To a tamne (17.05.24)
Entertaineraj Joko a Klaas staj swój wusyłanski čas za to wužiwałoj, za EU wabić. Tak rysowaštaj wonaj z pomocu fachowcow, što so stajnje, jelizo so EU rozpušći. Kumštna inteligenca (KI) zwobrazni při akciji zawčerawšim wječor negatiwne wěšćenja, započinajo ze zawrjenymi mjezami a turbulencami na wikach, wo drastiskich stratach dźěłowych městnow, słabym němskim hospodarstwje a dobyću demagogow a nacionalistow, štož by China znjewužiwała.
Zwěrjo na trawniku při kopańcy w USA je přihladowarjow jara zwjeseliło. W běhu prěnjeho połčasa partije w kopańcowej hrě Philadelphia Union přećiwo New York City FC je mjenujcy šup na hrajnišćo běžał. Publikum z mócnym přikleskom reagowaše. Pomocnicy spytachu zwěrjo popadnyć, tola zwěrjo so spočatnje wuwiny. Mjez druhim ze smjećowej tonu šupa po hrajnišću honjachu. Hru dyrbjachu zamołwići krótko přetorhnyć.
To a tamne (16.05.24)
Žadyn rjany wuhlad do přichoda: Ezoteriski telewizijny kanal Astro TV přestanje wusyłać. Sćelak za horoskopy, kładźenje kartow a wěsćenje přichoda 31. decembra zawru, mějićel kanala zdźěla. Zamołwići maja sćelak za „wodźacu telewizijnu platformu ezoteriskeho žiwjenskeho poradźowanja a spirituelnych wobsahow“ a mnohim ludźom orientaciju a podpěru w žiwjenju. Sćelak ze sydłom w Berlinje-Charlottenburgu wusyła wot lěta 2004.
„Jědź z awtom kaž žona“ je titul kampanje, z kotrejž chcedźa francoskich šoferow k wjetšej kedźbliwosći w nadróžnym wobchadźe pohnuć. Na plakatach w francoskej stolicy Parisu zdobom na to skedźbnjeja, zo zawinuja mužojo 84 procentow wšěch smjertnych wobchadnych njezbožow w kraju a zo su w 93 procentach zražkow pod wliwom alkohola wina.
To a tamne (15.05.24)
Dźěłowy tydźeń njedźelu zahajić chcedźa přichodnje w Iranje. Parlament je wotpowědny naćisk zakonja schwalił. Runočasnje tydźenski dźěłowy čas wot 44 na 40 hodźin zniža. Noworjadowanje ma wot kónc junija płaćiwe być. W Iranje je so dźěłowy tydźeń dotal sobotu započał. Pjatk je kaž w druhich muslimskich krajach swobodny. Někotre zawody přizwola swojim přistajenym tež štwórtk jako swobodny dźeń.
Christopher Street Day wotprajili su pjenježnych starosćow dla w braniborskim Wittenberge. Pobrachowace pjenježne srědki a přemało personala je zamołwitych pohnuło, lětušu demonstraciju za prawa homoseksualnych, biseksualnych a intersplažnych ludźi wotprajić. Zarjadowanje CSD měješe so 15. junija mjeztym třeći króć we Wittenberge wotměć. Klětu pak chcedźa swjedźeń zaso přewjesć.
To a tamne (14.05.24)
Cwólba dźesać lět starych paduchow zaběra tuchwilu policiju w Šwicarskej. Hólcam wumjetuja zadobywanje, policija w Schaffhausenje zdźěla. Pječa su so minjenu srjedu do domu zadobyli, w kotrymž měješe skupina hrajerjow swój domicil. Tam wšitko přeborkachu a wšelake wěcy spakosćichu. Do toho běchu wokno z plesternakom rozbili. Škoda wučinja wjacore sta eurow. Přepytowanja je statne rěčnistwo za młodźinu přewzało.
Symjo cannabisa kupiło je sej mjeztym sydom procentow ludźi w Němskej, zo by rostlinki priwatnje plahowało. To je slědźenski institut YouGov zwěsćił. 89 procentow to hišće činiło njeje. Jědnaće procentow pak to hišće planuje. Młodźi ludźi mjez 18 a 34 lětami symjo cannabisa za rostlinki najčasćišo kupuja (14 procentow). Wot 1. apryla smě kóždy doma – nic w zahrodźe – tři rostliny plahować.
To a tamne (13.05.24)
Jiří Korn – rady widźany hósć legendarneje telewizijneje show NDR „Kotoł pisaneho“ hotuje so na swoje 75. narodniny, kotrež woswjeći pjatk, 17. meje. Najebać to steji nadarjeny multitalent dale na jewišću. Hakle w februaru pjelnješe w Čěskej dale woblubowany star w Praze cyłu halu ze swojimi přiwisnikami. Korn jenož njespěwa, ale je tež dźiwadźelnik. Njedawno měješe hłownu rólu w bajkowym filmje a wustupuje prawidłownje w Praskim hudźbnym dźiwadle Karlin.
Plyšowa hrajka je wčera we Wiesbadenje zasadźenje policije zawiniła. Dospołnje rozpjeršeny muž bě 150 centimetrow wulkeho pozdatneho hada na parkowanišću nakupowanišća wuhladał a nuzowe čisło wolił. Zastojnikam skićeše so spočatnje samsny wobraz. Spěšnje pak so wukopa, zo jednaše so wo plyšowu hrajku. „Strašneho hada“ popadnychu.
