Aus der aktuellen Ausgabe vom Freitag, 24 März 2017

Pjekarnju rozšěrja

Pančicy-Kukow. Swoju pjekarnju chce klóšter Marijina hwězda w Pančicach-Kukowje rozšěrić a pódla njeje kofejownju zaměstnić. Wo tym informowachu wčera gmejnsku radu Pančicy-Kukow, kotraž je projektej přihłosowała. Nowe twarjenje za kofejownju trěbne njebudźe, dokelž dotalne rumnosće jenož hinak wužiwaja. W kofejowni budu tež wopytowarjow klóšterskeje zahrody zastarać móc.

Serb w krajnej kubłanskej radźe

Drježdźany. Mjez 33 zastupjerjemi wčera skonstituowaneje krajneje kubłanskeje rady Sakskeje je tež Serb. Nawoda Serbskeho gymnazija Budyšin René Wjacławk zastupuje tam Serbske šulske towarstwo, kaž wobkrući Marlies Młynkowa. Rozjimać chcył Ralbičan w aktualnej dobje kubłanskeje rady předewšěm temy nastupajo wučerski dorost a nowy šulski zakoń.

Merkel přijědźe na zaryw

Premjera hry „Raketa“ z elewku Annu Zacharijasojc

Budyšin (MěCu/SN). Po maćiznje aktualnu a cyle nowu hru je premjerny publikum wčera wječor w derje pjelnjenej žurli Budyskeho Dźiwadła na hrodźe dožiwił. Hakle tydźenja měješe hra „Raketa“ w Durinskim Krajnym dźiwadle Rudolstadt swoju němsku prapremjeru. W Nižozemskej rodźeny awtor Enver Husičić předstaji w njej dóńt młodostneju Mir­thy a Saifa.

W srjedźišću steji tema ćěkańca. Saif je zhromadnje z maćerju ze swojeho kraja wójny dla ćeknył. Na šuli w Němskej ze­zna wón holcu Mirthe. Tež wona dyrbješe z maćerju ćeknyć: do škitneho domu za žony, dokelž njejstej doma namóc a surowosće nana hižo wudźeržałoj. Mir­the a Saif pytataj za sebje škit a měr. Kaž błysk překwapi wobeju lubosć, kotraž jimaj nadźiju do zhromadneho a lěpšeho žiwjenja da. Tola Saif dyrbi nowu domiznu znowa wopušćić, štož jeho dospołnje porazy a puć do přichoda znjemóžni.

Marian Wjeńka

Žane 300 metrow wot so zdalenej stej we Worklecach twarjeni, kotrejuž najnowše stawizny njemóhli rozdźělniše być. Wobě takrjec symbolizujetej, kak móžetej swětło a sćin – tak rozdźělnej kaž stej – wusko porno sebi eksistować.

Po dźesać měsacach twarskeho časa chcedźa jutře Worklečansku sportownju po wobšěrnym ponowjenju za šulski a towarstwowy sport kaž tež za zjawne zarjadowanja přepodać. Runja gmejnskim radźićelam na jich zašłym posedźenju běch tón wječor tež ja zahorjeny, kak je­ so ćěłozwučowarnja, pochadźaca z přewrótoweho časa, na dobro změniła. Štóž změje w njej přichodnje šulski sport abo tam volleyball abo blidotenis hraje abo so z hinašej družinu sporta zaběra, móže dźakowny być, zo je gmejna tónle projekt derje dokónčiła.

Wšitkim na dźěle Domowiny zajimowanym skići třěšny zwjazk serbskich towarstwow přidatny serwis. Jutřiša 18. hłowna a wólbna zhromadźizna budźe přez livestream wusyłana.

Podstupim (SN/at). Njewšědne dožiwjenje mějachu wčera čłonojo wuběrka za kubłanje, młodźinu a sport Krajneho sejma Braniborskeje. Něhdźe 20 dźěći z Kśišowa, Žylowa a z Delnjoserbskeho gymnazija Choćebuz, zdźěla w narodnej drasće, je ze swojimi staršimi do Podstu­pima přijěło, zo bychu kubłanskim politikarjam kraja wuwědomili, kak wažne je wučbu serbšćiny a Witaj-wučbu znajmjeńša w dotalnej formje zachować a wšitko za to činić, zo móže kóždy, kiž to chce, delnjoserbšćinu wuknyć.

