Dźěsći kasu pokradnyłoj
Budyšin. Móhłrjec hnydom dwaj policajskej padaj rozjasnić móžachu zastojnicy swjatkownu njedźelu w Budyšinje. Tu krótko po 16 hodź. zdźělichu, zo je něchtó z tak mjenowaneje wjerineje chěžki blisko Sprjewje kasu za pjenježne dary pokradnył. Policajske přepytowanja a wjacore pokiwy z wobydlerstwa wjedźechu skónčnje k dźěsćomaj w starobje dwanaće lět. Jako policisća jeju w měsće wuslědźichu, měještaj hólcaj hišće dźěl pjenjez při sebi. Z tym pak njebě naležnosć wotbyta. Wobaj běštaj z terapeutiskeje bydlenskeje skupiny w Budyšinje twochnyłoj. We wonym zarjadnišću hižo za dźěsćomaj pytachu. Po zakónčenju policajskich naprawow móžachu zastojnicy wobeju hólcow sobudźěłaćerjej zarjadnišća přepodać. Kriminalna słužba Budyskeho policajskeho rewěra so z padom dale zaběra.
Drježdźany. Přichodne Serbske blido w sakskej stolicy wotměje so jutře, srjedu, we 18 hodź. w korčmje „Am Thor“ na Hłownej dróze 35. Z tym nachwataja Serbske blido, kotrež je 17. apryla wupadnyło, dokelž běchu wšitcy na filmowe popołdnjo a bjesadu na Hrodźe Lingnera přeprošeni. Kaž organizator Benedikt Drylich zdźěli, su sej tehdy dorěčeli, Serbske blido na jutřišej srjedźe přewjesć.
Sinfoniski koncert SLA
Budyšin. Serbski ludowy ansambl wuhotuje w kooperaciji z Nowej łužiskej filharmoniju štwórtk po swjatkach, 23. meje, w domje NSLDź sinfoniski koncert. Składnostnje 90. posmjertnych narodnin Jana Pawoła Nagela předstaja jeho „Sinfonija V – Tři modlitwy“. Dale steji „9. sinfonija“ Dimitrija Šostakowiča na programje. Koncert zakónči so z „Klawěrnym koncertom čo. 5“ Ludwiga van Beethovena. Hraje koncertna pianistka Heidemarja Wiesnerec z Berlina.
Za dyrdomdej so přizjewić
9. junija budu nimo wólbow do Europskeho parlamenta tež wólby gmejnskich a měšćanskich radow. Smy so w někotrych gmejnach wobhonili, što su tam w minjenych pjeć lětach docpěli.
Ralbicy (JK/SN). Zastupowacy wjesnjanosta gmejny Ralbicy-Róžant je wot połojcy legislaturneje periody sem Ralbičan René Wjacławk. Po tym zo je Michał Šołta swoje zastojnstwo wotedał, je so nawoda Budyskeho Serbskeho gymnazija za tute wužadace čestnohamtske dźěło rozsudźił. Je to činił, dokelž jemu wosud swojeje gmejny na wutrobje leži. Zo budźe dyrbjeć wjesnjanostu Hubertusa Ryćerja husćišo zastupować, njeje sej spočatnje myslił. Je pak tute časy derje zmištrował, za čož njebě jemu jenož wjesnjanosta, ale cyła gmejnska rada dźakowna.
Róžant (SN/MiR). Róžeńčanska putniska łuka podobnješe so wčera pisanemu přestrjencej. Wjele stow wěriwych bě sej na swjatočnu swjatkownu Božu mšu njedaloko putniskeje cyrkwje do Róžanta dóšło, dalši sej z kolesom a mnozy z awtom dojědźechu. Z wosebitej česćownosću pak witachu wěriwi mjez sobu tych, kotřiž běchu w dźesać procesionach ze swojich wosadow na hnadowne městno dochadźeli. Na čole kročachu nošerjo chorhojow a swjateho křiža, za nimi družki a młodźency, kotřiž wotměnjejo postawy swjateje Marije po dróze, pólnych pućikach a lěsnych šćežkach hač před wołtarnišćo njesechu a tam na přihotowane blida stajichu.
