To a tamne (20.12.23)
Wuměnkarski porik w Francoskej čuješe so wot čaporoweho wikowarja chětro zjebany a je na to skoržił. Tak njeznaještej hódnotu afriskeje maski a stej ju jemu za 150 eurow předałoj. Wikowar pak dósta za masku na awkciji 4,2 milionaj eurow. Skóržbu porika, zo měł so kup z lěta 2021 cofnyć, je sudnistwo w južnofrancoskim Alèsu wčera wotpokazało. Tak njeměješe wikowar čapora žanu wosebitu wědu nastupajo wuměłske objekty, sudnistwo rozsudźi.
Nižozemska železnica přewjeduje tuchwilu „tydźeń zhubjeneho plyšoweho zwěrjatka“. W běhu lěta su přistajeni železnicy w ćahach wjele tajkich dobrych přećelow dźěći našli. Fota někotrych zhubjenych a njewotewzatych pleńčatkow nětko wšědnje z małym tekstom w socialnych medijach wozjewjeja, předewzaće předwčerawšim w Utrechće zdźěli.
To a tamne (19.12.23)
Jenož z kupanskim płašćom zdrasćeny spytaše paduch handyja w Hammje policiji wućeknyć. 37lětny přebywaše wčera w sawnje dožiwjenskeje kupjele, byrnjež tuta na tymle dnju jeno žonam přistupna była, policija zdźěli. Sobudźěłaćerjo spytachu podhladneho zadźeržeć, jako zwěsćichu, zo je šmóratko pokradnył. Tón pak skónčnje nahi ćekny a sej po puću kupanski płašć zwoblěka. Za kerkami schowaneho 37lětneho policija lepi.
Po dźesać dnjach pytanja su ludźo na juhu Indiskeje tigra popadnyli, kotryž je bura morił. Něhdźe 13 lět stare zwěrjo su na kofejowej plantaži w distrikće Wayanad našli, medije wozjewichu. Rubježne zwěrjo chcychu nětko do tigroweje stacije dowjezć. Tola wobydlerjo protestowachu přećiwo rozsudej a sej žadachu, zo měł so tiger morić. Woni so boja, zo jeho po něšto času zaso do wokoliny pušća.
To a tamne (18.12.23)
Derje do Chiny dolećałoj staj pandamjedwjedźej Pit a Paule z Berlinskeje coologiskeje zahrody. Po wjace hač dźesać hodźinach stej wobaj nětko w Chengdu w tamnišej staciji za plahowanje pandamjedwjedźow a jich přeslědźenje. Staršej wobeju wostanjetaj w Berlinje. Přećah lěta 2019 rodźeneju dwójnikow bě hižo dlěši čas planowane. Pandemija bě tomu dotal zadźěwała. Mjedwjedźej stej kaž jeju staršej swójstwo Chinskeje republiki.
Na awtodróhowym wotpočnišću zabyli su 73lětnu wčera, njedźelu. Žona bě so minjenu nóc na parkowanišću při A 96 w Bayerskej na nuznik podała. Jako so nawróći, bě awto preč. 67lětny bratr bě na jězbje z Bosniskeje do Šwicarskeje pozastał a njebě pytnył, zo je tež žona wulězła. Tole widźo, so hnydom zawróći. Sobudźěłaćer tankownje bě hižo policiju wołał, „rozpjeršeneje žony bjez kabata“ dla.
To a tamne (15.12.23)
Wjace hač 50 000 zhubjenych wěcow su Berlinske wobchadne zawody lětsa w swojim běrowje namakankow znosyli. To je wo něšto wjace hač loni, jako bě pandemije dla mjenje ludźi w busach a železnicach po puću, zamołwići zdźěleja. Wěcy namakali běchu na dwórnišćach, zastanišćach kaž tež w busach a železnicach. Paleta kurioznych wěcow saha wot protezow nohow, přez twarske mašiny hač k rolatoram a dalšim pomocnym srědkam.
Tež lěto po puknjenju hoberskeho akwarija w jednym z Berlinskich hotelow njejsu přičiny njezboža přeco hišće wujasnjene. Tež sćěhi zapławjenjow na dróhach wosrjedź nutřkowneho města němskeje stolicy su dale widźomne. Hotel je přeco hišće zawrjeny. 16. decembra 2022 bě 16 metrow wysoki hoberski akwarij do tysacow kruchow rozpadnył a něhdźe milion litrow wody so wulało.
To a tamne (14.12.23)
Nuznik město kozaceje hródźe: Zwěrjenc w rudnohórskim Aue je mału kozu nachwilnje w nuzniku zbrašenych zaměstnił, zo by runje narodźene a jenož 800 gramow ćežke zwěrjo nócny zmjerzk přežiwiło. Hladarjo běchu zymu mrějace a chětro słabe młodźo w hródźi namakali. Dokelž běchu wšitke tepjene kwartěry wobsadźene, zaměstnichu mału kozu najprjedy raz w ćopłym nuzniku. Tam so młodźato spěšnje zaso zhraba.
Hodowne štomy z oranžowej barbu popryskali su aktiwisća klimu škitaceje skupiny Poslednja generacija we wjacorych městach Němskeje. W Berlinje měrjachu so wčera na hoberski štom na Lipšćanskim naměsće a na štom před Zwjazkowej radu. Štom před Lipšćanskej Mädlerowej pasažu bě tohorunja potrjecheny. Aktiwisća warnuja před klimowej katastrofu, kotraž hodowneje přestawki njeznaje.
