Politiske strony skorža na namóc w přihotach komunalnych wólbow

Lipsk/Podstupim (dpa/SN). Při wupowěsnjenju wólbnych plakatow w Sakskej a Braniborskej su minjeny kónc tydźenja wjacorych ludźi nadběhowali. Kaž policija zdźěli, je w Sakskej dotal njeznaty muž 37lětnemu čłonej Zelenych rěbl wutorhnył a z nim plakat wobškodźił. 37lětny so při tym snadnje zrani a je pad policiji přizjewił. Njedaloko Šwikawy nadběhowaše dotal njeznaty w nocy na sobotu dweju pomocnikow, kotrajž njedaloko Stadiona zapadneje Sakskeje plakaty Zelenych připrawištaj. Po werbalnym rozestajenju wuwjercholi zwada w namócnosćach. Njeznaty hrabny sej wjacore plakaty a so zminy.

W Lipsku bu 25lětny w nocy na njedźelu atakowany, jako plakaty strony Volt přiwjazowaše. Po informacijach policije bě njeznaty spočatnje wjacore politiske strony hanił a so na to do pomocnika dał. Při rozestajenju biješe njeznaty 25lětnemu pomocnikej z pjasću do mjezwoča. Policija je přepytowanja ranjenje ćěła dla zahajiła.

Nawjazujo na rozmyslowanje w pjatkownym wudaću SN mamy nětko dobry přikład za to, zo hodźa so spěchowanske srědki wužiwać, bjez toho zo dyrbja akterojo swójske pjenjezy přidać. Zarjadniski zwjazk Při Klóšterskej wodźe je dóstał 200 000 eurow za nowy digitalny a multimedialny informaciski a wodźenski system po klóštrje Marijinej hwězdźe a wokolnych gmejnach. Pjenjezy pochadźeja za zamóženstwa stronow a masowych organizacijow bywšeje NDR. Poprawom je tež tele spěchowanje na swójske srědki wjazane. W tym padźe je so poradźiło, zo so projekt stoprocentnje spěchuje. Hewak drje by předewzaće zwrěšćiło. Přetož sobustawske gmejny zwjazka bychu wotpokazali, swójske pjenjezy zasadźeć, kotrež wone scyła nimaja. Tuž móža nětko zajimawy a zawěsće tež napjaty projekt zwoprawdźić, kiž budźe atraktiwnosć klóštra a gmejnow zwyšić. Tajkeho spěchowanja bjez swójskich srědkow móhło runjež wjace być. Marian Wjeńka

Hoberski nawal dźěći dožiwili su minjeny tydźeń w Drježdźanskej uniwersitnej chorowni Carl Gustav Carus. Přičina njebě žołma nazymnjenja abo gripy, ale mjeztym 20. pokročowanje woblubowaneje serije „Teddyjoweje chorownje“. Dźěći móžachu na hrajkace wašnje dožiwić, što lěkar w padźe chorosće čini, a studenća mediciny běchu wužadani, dźěćom medicinisce komplikowane naležnosće z jednorymi słowami rozłožić. Lětsa přińdźe wjace hač tysac dźěći ze 60 Drježdźanskich pěstowarnjow ze swojimi klankami a barikami k lěkarjej. 150 studowacych je małych lubuškow dźěći wažiło, přepytowało abo přeswětlowało. Foto: Jürgen Männel

Fanojo Jana Feddera – woblubowaneho lěta 2019 zemrěteho Hamburgskeho filmoweho hrajerja – maja přichodne dny składnosć, něšto ze zawostajenstwa policajskeho komisara na přesadźowanju kupić. Wudowa Marion Fedder poskićuje na internetnej awkciji mjez druhim oldtimer, motorske, tačelak a elektriske ­nastroje. Fedder bě jako zběrar starych wěcow znaty. Mercedes pochadźa z lěta 1960, Moto Guzzi z lěta 1978.

Z 212 km/h po puću był je šofer wosoboweho awta sobotu na awtodróze A 10 na Třiróžku Habolskeho kraja sewjero-zapadnje Berlina. Dowolene je tam 120 km/h. Policija z toho wuchadźe, zo jědźeše šofer wotpohladanje přespěšnje, dokelž dźeržeše sej ruku před mjezwočo. Pomhać pak jemu tole ničo njebudźe.