Berlin (dpa/K/SN). Němska kanclerka Angela Merkel (CDU) je dźensa prezidenta Palestinjanow Mahmuda Abbasa přijała. Zetkanje z nim ma tomu słužić, měrowy proces na Bliskim wuchodźe zaso wožiwić. Abbas sej přeje, zo by Němska aktiwnišo hrała swoju rólu posrědkowarki. Rěčo wčera wječor w Załožbje Konrada Adenauera wón praji, zo Israel z njepřestajnym twarjenjom sydlišćow w Kraju zapadnje Jordana faktisce rozrisanje dweju statow nochce.

Zwjazkowy sejm za mawt

Berlin (dpa/SN). Zawjedźenje mawty za awta na němskich awtodróhach a zwjazkowych dróhach je dale a prawdźepo­dobniše. Po lěta trajacej rozkorje je zwjazkowy sejm dźensa změny w zakonju wobzamknył. Hłownje dźěše tu wo kompromis EU, kotraž kritizowaše tarify za šoferow awtow z wukraja. Sakska frakcija­ Zelenych so zawjedźenju mawty spřećiwja, a to negatiwnych sćěhow w namjeznych regionach dla.

Wosebita žarowanska situacija

Prěnju hornjoserbsku knihu – katechizm Wjacława Warichiusa z lěta­ 1595 – je Michael­ Stoll z firmy za wuměłski transport Hasenkamp dźensa z Zwickauskeje Radneje šulskeje biblioteki do Budyskeho Serbskeho muzeja přiwjezł a restawratorej Janej Bartej přepodał. Wot njedźele móžeš sej Warichiusowy katechizm we wustajeńcy „Pjeć lětstotkow­ – Serbja a reformacija“ wobhladać. Foto: SN/Maćij Bulank

London/Berlin (dpa/K/SN). Smjertnych woporow teroroweho atentata w Londonje je mjeztym pjeć. Wčera wječor zemrě na sćěhi swojich ćežkich z zranjenjow 75lětny muž. Teroristiska milica Islamski stat nětko wudawa, zo bu atentat w jeje nadawku skućeny. Skućićel je sćěhował namołwy, nadpadować ludźi w statach mjezynarodneje koalicije. Tej pod wjednistwom USA přisłušeja mjez druhimi Wulka Britaniska, Francoska a Němska. Dźeń po Londonskim njeskutku je policija w belgiskim měsće Antwerpenje prawdźepodobnje dalšemu atentatej toho razu zadźěwała. W Berlinje su Braniborske wrota w barbach britiskeje chorhoje wobswětlene, z čimž ma so zwuraznjeć solidarnosć z woporami, kotrež je sej atentat w Londonje žadał.

Hrajkowa pistola w šuli je wčera wulke zasadźenje policije zawiniła. Wjacore dźesatki zastojnikow, tež z wosebitych jednotkow, so wobdźělichu. Swědka bě policiju informowała, dokelž bě widźała, kak wosoba z pistolu do šule w bayerskim Gunzenhausenje dźe. Šulske nawodnistwo bu informowane a wšitcy dyrbjachu twarjenje wopušić. Při přepytanju šule napadny zastojnikam 15lětny hólc, kotrehož zajachu. Kaž so wukopa, měješe wón hrajkowu pistolu při sebi. Za čo ju trjebaše ze zdźělenki njewuchadźa.

Podchłódźeneho nukla je policija w delnjosakskim Stadthagenje wuchowała. Zastojnicy wuhladachu skoćatko w nocy na puću. Dokelž wone po wšěm zdaću chětro zymu mrěješe, sadźichu je na motorowu hawbu, hdźež móžeše so zhrěć. Nukl wostanje nětko w zwěrjatowni, doniž so jeho wobsedźer njepřizjewi.

Drježdźany (dpa/K/SN). Islamistiscy wohrožowarjo dyrbja tež w Sakskej z tym ličić, zo budu wotsunjeni. Nutřkowny minister Markus Ulbig (CDU) wita, zo je Zwjazkowe zarjadniske sudnistwo wotpowědne postajenje Nižosakskeje wobkrućiło. „Ručež so wobsaha noweho wobzamknjenja sudnistwa dokładnje dowěmy, rozsudźimy wo konsekwencach“, Markus Ulbig rjekny. Po jeho sudźenju je w swobodnym staće mjenje hač dźesać wohrožowarjow. W cyłej zwjazkowej republice wučinja jich ličba něhdźe 550. Loni bě Sakska 3 377 požadarjow azyla zaso domoj pósłała.