We wotewrjenych zahrodnistwach maja wulki wuběr
Nowe kromy za kružny wobchad
Wjacore lěta dale zawrjeny
Saněrowanje Hórnikečanskeho jězora traje hač do kónca lětdźesatka
Kulow (AK/SN). Hač do kónca tohole lětdźesatka wostanje Hórnikečanski jězor saněrowanja dla zawrjeny. „W lěće 2028 pruwujemy, hač hodźa so dźěle jězora wužiwać. Saněrowanje tak mjenowaneho suwanskeho kotoła ma wot 2025 hač do 2030 trać“, zdźěli Felix Heinrich ze Sakskeho wyšeho hórnistwoweho zarjada na zašłym posedźenju Kulowskeje měšćanskeje rady. Jeho dobra powěsć bě, zo su sewjerny, juhozapadny a južny wobłuk kompletnje saněrowali. Zdźěla su płót hač k pobrjohej přestajili. Podobnje je na Mučowskim pobrjohu. Tam je prěni dźěl kolesowanskeho kołopuća hotowy.
Policija (24.04.24)
Šofer transportera zemrěł
Brunow. Při ćežkim wobchadnym njezbožu je wčera wječor na S 100 pola Brunowa (Brauna) wodźer transportera zemrěł. Wón bě z wotmachom do štoma zrazył a bu při zražce z awta ćisnjeny. We wobkruhu sto metrow pytachu wobornicy za dźělemi awta a ćěła.
Radźićeljo wuradźuja
Ralbicy. Přichodne zjawne posedźenje gmejnskeje rady Ralbicy-Róžant wotměje so jutře, štwórtk, we 18.30 hodź. w Ralbičanskej starej šuli. Mjez druhim chcedźa radźićeljo hospodarski plan za lěto 2024 wobzamknyć. Dale přepodadźa nadawk za nowotwar chódnika Sernjanskeje dróhi w Róžeńće.
Chrósćicy. Tež Chróšćanska gmejnska rada so jutře k zjawnemu wuradźowanju zetka, a to w 19 hodź. w gmejnskim a kulturnym centrumje „Łužica“. Nimo informacijow wjesnjanosty a naprašowanja radźićelow a ludnosće steji na dnjowym porjedźe wobzamknjenje koncepta za kolesowanske a pućowanske šćežki w krajinje Hornjołužiskeje hole a hatow. Na wobě posedźeni su zajimcy wutrobnje witani.
Namołwjeja k rjedźenju
Wo dróze při skale dale jednaja
Sakski wyši hórnistwowy zarjad je próstwu předewzaća Pro Stein runje tak wotpokazał kaž tu Malešanskeje gmejny. Reakcije na to su přewšo rozdźělne.
Plusnikecy (UM/SN). Wo lěta trajacym rozestajenju mjez předewzaćom Pro Stein a Malešanskej gmejnu wo wutwarje puća wot Plusnikec do Budyšinka je Sakski wyši hórnistwowy zarjad nětko rozsudźił a próstwje wobeju stronow wotpokazał. Pro Stein nima prawo na to, zo so pódlanske postajenja planoweho zwěsćenskeho jednanja, po kotrychž je předewzaće winowate dróhu wutwarić, zběhnu. A Malešanska gmejna nima prawo na to, zo so postajenja zwoprawdźa.
Gmejna chcyše docpěć, zo so zapisane postajenja nětko skónčnje zeskutkownjeja. Pro Stein jako naslědnica zawoda PSW porno tomu widźeše přez postajenja swoje prawa zranjene. Runje tak wobhladowaše to wyši hórnistwowy zarjad, nima pak za trěbne, postajenja zběhnyć. Skerje wuchadźa zarjad z toho, zo ma zawod swójske zajimy puć wutwarić.
W Pančicach-Kukowje steji wot wčerawšeho zaso stacionarny błyskač ...
Krótkopowěsće (24.04.24)
Lětne zeńdźenje zahajili
Lubnjow. Bahne Bahnsen, předsyda dźěłoweho zjednoćenstwa FUEN za naležnosće mjeńšinow bjez maćerneho stata, je dźensa něhdźe 30 wobdźělnikow z 10 krajow na lětne zeńdźenje w Lubnjowje witał. Nimo Alexandera Erberta, přirjadnika we wokrjesu Hornje Błóta/Łužica, je tež předsyda Domowiny Dawid Statnik hosći do Łužicy powitał. Wón podšmórny hódnotu mjezsobneje wuměny mjez europskimi mjeńšinami.
„List z Bórkowow“ w mediatece
Bórkowy. W mediatece ARD je wot wčerawšeho wječora reportaža RBB pod titulom „Der Brandbrief aus Burg“ přistupna. Loni w aprylu staj so wučerjej šule Miny Witkojc z (najprjedy anonymnym) listom medijam prawicarskim podawkam na kubłanišću wobarałoj. Mjeztym staj šulu wopušćiłoj. Reportaža so tomu wěnuje, kak ludnosć w Bórkowach z problematiku wobchadźa.
Wjelki ilegalnje morili
Terapija bolosćow je komplikowany wobłuk mediciny
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (43).
Kóždy z nas ma hdys a hdys bolosće. Hač su to brjušebolenje, hłowybolenje abo njepřijomna ból w chribjeće: bolosće nas mjenje abo bóle trapja a wobćežuja. Spytamy je z ćopłotu abo zymnotu, z pohibom abo wočerstwjenjom wućěrić. Hustohdy wšak so to radźi. Hdyž pak bywaja bolosće sylniše a nas dlěje mjerzaja, zbywaja jenož hišće srědki přećiwo bolosćam. Z tajkimi derje wobchadźeć pak je kumšt. Terapija bolosćow je komplikowany wobłuk mediciny. Wšako mamy dźensa wulke mnóstwo mjenje abo bóle dobrych srědkow k dispoziciji.