To a tamne (13.12.23)
We wuskej hasce tčacy wostał je šofer ze swojim wulkim nakładnym awtom we wsy w Porynsko-Pfalcy. Nawigaciski nastroj bě jeho do dróhi wodźił, kotraž so za wulke awta scyła njehodźeše. Najebać wołanje a kiwanje wobydlerjow 61lětny dale jědźeše. Při tym wobškodźi třěchi a fasady twarjenjow a wottorha płoty a dešćikowe roły. We wuskej křiwicy bě jězba ke kóncej. Policija trochuje škodu na 45 000 eurow. Přećiwo šoferej přepytuja.
Ze železnej žerdźu je muž na hłownym dwórnišću w Bremenje informaciski centrum železnicy wobškodźił. 63lětny rozbiwaše z dźesać kilogramow ćežkim retlom škleńcy a wobškodźi jězdźenkowej awtomataj. Nichtó so njezrani. Na ludźi so roznjemdrjeny njeměrješe. Pućowacy móžachu mužej žerdź wutorhnyć a jeho zadźeržeć, doniž policija njepřijědźe. Motiw skućićela hišće njeznaja.
To a tamne (12.12.23)
Jenož pohladać chcył je bywši wrotar němskeho narodneho koparskeho mustwa Jens Lehmann pola susoda – z motorowej piłu w ruce. W sudniskim procesu w Starnbergu so wón dźensa zakitowaše, mějo so za wopor njewoprawnjeneho wobwinowanja. Statne rěčnistwo Lehmannej wumjetuje, zo je garažu susoda z motorowej piłu wobškodźił, dokelž ta jemu wuhlad na jězor kažeše. Awtomatiska kamera bě 54lětneho wobkedźbowała. Čehodla je Lehmann kozoł garaže přerězał, wón „wjace njewě“.
Do bydlenskeho domu zrazył je wulki, 32 tonow ćežki měšak betona dźensa rano w Schleswigsko-Holsteinskej. Nakładne awto z wjacorymi wóskami bě do toho z jězdnje w Blomesche zjěło. 29lětny šofer so při njezbožu snadnje zrani. Chětro wobškodźeny dom dyrbja nětko najprjedy raz statisce přepytować.
To a tamne (11.12.23)
Drohotny pjeršćeń w prochsrěbaku namakali su w Pariskim luksusowym hotelu Ritz. Hósć bě drohoćinku w hódnoće 750 000 eurow pjatk při snědani w swojej stwě wotpołožił a za serwisom wołał. Pozdźišo sobudźěłaćerjej wumjetowaše, zo je pjeršćeń pokradnył. Wčera namakachu pjeršćeń z wulkim diamantom 6,5 karatow w měšku prochsrěbaka. Hotel w tym zwisku potwjerdźi, zo za loyalnosć swojich sobudźěłaćerjow rukuje.
Po překwapjacym přetorhnjenju swojeho krajneho zjězda je nalada mjez Berlinskimi Zelenymi napjata. Sobotu bě při wólbach krajneje předsydki jenička kandidatka Tanja Princ trójce přepadnyła a njebě štwórty króć wjace nastupiła. Berlinska politikarka strony Renate Künast, zapósłanča zwjazkoweho sejma, rěči wo „debaklu“. Wona kritizuje wosebje formy mjezsobneho wobchadźenja w stronje.
To a tamne (08.12.23)
Curryjowu kołbasu w spódnich cholowach je muž we wobchodźe w delnjosakskim Obernkirchenje pokradnyć chcył. Detektiw wobchoda bě 50lětneho wobkedźbował, jako tón dwě tyzy hotoweje jědźe z curryjowej kołbasu do spódnjeje drasty tykaše. Paducha narěčachu, jako chcyše wón nimo kasy hić. 50lětny njeměješe dowidźenja a přistajenych wobchoda ranješe. Muž je tam mjeztym derje znaty: Jemu běchu hižo před dlěšim časom zakazali, do wobchoda přińć.
Drogi wuslědźił je policajski psyk na wuměnku w Stuttgarće při wječornym wuchodźowanju. 11lětne zwěrjo bě ze swojej 34lětnej wobsedźerku, cłownej zastojniču, při milinowym kašćiku nimo šoł a naraz zašćowkał. Zastojniča namaka na to wjacore při kašćiku přilěpjene titki z hašišom. Policija drogi sćaza. Štó bě je tam zawostajił, hišće njewědźa.
To a tamne (07.12.23)
Wo swój swětosławny symbol starosća so italske město Bologna. Wěža Garisenda so mjeztym strašnje nachila a je nuznje ponowjenja trěbna. Měšćanosta Matteo Lepore wobydlerjow hižo na to přihotuje, zo móhło saněrowanje 48 metrow wysokeje wěže ze srjedźowěka hač do dźesać lět trać a 20 milionow eurow płaćić. Wěža so hižo 3,20 m nachila. Twarscy fachowcy so boja, zo so Torre della Garisenda sypnje. Naměsto wokoło wěže su hižo w oktobru zawrěli.
Palacy so adwentny wěnc je minjeny nóc w Drježdźanach zasadźenje wohnjoweje wobory zawinił. Wobydlerka hornjeho poschoda wjaceswójbneho domu bě wohnjowu woboru wołała, dokelž so kur po bydlenju a po schodach waleše. Wobornicy woheń zhašachu, bydlenje přewětrichu a žonu zastarachu. Woni namołwjeja, palace so swěčki dohladować.
