To a tamne (22.06.16)
Chětro dołho je kołp wobchad na hłownej dróze w Ludwigshafenje haćił. Wodźerjo awtow přizjewichu policiji, zo wosrjedź puća kołp steji. Zastojnicy pak njezamóchu jeho z dróhi wabić. Tež šćowkacy pos w słužbnym awće ptaka ani kuska njemyleše. Samo pospyt wobydlerja, kołpja z pomocu chlěba z jězdnje wabić, so njezešlachći. Hakle přiwołani wuchowarjo zwěrjatow móžachu kołpja po něhdźe dwěmaj hodźinomaj přeswědčić, zo jich sćěhuje a do bliskeje krajnoškitneje kónčiny čampa.
Irscy fanojo kopańcy móža wjac hač jenož stadionowe spěwy halekać. Zašły kónc tydźenja su woni ćěšenkej w Bordeauxskej tramwajce kolebawku „Twinkle, twinkle, little star, How I wonder what you are!“ zanjesli. Wusnyło pak sej dźěćko přiwšěm njeje. Po wšěm zdaću běchu tola přewótře „psst!“ wołali.
To a tamne (21.06.16)
Dwaj na noze zranjenej baćonaj dóstanjetej hightech-protezy. Jedyn baćon bě sej nohu po wšěm zdaću we wudźenskej šnórje zadźernył, tamny je do milinoweho sćežora zrazył. Kaž jednaćel baćonjaceho dwora w saksko-anhaltskim Loburgu Michael Klaatz zdźěli, móhłoj protezy z titana abo z pomocu 3D-ćišćaka zhotowjenej być. Potom móhli jej na přikład z magnetom baćonjomaj zasadźić. Najručišo chcedźa so fachowcy za doskónčnu wariantu rozsudźić, zo bychu wbohimaj ptakomaj pomhali.
Koala Oobi-Ooobi z Lipšćanskeho zwěrjenca jako EM-orakel wotstupi. Dwójce bě „njestronski Awstralčan“ wopačny tip za němske koparske mustwo wotedał a bul do wopačnych wrotow kulił. Jako sportowsce fairny přěhračk přewostaji wón oraklowanje radšo druhim a wěnuje so nětko zaso eukalyptusowym łopjenam.
To a tamne (20.06.16)
Z hroženjom, Donalda Trumpa za přichodneho prezidenta USA wolić, je sej prošer w New Yorku tójšto fenkow zasłužił. „Daj mi dolar, abo hłosuju za Trumpa“ steješe na tafličce, kotruž bě muž kónc tydźenja blisko Times Squarea w Manhattanje nastajił. Přeco zaso turisća a pasanća stejo wostawachu a dawachu prošerjej pjenjezy. W interneće poskićeja nětko samo T-shirty z hrónčkom muža.
Nižozemska je swětowy mišter, znajmjeńša dołhe nosy nastupajo. Z 65,9 milimetrow dołhim a 52,52 milimetrow šěrokim nosom, to je suma 118,42 mm, je sej Nižozemjan Hans Roest titul wudobył. Kuriozne wubědźowanje přewjeduja kóžde pjeć lět w bayerskim Reichertshofenje, a towarstwo 1. nosowy klub swěta je iniciěruje. Lokalna matadorka Susanne Kloiber je sej mjez žonami ze 103,55 milimetrami titul zawěsćiła.
To a tamne (17.06.16)
Fatalne misnjenje je so při twarskich dźěłach w Berlinje-Kreuzbergu stało. Jako w nowym twarjenju betonowy wjerch wuliwachu, wjetše mnóstwo jara židkeho betona sćěny pódlanskeho stareho domu předrě a tam wjele škody načini. Dźesać wobydlerjow domu dyrbjachu ewakuować, policija zdźěli. Wohnjowa wobora: „Tajke něšto njejsmy hišće dožiwili.“
Při pospyće, prostitutku wobkradnyć, je muž w Schwerinje z woknom ćeknyć spytał. Při tym so 32lětny ćežko zrani, byrnjež wokno jeno połtřeća metra wysoko nad dnom było. Jeho dyrbjachu do chorownje dowjezć. Po tym zo bě minjenu nóc pola woneje žony był, hrabny sej jeje pjenjezy a spěchaše k durjam. Dokelž žona jeho zadźerža, muž z woknom skoči. Nětko dyrbi so padustwa dla zamołwić.
To a tamne (16.06.16)
70lětny muž w hessenskim Germersheimje je 89lětnu žonu z rolatorom zranił, dokelž njeje ta na jeho začuća reagowała. Z pomocnym nastrojom wón ju wospjet do nohi dyri, přiwołowana policija dźensa zdźěli. Žona bě do toho jemu swoju přichilnosć druhemu mužej wuznała.
Hnydom dwójce při njeskutku lepjeny bu 50lětny šofer wosoboweho awta w Budyskim wokrjesu. Wutoru wječor wón w Halštrowje ze swojim awtom při wuparkowanju do předawanskeje budki zrazy a na to bjez dowolnosće dale jědźeše. Swědcy čisło awta policiji zdźělichu. Tak běchu zastojnicy hrěšnikej spěšnje na pjatomaj. Wopołnocy napadny wobsadce policajskeho awta runje tutón wóz na S 100 pola Błohašec. Při kontroli zastojnicy pytnychu, zo wot muža za alkoholom ćehnješe. Test wunjese 1,66 promilow.
