To a tamne (13.05.15)
Žony 50 centow, mužojo darmotnje – tuta zasada płaći wot najnowšeho w někotrych zjawnych toaletowych připrawach w Kölnje. Hłowna přičina je špatna płaćenska moralka muži, kaž město zdźěli. „Ručež dyrbja za wužiwanje nuznika płaćić, stupja so woni k přichodnemu štomej.“ Tole město přiběrajcy poćežuje.
Njewšědnu wurěč měještaj młodaj dundakaj z Čěskeje, jako jeju w Bayerskej lepichu. Zastojnikam w Mitterteichu chcyštaj 12- a 15lětnaj pachołaj napowědać, zo bě jeju njeznaty wopojił a zawlekł. Hakle, jako so z pomocu tołmačerja za nadrobnosćemi prašachu, so wěrnosć wukopa: Wobaj běštaj šulu předundałoj a zadźeržujo awta do Němskeje jěłoj. Stawizničku běštaj sej wumysliłoj, dokelž so chłostanja staršeju boještaj. Taj staj sej wobeju mjeztym w Bayerskej zaso wotewzałoj.
To a tamne (12.05.15)
Dramatisku wuchowansku akciju młodeje kóčki dla su w Düsseldorfje přewjedli. Kóčka bě do dešćikoweje roły padnyła. Po dnjach zasłyša wobsedźer domu žałosćenje z hłubin roły. Ze specialnej minikameru zwěrjo skónčnje zwěsćichu. Na to wohnjowa wobora zahrodu domu wubagrowa, dešćikowu rołu rozrěza a kóčku wućahny. Sprócne zwěrjo dowjezechu do zwěrjaceje kliniki.
Wopačny alarm: Zwickauske krajne sudnistwo su wčera ewakuowali, po tym zo běchu na parkowanišću před domom wosamoćeny aktowy kófer našli. Něhdźe sto přistajenych dyrbješe běrowy a sudniske žurle wopušćić. Dróhu před sudnistwom zaraćichu. Fachowcy wotstronjowanja bojowych srědkow pak w kófrje ničo njenamakachu nimo aktow a pokazki na wobsedźerja: Tón bě drje kófer zabył, jako z awtom wotjědźe.
To a tamne (11.05.15)
Na awtodróhu twochnjena kruwa je wčera njedaloko Bielefelda wobchad haćiła. K wěstoće šoferow dyrbješe policija skoćo zatřělić. Wobchad steješe štyri kilometry do wobeju směrow. Dalše ratarjej ćeknjene kruwy popadnychu w lěsu.
Bydlenski připowěšak hromadźe z wobsedźerjom pokradnyłoj staj paduchaj w Nižozemskej. 29lětny wčera w swojim caravanje dźěłaše, jako wonaj wóz na swoje awto připowěsnyštaj. Wobsedźer zawoła na to policiju a swěćeše z kapsnej lampu do před nim jěduceho awta. Jako paduchaj to pytnyštaj, wonaj nastroj wotpowěsnyštaj a ćeknyštaj. Policija zamó jeju zajeć, dokelž bě sej wobsedźer čisło awta napisał.
To a tamne (08.05.15)
Hanjenje „Wy promowowana rić“ ma přičina hnydomneho wupowědźenja bydlenja być. Tole je Mnichowske hamtske sudnistwo rozsudźiło. Podružnik bě přenajerja bydlenje na tele wašnje ranił. Sudnistwo při swojim wusudźe wobkedźbowaše, zo wobaj mužej w samsnym domje bydlitaj a zo su zetkanja njewobeńdźomne. Nimo toho njebě so podružnik za swoje słowa zamołwił.
Sam z ćahom dale jěł je třilětny hólc njedaloko Freiburga. Nan móžeše na dwórnišću z dalšimaj dźěsćomaj a wozyčkom hišće wulězć. Třilětny pak wosta w ćahu, jako so durje awtomatisce zawrěchu a ćah wotjědźe. Sobujěducy přewostajichu dźěćo lokomotiwnikej. Na přichodnym dwórnišću přepodachu je nanej.
