Rubježnikow lepili
Budyšin. Rubježniske padustwo je so zawčerawšim w Budyskej Strowotnej studni stało. W kupnicy swědk wobkedźbowaše, kak žona a muž drastu a kosmetiku do nachribjetnika tykataj. Po tym zo staj bjez zapłaćenja nimo kasy šłoj, jeju 30lětny narěča. Na to hrožeše cuzy jemu ze sykawu a zhubi so ze žonu do hłubokogaraže, hdźež šofer z awtom na njeju čakaše. Mjeztym alarmowana policija zadźerža awto bórze na to na Nowosólskej dróze a namaka w nim rubiznu, sykawu kaž tež nožicy. 62lětny wodźer awta a 26lětny paduch steještaj pod wliwom drogow. Jeju kaž tež žonu zastojnicy zajachu. Kriminalna policija so z padom nětko bliže zaběra.