To a tamne (15.06.16)
Stajnje zaso běchu wobydlerjo pokradnjeneje žonjaceje spódnjeje drasty dla skoržili – nětko je policija při přepytowanju bydlenja njewšědnu zběrku wuslědźiła. Wjace hač 150 nadrowcow (BH) měješe 40lětny w swojim bydlenju składowane, připinjene na šatowym powjazu. Sobuwobydlerka bě muža w pincy wjaceswójbneho domu we Werne pola Dortmunda ze schowanej kameru při kradnjenju filmowała a policiju zawołała.
Dwójce tak spěšny kaž dowolene běše smaler w Porynsko-Pfalcy, jako wón ciwilne awto policije přesćahny. Kaž policija zdźěli, bě 29lětny šofer wosoboweho awta na zwjazkowej dróze pola Pirmasensa z 200 km/h po puću. Zastojnicy mějachu w swojim wozydle nastroj k měrjenju spěšnosće a móžachu wšitko dokumentować. Šoferej hrozy 440 eurow pokuty a dwuměsačny zakaz jězdźenja.
To a tamne (14.06.16)
Na awtodróze přizemiło je małolětadło we Wuchodowestfalskej. Jednomotorowa propelerowa mašina měješe techniske problemy. 66lětny pilot so tuž rozsudźi, z nuzy na awtodróze A 2 pola Herzebrock-Clarholza přizemić. Při akciji so křidle mašiny nakładneho awta šmórnyštej a so snadnje wobškodźištej. Na to so lětadło zwjertny a wosta na prawej jězdni stejo. Nichtó so njezrani.
Šok za dźěda! Tón widźeše, kak jeho awto z třilětnym wnučkom za wodźidłom při domje nimo jědźeše. Pjerach bě sej w badensko-württembergskim Hambrückenje awtoklučiki wzał, wóz wotamknył a so za wodźidło stupił. Awto jědźeše na hłownu dróhu a tam do napřećo bližaceho so awta prasny. Při akciji so nichtó njezrani. Wšitcy wuńdźechu ze stróželemi.
To a tamne (13.06.16)
Prěni pasažěrski trut (Drohne) swěta je chinske předewzaće Ehang wuwiło. Nětko chcedźa lětacy nastroj w ameriskej pusćinje Nevada wupruwować, chinske medije rozprawjeja. „Ehang 184“ runa so znatym trutam, je pak wo wjele wjetši a ma kabinu za pasažěra. Tón njetrjeba ani wukubłanje pilota: Po tym zo je zaměr do kompjutera zapodał, doleći mašina dospołnje awtomatisce.
Dokelž je ze swojim synom w chorowni „Rubježnik a žandarm“ hrał, je muž w Pirmasensu zasadźenje wosebiteje jednotki zawinował. 41lětny bě wčera w zachodźe chorownje z pistolu w ruce běhał, kotraž bě na woprawdźitu bróń podobna. Jako muž syna do lifta „wotwjedźe“, zaalarmowachu swědcy policiju. Jako jednotka muža zaja, tón zastojnikam rozłoži, zo je sej z hólcom jeno hrajkał. Hač ma wón nastate kóšty přewzać, hišće njewědźachu.
To a tamne (10.06.16)
Tójšto wotpadkow so tuchwilu na dróhach francoskeje stolicy Parisa kopi – a to na dnju prěnjeje hry europskich koparskich mišterstwow. Dźěłarnistwa ze stawkami a blokadami dźěło wotpadkowych předewzaćow blokuja, zo bychu reformje dźěłowych wikow, kaž ju knježerstwo planuje, zadźěwali. Namołwy zamołwitych města njejsu dotal ničo wuskutkowali.
Kurić je w Kaliforniskej hakle wot 21. žiwjenskeho lěta dowolene. Wotpowědny zakoń, kotryž starobnu hranicu z 18 na 21 lět zběhnje, je wot wčerawšeho w zwjazkowym kraju USA z najwjace wobydlerjemi płaćiwy. Nowy zakoń předwidźi tež čućiwe chłostanja. Wojacy smědźa dale hižo z 18 lětami kurić.
To a tamne (09.06.16)
Na terasy hosćenca hnězdo natwariła je sej kačka w Frankfurće nad Wódru. Mjeztym třeće lěto wona na wulkim kwětkowym horncu hnězdźi, hdźež so po wšěm zdaću wěsćiša čuje hač w bliskim parku. Kačka Agatha njeda so mylić, ani wot wopytowarjow restawranta ani wot rjedźerkow. Jeno přimnyć so njeda. Picu za čas lehnjenja tež wotpokazuje. Loni bě tam dźesać pilatkow wulahnyła.
Wjećba dyrbi być! Tole rjekny sej 24lětna w schwabskim Günzburgu, po tym zo bě ju přećel wopušćił. Z pomocu rezerwoweho klučika wza sej wona awto 30lětneho a je w bliskim jězoru podnuri. Jako muž swoje jězdźidło njenamaka, informowaše policiju a móžeše tež móžnu skućićelku pomjenować. Njetrjebachu tuž dołho pytać. Wohnjowa wobora wućahny awto z jězora.