To a tamne (07.05.15)
Z luteje rozpjeršenosće měješe žona w Darmstadtće wudźenku za małeho hada a zawoła policiju. Wuhladała bě wona zwěrjatko w kuchinskim myjadle, po tym zo bě solotej wumyła. Policisća pak móžachu žonu změrować a sadźichu šěsć centimetrow dołhu wudźenku do přirody.
Štyri palety pjeluchow su paduši minjenu nóc z nakładneho awta pola Hannovera pokradnyli. Na parkowanišću při awtodróze A 2 spjacy šofer podhladnych zwukow dla wotući a wuhlada dweju muži, kotrajž z transporterom ćeknyštaj. Kaž so wukopa, běštaj wonaj planu awta rozrězałoj a kartony z pjeluchami w hódnoće 3 500 eurow spakosćiłoj. Hač wědźeštaj, što kradnjetaj, njeje znate.
To a tamne (06.05.15)
Wohrěwace lampy za tři nopawy su w badensko-württembergskim Straubenhardće wulkozasadźenje wohnjoweje wobory zawinili. Přećeženeho milinowoda dla bě so jedyn z kablow lampow w pincy domu zeškrěł a na syno kapał. Nastawaceho kura dla wołaše wobydlerka wohnjowu woboru, kotraž ze 54 ludźimi přijědźe. Mjeztym bě wobsedźer nopawow lampam milinu wotpinył. Jedna z nopawow so snadnje zrani.
Něhdyši zwjazkowy prezident Christian Wulff (55) a jeho mandźelska Bettina (41) bydlitaj zaso hromadźe. Tole zdźěli prawiznik Christiana Wulffa dźensa medijam. Dalše nadrobnosće nochcyše hladajo na priwatnu sferu potrjecheneju mjenować. Do toho bě bulwarny časopis Bunte wo tym rozprawjał. Wulffec mandźelskaj běštaj so lěta 2013 rozešłoj.
To a tamne (05.05.15)
Z wjace hač 3 000 zahrodkowymi palčikami ma drje Sven Berrar w posaarskim Völklingenje dotal jednu z najwjetšich zběrkow tajkich mužikow w Němskej. Po wšěm domje so palčiki z minjenych 125 lět hižo kopja, kaž nowinarjo rozprawjeja. Mjeztym 30lětny chutnje wo tym rozmysluje, přitwarić. Do zahrodki stajić wón małe postawy přiwšěm nochce, dokelž bychu tam kóždemužkuli wjedru wustajene byli.
Paducha-rentnarja z hoberskej lisćinu předchłostanjow je policija w Düsseldorfje zajała. Do toho bě senior z balkona bydlenja skočił a so při tym ćežko zranił. Swoje 70. narodniny minjeny kónc tydźenja dyrbješe tuž ze stražnikami w chorowni jastwa swjećić. Prěnje zasudźenje notoriskeho paducha pochadźa z lěta 1973. Jeničce w Düsseldorfje běchu jeho šěsć króć zasudźili.
To a tamne (04.05.15)
„Lětaca ryba“ je šoferku wosoboweho awta we wuchodnej Łužicy chětro nastróžiła. 73lětna bě wčera rano na zwjazkowej dróze B 115 pola Wuskidźe nakładne awto přesćahnyła, jako něšto wothorjeka na prědnje wokno jeje jězdźidła zrazy a při tym škleńcu rozbi. Přiwołana policija namaka pozdźišo 35 centimetrow wulkeho karpa při dróze, z jasnymi slědami rubježneho ptaka. Tón bě rybu prawdźepodobnje w powětře zhubił, kaž w policajskej rozprawje rěka.
Pinčnicy, kucharjo a nošerjo kófrow su so wčera zaso na Berlinskim Kurfürstendammje wubědźowali. Něhdźe 2 500 ludźi sej swojorazne zarjadowanje wobhlada. Spěšnosć pak njebě wšitko. Kucharjo dyrbjachu při běhanju desert zhotowić, barkeeperojo napoj změšeć. Pažojo nošachu dźesać kilogramow ćežke kófry. Pinčnicy dyrbjachu na 400metrowskej čarje pjelnjene škleńcy balansěrować. Lětuši dobyćer barkeeperow bě hižo loni jako pinčnik wuspěšny, dokelž je w hotelu wjelestronsce wukubłany.
