Rozsud tworić njeje lochko
Koncern Vattenfall budźe ze zajimcami zasadnje jednać dyrbjeć
W Sakskej a Braniborskej wobhospodari energijowy koncern Vattenfall tuchwilu hišće pjeć wuhlowych jamow a tři milinarnje: Janšojce, Čornu Pumpu a Hamor. Dalša milinarnja w Lippendorfje we wokrjesu Lipsk słuša šwedskemu koncernej hromadźe z energijowym koncernom EnBW w Karlsruhe.
Hódnota brunicoweje sparty a jeje płaćizny njejsu hišće jasne. Magnus Hall, šef koncerna, signalizowaše, zo so brunicowe hospodarstwo za Šwedsku wudani. Fachowcy rěča wo cyłkownej hódnoće někak dweju do třoch miliardow eurow. Koncern wjedźe hižo dlěši čas rozmołwy ze wšelakimi zajimcami. To su mjez druhim pólske energijowe předewzaće Polska Grupa Energetyczna (PGE), němski koncern Steag kaž tež čěskej koncernaj České energetické závody (CEZ) a Energetycký a průmyslový holding (EPH), kotremuž słuša srjedźoněmska brunicowa towaršnosć Mibrag. Nětko je so jako zajimča tež šwedska wotnožka wobswětoškitneje organizacije Greenpeace přidružiła.
Kamjenc – stolica lochkich lětadłow
Kamjenc ma so ze swojim lětanišćom wuwić na srjedźišćo předewzaćelskeje syće lětanja z lochkimi lětadłami. Kamjenski lětarski klub ma tole jako wobhospodarjer lětanišća přewodźeć.
Předewzaća z Kamjenca a wokoliny zjednoćeja mnohe lětarske kompetency w swojich rjadach. Wot naćiska a twara lětanišćow přez wukubłanje a logistiku hač k zhotowjenju lětadłow je nimale wšitko zastupjene.
„Što je bliže hač wutworić syć, kotraž inowatiwne projekty zwoprawdźa a synergije při wopyće wikow a w marketingu nastorči“, rozjasni Peter Pfeiffer z Kamjenskeho lětarskeho kluba, kotryž lětanišćo wobhospodarja. Tež pomjenowanje dotal hišće njekruty zwjazk hižo ma: „Saxony light flight system“ (Sakski lochkolětarski system).
Mjez pjatnaće załoženskimi čłonami je tež Budyski lětarski sportowy centrum, kotrehož pomjenowanje zamyla. Towarstwo ma hižo wot lěta 2008 swoje sydło w Kamjencu, byrnjež so w Budyšinje załožiło.
Tójšto wosobinskich datow našli
Böblingen (dpa/SN). Wosobinske fota, stare mejlki, powěsće a lisćiny, z kim sy wšitko telefonował – wšo to su fachowcy za wuchowanje datow namakali, jako sej trjebane datowe nošaki a mobilne telefony wobhladachu, kotrež běchu na předań. Při tym bě kóždy druhi něhdyši wobsedźer woprawdźe spytał wšitke daty zhašeć, zdźěli Kroll Ontrack, jedna z fachowych firmow powěsćerni dpa. Tola tale próca běše njewuspěšna.
Za probu bě firma cyłkownje 122 trjebanych nastrojow pola Amazon, eBay a dalšich poskićowarjow kupiła. Najebać pospytane zhašenje datow přez něhdyšich wužiwarjow zamóchu při 48 procentach wšěch składowanskich platow a při 35 procentach mobilnych telefonow hišće daty nadeńć. Te móhli internetni kriminelni znjewužiwać. W dwěmaj telefonomaj wuslědźichu na zakładźe datow samo mjeno něhdyšeho wobsedźerja.
Spěšna reakcija
Drježdźany (SN). Wšelaku reakciju je powěsć wo zajimje wobswětoškitneje organizacije Greenpeace za brunicowej spartu koncerna Vattenfall wubudźiła. Mjez druhim wranuje sakska FDP před tym, Greenpeace dać šansu, wo łužiskej brunicy rozsudźić. Krajny předsyda sakskeje FDP Holger Zastrow rozjasni: „Předań brunicy na Greenpeace by woznamjenił hospodarski ruin za wšón łužiski brunicowy region. Plan, zawrěć wuhlowe jamy a milinarnje, by tysacy dźěłowych městnow zničił. Te pak su za strukturnje słabu kónčinu trěbne a njedadźa so bjeze wšeho narunać.
Greenpeace je swětoznaty lobbyjowy koncern a ma dosć financnych móžnosćow, tež wulke předewzaća zwoprawdźić. Tohodla měli so wotmysły, brunicowu spartu přewzać, chutnje brać. Dokelž njeje Greenpecae regionalnje zakótwjena, njetrjeba tež na ludźi a struktury na městnje dźiwać. Tak přesadźi organizacija jeničce ideologiske zaměry.“
Wot sakskeho knježerstwa wočakuje Zastrow jasne stejišćo a zo so konsekwentnje za to zasadźa, brunicu dale zmilinjeć a jako surowiznu wužiwać.