Pólski film počesćeny
Zhorjelc. Film „Tyle co nic“ je hłowne myto 21. Nysoweho filmoweho festiwala dobył, kotrež spožči Sakske statne ministerstwo za wědomosć, kulturu a turizm. Pólski režiser Grzegorz Dębowski přija z rukow statneje ministerki Barbary Klepsch (CDU) njedźelu wječor w Zhorjelcu 10 000 eurow. Jury w kotrejž skutkuja fachowcy z Němskeje, Pólskeje a Čěskeje su mjez dźewjeć filmami rozsudźili.
Myto dr. Madlenje Norbergowej
Podstupim. Lětuše Myto Miny-Witkojc spožči so dr. Madlenje Norbergowej. Społnomócnjeny braniborskeho knježerstwa za naležnosće Serbow Tobias Dünow rjekny, zo je wědomostnica přikład za prócowanje wo zachowanje delnjoserbskeje rěče. Hižo čas žiwjenja angažuje so wona powołansce, priwatnje kaž tež čestnohamtsce w tutym zmysle a to nic jenož w Delnjej Łužicy ale tež za mjezami Braniborskeje.
Zetkanje dźiwadłow zahajene
Radwor (SN/MkWj). Štóž bě sej myslił, zo čłonojo Radworskeje gmejnskeje rady poslednje posedźenje do komunalnych wólbow prosće wotsedźa, tón je so wčera zaličił. Dosć naročna bě naležnosć, kotruž mějachu woleni čłonojo na dnjowym porjedźe: Zarjad za dohladowanje gmejnow bě wuslědźił, zo nježada sej Radworska gmejna staršiski popłatk za přihotowanje snědanje, wobjeda a swačiny w swojich třoch pěstowarnjach, byrnjež tole w pěstowarskim zakoniku takle zakótwjene było. Gmejna płaći po tutym puću 24 000 eurow wob lěto, byrnjež to scyła njetrjebała. Hladajo tež na druhe komuny Budyskeho wokrjesa wo tym diskutowachu, hač žadaja sej wot staršich 70 centow wob dźeń abo scyła ničo. Na blidźe mějachu tež dosć kritiski posudk dohladowanskeho zarjada, kiž gmejnje wobswědči, zo nima dosć dochodow a zo njemóže wěčnje wot swojich nalutowankow žiwa być. Tuž so skónčnje dojednachu, zo napołoža staršim wot awgusta 50 centow přidatnje na dźeń.
Na kóncu měješe wjesnjanostka Madeleine Rynčowa tola hišće składnosć, so radźićelam za dotalne dźěło dźakować.
Chróstawa. W Chróstawskej cyrkwi wotměje so swjatki njedźelu, 19. meje, w 16 hodź. koncert z twórbami Johanna Sebastiana Bacha. Pod nawodom kantora Hansa Christiana Martina hraje Drježdźanski barokowy orchester. Zaspěwatej kurenda a cyrkwinski chór Chróstawa. Zaklinčeć budu tež Silbermannowe pišćele. Wot 15 hodź. je koncertna kofejownja wotewrjena. Zastup je darmotny, wo pjenježny dar so prosy.
Do hwězdarnje
Budyšin. „Wotkryj sej swětnišćo“ – tak rěka dalše wudaće dźěćaceje serije „Što je što junior“ za słuchopisak BOOKii. Ludowe nakładnistwo Domowina a Radworska staršiska iniciatiwa přeprosytej pěstowarske a šulske dźěći kaž tež hobbyjowych hwězdarjow na knižnu premjeru 23. meje w 16.30 hodź. do Budyskeje hwězdarnje. Hwězdar rozkładźe z pomocu teleskopa, kak wosebite hwězdy na njebju nadeńdźeš. Zdobom póńdźe wo styki k astrofyzice.