To a tamne (10.05.24)
Dźěćo je w awće wohnjostroj zapaliło, čehoždla dóńdźe k wohenjej na zwjazkowej awtodróze A8 pola Stuttgarta, policija wčera zdźěli. Na zadnim sedle awta ležachu pryskotawki a bengalosy za narodniny. Kak a što dokładnje bě hólc zawčerawšim zapalił, njemóžachu přepytowarjo hišće zwěsćić. Jako wuchowanske pomocnicy k wohenjej přichadźachu, steješe awto na pódlanskej jězdnej a so hižo paleše. Mać a šěsćlětneho hólčeca dowjezechu pomocnicy do chorownje.
29. mjezynarodne zetkanje Trabantow je Trabbi Buggy klub zawčerawšim na lětanišću w Anklamje zahajiło. Něhdźe 700 wobdźělnikow zarjadowar tam wočakowaše. Za fanow NDRskich kultowych awtow a dalšich nostalgiskich jězdźidłow su hišće hač do zajutřišeje njedźele najwšelakoriše programowe dypki a wubědźowanja předwidźane.
To a tamne (08.05.24)
Bjez wuspěcha je muž w Bayerskej přećiwo cyrkwinskim zwonam skoržił. Ze swojej skóržbu je nětko tež před wyšim krajnym sudnistwom zwrěšćił. Mužej bě prawidłowne biće zwonow mjez 6 a 22 hodź. přewótře. Pruwowarjo pak njemóžachu ničo wopačneho zwěsćić. Nimo toho bě mužej znate, zo steji njedaloko jeho domu 125 lět stara farska cyrkej, sudnicy měnjachu. Muž bě hižo 2022 podarmo přećiwo zwonjenju skoržił.
Wobchadny chaos zawinowali su tři ćeknjene howjada wčera na awtodróze A7 južnje badensko-württembergskeho Ulma. Pomocnicy mějachu swoju lubu nuzu, dwě kruwje a byka zaso popadnyć. Wosebje byk bě chětro roznjemdrjeny. Zatřělić jeho njemóžachu, dokelž bychu tak druhich wohrozyli. Skótny lěkar jeho pohłuši. Awtodróha bě nachwilnje zawrjena. Zwotkel zwěrjata běchu, njewědźa.
To a tamne (07.05.24)
Z prawymi woclanymi putami policista hrał je sydomlětny hólc w poruhrskim Herdecke – bjez klučika. Narunanski klučik njemóžachu na straži wohnjoweje wobory namakać, jako hólca z putami na jednej ruce přiwjezechu. Tež policija njemóžeše pomhać, dokelž so nowe klučiki do starych putow njehodźachu. Z wulkimi klěšćemi wuswobodźichu skónčnje hólca, kiž bě wšitko zmužiće znjesł.
Paducha přesćěhował a skónčnje dosahnył je 67lětny muž zhromadnje z policiju w Lipsku-Paunsdorfje. Muž bě wobkedźbował, kak so paduch přez rozbite wokno do jednoswójbneho domu zadobywa. Paduch ćekny, jako jeho 67lětny narěča. Swědk alarmowaše policiju a podhladneho sam přesćěhowaše. Na zastanišću tramwajki móžeše policija 57lětneho paducha zadźeržeć a zajeć. Tón měješe rubiznu hišće při sebi.
To a tamne (06.05.24)
Rój pčołkow w koparskim stadionje popadnyła je wohnjowa wobora minjenu sobotu w Stuttgarće, dwě hodźinje do zahajenja koparskeje hry přećiwo Bayeram. Insekty běchu so na sćežorje wótřerěčakow zasydlili. We wobchadźenju z pčołkami kubłany wohnjowy wobornik je pčołki w pčołkacym košu popadnył a w lěsu zwonka města wusadźił. Kak bychu pčołki na haru w stadionje a na syły ludźi reagowali, njeje jasne.
Pytajo za rjanymi fotami z přirody je so 81lětny na sewjeru Mecklenburgsko-Předpomorskeje w bahnje zabłudźił a tam tčacy wostał. Z pomocu helikoptera jeho skónčnje wućahnychu. Starc bě předwčerawšim, sobotu, za přećelomaj přirody w bahnje po puću, a bě naraz zhubjeny. Jako jeho nańdźechu, tčeše wón hač k pasej w bahnje. Pomocnicy so k njemu předrěchu a helikopter přiwołachu.
To a tamne (03.05.24)
W dobrym pomjatku ma bamž Franciskus časy, jako bě hišće z ćahom a busom po puću. „Tam běch mjez ludźimi a začuwach jich ćopłotu a jich starosće“, rjekny 87lětny wótc katolskeje cyrkwje měsačnikej italskich železnicarjow. Jako šulski hólčec bě Franciskus wšědnje z ćahom do argentinskeje stolicy Buenos Aires jěł. Dźensa wužiwa wón nimo awta hišće papamobil we Vatikanje a pućuje z lětadłom a helikopterom.
We wólbnym lokalu wotpokazali su wčera bywšeho premierministra Wulkeje Britaniskeje Borisa Johnsona, dokelž njeměješe tón wupokaz sobu. Wotpowědny zakoń bě Johnson swój čas sam přesadźił. Při wčerawšich komunalnych wólbach přińdźe Johnson bjez płaćiweho dokumenta. Sobudźěłaćerjo běchu tuž nuzowani, 59lětneho domoj pósłać. Hač je pozdźišo tola hišće wolił, njeje znate.
