po kotrymž měli 40 zastajencow za 900 palestinskich jatych hižo za čas přiměra pušćić, Hamas wotpokazuje.
Trump před sudnistwom
New York (dpa/SN). Z Donaldom Trumpom sedźi wot dźensnišeho prěni króć bywši prezident USA w chłostanskim procesu jako wobskorženy před sudnistwom. W jednanju su jeho w zwisku z płaćenjom pjenjez mjelčenja hrajerce pornofilmow wobskoržili. Dźensa chcyše sudnistwo spřisahanych wuzwolić. Prawiznicy Trumpa, kotryž chce w nowembru znowa k prezidentskim wólbam nastupić, su hač do poslednjeho wokomika spytali, procesej tola hišće zadźěwać.
Scholz w Shanghaiju
Wotehnaće liberalizować
Sakska: Lěwica ma kandidatow
UNO warnuje před eskalaciju
Tel Aviv/New York (dpa/SN). Po njesłyšanym nadpadźe Irana na Israel wobstawa židowski stat na swojim prawje na wojersku reakciju. Iran je „čerwjenu smuhu“ překročił“, rjekny israelski zastupnik pola UNO Gilad Erdan w New Yorku. Tuž ma Israel nětko prawo so wjećić. Rozsudźili wo tym pak w israelskim wójnskim kabineće hišće njejsu. Generalny sekretar UNO Antonio Guterres namołwja wšitkich wobdźělenych doraznje k wotputanju. „Bliski wuchod steji na kromje katastrofy. Ludźom hrozy wulka wójna.“
Statni a knježerstwowi šefojo sydom wodźacych industrijnych krajow swěta su w zhromadnej deklaraciji iranski wulkonadpad raznje zasudźili a swoju solidaritu z Israelom wobkrućili. Iranej wumjetuja, zo chcył region destabilizować a eskalaciju konflikta prowokować.
Iran bě w nocy na njedźelu prěni króć w stawiznach islamskeje republiki swojeho najwjetšeho njepřećela direktnje nadběhował. Israelska armeja rozprawja wo něhdźe 300 raketach a trutach, kotrež pak su nimale wšitke wottřělili.
To a tamne (15.04.24)
Wopita šoferka bjez jězbneje dowolnosće je so při wobchadnym njezbožu w vogtlandskim wokrjesu ćežko zraniła. 41lětna bě w Reichenbachu z 1,7 promilemi alkohola w kreji po puću. W křiwicy zhubi wona kontrolu a prasny do laterny a wobchadnych taflow. Skónčnje wosta wona mjez štomami tčacy. Zastojnicy zwěsćichu, zo šoferka hižo dlěši časa žanu jězbnu dowolnosć wjace nima.
Z wosebje wjele błyskačemi chce policija šoferow tutón tydźeń na problem smalenja skedźbnić. Tak mjenowany Speedweek přewjedu tež w druhich europskich krajach. W Němskeje wobdźěli pak so jenož pjeć zwjazkowych krajow na marathonje błyskačow. Sakska je wotprajiła a Braniborska chce so jenož na wjeršku akcije, přichodny pjatk, wobdźělić. Kritikarjo pokazuja na nadměrnje wulku prócu a na poměrnje snadny wužitk akcije.
