Budyšin. W zwisku z wustajeńcu Muzeja Budyšin z grafikami historiskich napohladow Budyšina w originalu a 3D-technice poskićuja jutře, štwórtk, wot 15 hodź. wosebite interaktiwne wodźenje po přehladce. Za to su wšelake zabawne eksperimenty a inter­aktiwne stacije přihotowali, na kotrychž móža so wopytowarjo pospytać. Mjez druhim su přidatne nastroje, špihele a prismy nastajili. Z nimi móžeš nazhonić, kak mozy čłowjeka z rumnostnymi zaćišćemi wobchadźeja. Wodźenje zmóžnja so hłubšo do tematiki rumnostnych efektow zanurić a dohlad do mnohostronskeho swěta rumnostneho widźenja dóstać. Zastup płaći sydom eurow, potuńšeny dwaj euraj.

Nastaja kandidatow za wólby

Chrósćicy. Swobodne wolerske zjednoćenstwo Chróšćanskeje gmejny přeprošuje wšitkich wobydlerjow jutře, štwórtk, w 19 hodź. do Krawčikec hosćenca. Tam chcedźa wo swojim wólbnym programje diskutować, jón schwalić a kandidatow za wólby do gmejnskeje rady 9. junija nastajić. Zajimcy a zwólniwi za sobudźěło su wutrobnje witani.

Přećeljo wlečakow přewozmu Kobličanski towarstwowy dom

Łaz (AK/SN). Kobličanske towarstwo přećelow wlečakow wobhospodarja přichodnje Kobličanski wjesny towarstwowy dom. Łazowska gmejnska rada je wčera wotnajenske zrěčenje z towarstwom jednohłósnje wobzamknyła. Wone płaći najprjedy štyri lěta a hodźi so po tym podlěšić.

„Chcemy towarstwowy dom na zetkanišćo wšitkich generacijow wuwić“, praji wjesny předstejićer Tilo Babick. Hižo wjacore lěta so přećeljo wlečakow wo wobhospodarjenje domu prócuja. Mjez druhim su někotre rumnosće přetwarili a wonkowne připrawy sporjadkowali. Dale nasta rampa, zo móža tež ludźo z chorobnym stołom a zbrašeni do domu dóńć. Za to je so předewšěm wobydlerka Monika Pakoßnikowa angažowała. Rozsud za wotnajenske zrěčenje Tilo Babick witaše. Po jeho słowach cyła wjes za projektom steji, wón wčera rjekny. Nětko su dalše projekty planowane. Mjez druhim ma nuznik za zbrašenych a staršich ludźi nastać.

Na křižowanišću prasnyło

Zejicy. Jedna zranjena wosoba a tójšto wěcneje škody je wuslědk wobchadneho njezboža póndźelu rano w Zejicach. 39lětna žona bě tam na statnej dróze S 101 ze swojim Opelom z Hornjeho Wujězda přijěła. Na křižowanišću k S 100 wona po wšěm zdaću na hłownej dróze jěducy Škoda tohorunja 39lětneje žony přewidźa a do njeho zrazy. Dokelž bě zražka chětro sylna, suny so Škoda do Mercedesa, kiž na křižowanišću čakaše. Wodźerka Opela so snadnje zrani. Wuchowanske mocy žonu ambulantnje ­zastarachu. Přiwołani wohnjowi wobornicy so wo wuběžany bencin a wolij starachu. Po informacijach policije nasta něhdźe 25 000 eurow škody.