Choćebuz (SN/at). Center witanja maja w Choćebuzu wot minjeneho awgusta. Mjeztym staj so sobudźěłaćerjej wo naležnosće 363 wopytowarkow a wopytowarjow starałoj, kaž město Choćebuz tele dny informowaše. Center chce prěnja adresa być tym, kotřiž su migracije abo ćěkańcy dla do delnjołužiskeho wulkoměsta přišli, dale tym, kotřiž su tu přićahnyli abo so zaso nawróćili. Runje tak poradźuja tam w ramiku „poskitka Euro-Desk“ młodych ludźi wo móžnosćach, so we wobłuku přebywanja we wukraju kubłać. „Dalši stołp budźe w přichodźe powołanske poradźowanje, kotrež agentura za dźěło w centeru poskićuje“, rjekny nawodnica centruma Astrid Schreiber našemu wječornikej. Tam komunikaciju w němskej, arabskej, francoskej, jendźelskej, persiskej, ruskej a ukrainskej rěči zaručeja. „Tež pólsce je móžno“, nawodnica dodawa. W Choćebuzu bydli aktualnje wjace hač 12 500 ludźi, kotřiž němski pas nimaja. Před dźesać lětami bě jich 3 680. Tuž je dosć potrjeby jich podpěrać, zo bychu němčinu nawukli. „Dalša tema je dźěło, jich do tudyšich dźěłowych wikow zapřijeć“, rozłoži Astrid Schreiber.
Židowska kultura w srjedźišću
Kamjenica. „Tacheles“ je titul temoweho lěta za židowsku kulturu w Sakskej. Woswjećić chcedźa je 2026. Z wšelakorymi zarjadowanjemi a akcijemi chce sakske knježerstwo tak na to pokazać, zo je židowska kultura „integralny wobstatk sakskeje kultury“, rjekny sakska kulturna ministerka Barbara Klepsch (CDU).
Yados wulce inwestuje
Wojerecy. Wojerowske techniske předewzaće Yados swoje kapacity rozšěrja a do łužiskeho stejnišća 20 milionow eurow inwestuje. Wčera su tam symboliski prěni zaryw za dwě nowej produkciskej hali woswjećili. Tak produkcisku płoninu podwoja. Ličba sobudźěłaćerjow měła wot tuchwilu 320 na wjace hač 600 přistajenych přiběrać.
Zajimy přirody zapřijeć
Z tutym rjadom přinoškow chcemy wam měsačnje poručić, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.
Poslednje skónčne dny w februaru wabjachu nas zaso dlěje won do přirody a do zahrodki. Słónčko so směješe a ćopliše temperatury lubjachu wjeselo při přihotowanju hrjadkow, parnišćow (Frühbeet) a powyšenych hrjadkow kaž tež při wusywanju a wosadźenju młodych rostlinkow za nadźijomnje bórzomne žně. Přiwšěm měli temperatury dale kruće wobkedźbować. Direktnje do hrjadki wusyć móžemy nětko w měrcu tołstu bunu, spinat, cyblu, ale tež lěćny porej, radisku a morchej. Zo bychmy prawidłowny wotstawk mjez jednotliwymi rynkami dodźerželi, tu mały tip, kotryž móhł při tym pomhać: Na wobě wonkownej a na srjedźny zub hrabjow tyknu so małke prózdne cylindriske drjewčka a hižo mam hrjebičkowak (Rillenzieher), z kotrymž sej rjane rune rynčki sćaham. Tež zela kaž pětršilku, lompuch (Sauerampfer) abo cyblink (Schnittlauch) móžu nětko hižo wusyć.
Spěšnosć kontrolowali
Lěskej/Delni Wujězd. Wutoru kontrolowachu zastojnicy na zwjazkowej dróze 156 mjez Lěskej a Delnim Wujězdom, hač so šoferojo na maksimalnje dowolenych 70 km/h dźerža. W běhu šěsć hodźinow bě 940 awtow po puću. 47 z nich njebě so na wobmjezowanje spěšnosće dźeržało. Na 22 wodźerjow čaka nětko porokowy pjenjez na tamnych chłostanski pjenjez. Najspěšniši bě Polak po dróze smalił: Wón chwataše ze 113 km/h na swój cil. Na njeho čaka nětko pokuta we wysokosći 200 eurow a jedyn dypk w registru kmanosće jězdźenja.
Wojerecy. Leaderowy region Łužiska jězorina pyta Waš najrjeńši motiw z regiona. Štóž ma zajim, njech swoje fota cyle jednorje zhromadnje z formularom wobdźělenja na mejlowu adresu pósćele. Nadrobniše informacije a formular namakaće na internetowej stronje . 13 dobyćerskich motiwow jury mytuje a we wosebitym kalendrje wozjewi.
Zhromadnje wotpadki zběrać
Pančicy-Kukow. Towarstwo ST Marijina hwězda přeprošuje na akciju hromadźenja wotpadkow. Start je sobotu, 9. měrca, w 9 hodź na sportnišću. Wšitcy čłonojo towarstwa kaž tež wobydlerjo wsy su wutrobnje přeprošeni. Rukajcy a měchi za wotpadki staji přirodna centrala k dispoziciji. Jako dźak smědźa so pomocnicy nad małym přikuskom z grila wjeselić.
Budyšin (SN/mwe). Štóž na trompeće abo pozawnje hraje, štóž je sej piskanje na gitarje, bijadle abo akordeonje nawučił – młody abo stary –, ma w Budyšinje na Kotołskej čisło 16 za to dobru adresu. Je-li lubowany instrument zahorjeneho herca skóncowane, da móža w Löbnerec hudźbnym domje skoro kóždemu pomhać. Jeli nic na městnje, nawjazuja kontakty k druhim twarcam instrumentow.
Zastupiš-li do Löbnerec hudźbneho domu, stupa ći wóń z dźěłarnje metalowych dujerskich instrumentow do nosa, wuhladaš na sćěnje z cedlkami kupcow powěsnjene reparowane akustiske gitary. Na druhej sćěnje wisaja kable za elektriske gitary a wótřerěčaki a dalši sortiment za wšědnu potrjebu keyboardera, bubnarja a gitarista. Haj, pola Löbnerec móžeš sej samo hwižk kupić. Wosebitosć tam wšak je, zo po přeću kupcow trompety a pozawny twarja. Nimo toho poskićeja w hudźbnym domje wobšěrny notowy material, su zwólniwi tež CDje, kaž wonu Chróšćanskich muzikantow na předań do komisije brać a předawaja tohorunja zastupne lisćiki za zarjadowanja w měsće nad Sprjewju a wokolinje wotměwace so koncerty.
Minjenu njedźelu sy, wujědujcy z Bělšec do směra Budestec, na kromje B96 zaso „pisanu“ črjódku ludźi z plakatami a z najwšelakorišimi chorhojemi wuhladał.
Budyšin (SN/MiP). Mjez chorhojemi zmahowachu so mjez druhim serbske a němske, chorhoje Europskeje unije a Ukrainy, kaž tež chorhoje w barbach tučele. Skupina angažowanych zetkawa so hižo wot junija zańdźeneho lěta pod hesłom „#B96 zrunać“ nimale kóždu pjatu njedźelu popołdnju, zo by jasne znamjo přećiwo njedźelnišim zetkanjam reichsbürgerow a dalšich „rozhorjenych staćanow“ podłu B96 stajała. Wona je so potajkim hižo do wulkeho hibanja za wjace demokratije w towaršnosći wot spočatka tutoho lěta sem w přenjesenym a w posłownym zmysle „na puć podała“.