Doskónčnje rozsudźi nětko jury
Wojerecy (SN/JK). W sakskej wotnožce Hospodarskeje iniciatiwy Łužica (WiL) předstajichu wčera sydom, za lětuše myto załožerjow eksistency (LEX 2015), namjetowani młodźi předewzaćeljo swoje zawodne koncepty. Wone pochadźeja z najwšelakorišich hospodarskich wobłukow, wot turizma přez modu za ćěšenki hač k wabjenju.
Hač do kónca awgusta běchu 52 wobdźělnikow 24 wobchodowych planow za myto zapodali, kotrež so lětsa 12. raz spožči. Tute su fachowcy posudźowali a sydom finalistow postajili. 15. oktobra namjetowani załožerjo swoje projekty posudźowanskej komisiji předstaja. Tale namjetuje projekty wuznamjenić, pak jako najlěpši předewzaćelski koncept, pak jako najlěpši IT-koncept. Za to steji 10 000 eurow k dispoziciji. Wosebite myto „Najlěpši IT-koncept“ spožči energijowy koncern Vattenfall. Mytować budu dobyćerjow 28. oktobra we wobłuku prěnich wikow IT-syće Braniborskeje a Sakskeje „ZUSEexpo“ we Wojerowskej Łužiskej hali.
Mysle na dobro Łužicy po brunicy
Grodk (SN/JK). Zmilinjenje brunicy so njepřestajnje nachila. Prašenja při tym wostanu, hdy zahaji so trěbna strukturna změna hórniskich rewěrow a wosebje kak. A budźe to do přichoda wusměrjeny skutkowny proces z mnohimi šansami za region a z hospodarskim pozběhom abo njewočakowany a razny strukturny łamk z mnohimi přesłapjenymi.
Wo perspektiwach za Łužicu po času brunicy diskutowachu minjeny pjatk Zeleni wokrjesnych zwjazkow Sakskeje a Braniborskeje w Grodku. Na zetkanju přepruwowachu hišće raz swójske předstawy wo strukturnej změnje z načasnej situaciju. Bytostna powěsć hospodarskeho slědźerja prof. Joachima Ragnitza z IFO instituta bě: Jenož z turizmom a wobnowjomnymi energijemi samymi njemóže Łužica hospodarsce přežiwić. Wona trjeba slědźenske instituty, dodawarjow za awtowu industriju a mašinotwarske předewzaća kaž tež wukonitu chemisku industriju.
Jabłuka, krušwy a kwity wotedać
Prawoćicy (SN/bl). Nazyma je čas jabłukow, krušwow, kwitow a dalšeho sadu. Pola Langec w Prawoćicach budźe toho kóždy kónc tydźenja w oktobrje zaso njesměrnje wjele widźeć.
Rudi Langa přijimuje hižo wot kónca sydomdźesatych lět na swojim statoku jabłuka, krušwy a kwity. Stajnje pjatk popołdnju wot pjećich a sobotu wot wosmich hač do dwanaćich wón hromadźe ze synom a mandźelskej sad waži, kontroluje a jón z pomocu běžateho pasa w kontejneru składuje. Něhdźe štyrceći awtow sej tak kónc tydźenja k Langecom dojědźe a tam hač do štyri tony sadu wotedawa. 95 procentow z toho su jabłuka.
Kwota niska
Konkretne naprawy w jězorinje
Hamor (AK/SN). Zaměrowy zwjazk Łužiska jězorina swój regionalny wuwićowy a jednanski koncept „Łužiska jězorina“ (REK) dale wjedźe. To wobzamknychu wčera radźićeljo zwjazka. „Z konceptom wuprajamy so jako region jasnje za změnu brunicoweho regiona na turistisku kónčinu. Tak swoje zaměry do přichoda kruće zapisamy“, wuzběhny předsyda zaměroweho zwjazka, Budyski krajny rada Michael Harig (CDU).
Jednanski koncept je wusměrjeny na wobłuki hospodarstwo, turizm, zawěsćenje byća, sydlenje a infrastruktura, ratarstwo a přirodoškit. Zwjazk je nastajił 16 jězorowych profilow a 13 profilow zwiskow a kanalow mjez jězorami. Cyłkownje je w koncepće 134 naprawow zakótwjene. „K tomu słuša, při Bjerwałdskim jězoru wuwić gastronomiju, wutwarić přistaw a infrastrukturu. Přeće do přichoda je přistawnišćo“, rjekny Andreas Worbs, nawoda wobłuka wuwiwanje projektow a planowanje města Drježdźan. W nadawku zaměroweho zwjazka je wón regionalny koncept wuwića a jednanja nastajił. Sakske nutřkowne ministerstwo podpěruje jón z 55 000 eurami. Zbytk přida zaměrowy zwjazk jako swójski podźěl.
