To a tamne (17.05.23)
Cyle w znamjenju Trabanta, awta za časa NDR, steji kónc tydźenja w mecklenburgsko-předpomorskim Anklamje nad rěku Peene. Něhdźe 600 wobsedźerjow tajkeho awta z wjacorych europskich krajow je na 28. mjezynarodne zetkanje Trabijow přizjewjenych, zarjadowar zdźěla. Prěnje Trabanty su hižo před dnjemi dojěli. Wot 1957 hač do 1991 běchu w sakskim Zwickauwje něhdźe 3,1 milion Trabantow twarili.
Helena Vondráčková, bywša sławna čěska šlagrowa spěwarka, dyrbi wo swoju rentu wojować. Sudnistwo je nětko na dobro 75lětneje rozsudźiło a nowe wobličenje renty wukazało: Zarjady běchu jej spočatnje 340 eurow měsačneje renty přizwolili, nětko su to na 555 eurow zwyšili. Fanojo ju w komentarach podpěruja: „To je hańba za naš stat“, woni pisaja. Pječa pobrachuja stare mzdowe podłožki.
To a tamne (16.05.23)
Před sudnistwom swoju přećelku wo mandźelstwo prosył je drogowy boss Harry P. w Nižozemskej. Kaž medije rozprawjeja, je přećelka hnydom do toho zwoliła. Najebać to wostanje wobskorženy najprjedy raz w jatbje, wusud wočakuja 13. julija. 33lětny bě šef cwólby, kotraž kumštne drogi we wulkich mnóstwach produkowaše a předawaše. Wotnožki produkcije měješe cwólba tež w Belgiskej a Němskej. Mužej hrozy wjelelětne jastwo.
Na wšě 2,7 tonow kokaina w hódnoće 800 milionow eurow je italska policija mjez bananowymi kistami namakała. Wulke mnóstwo drogow móžachu w přistawje města Gioia Tauro w južnoitalskim regionje Kalabriskej sćazać. Pječa jedna so wo jara čisty kokain. Schowane běchu drogi w chłódźenskich kontejnerach w posyłce 78 tonow bananow z Ecuadora po puću do Armeniskeje.
To a tamne (15.05.23)
Bjez alkohola wotměli su so wčerawše wólby parlamenta w Thailandskej. Wot lěta 2014 płaći w kraju 24 hodźin trajacy zakaz alkohola, wot soboty wječora hač do kónca wólbow njedźelu w 17 hodź. Ludźo měli we wólbnych lokalach strózbi być. Nimo toho kładu w kraju wažnosć na fairne a měrniwe wothłosowanje. Zakaz płaći we wobchodach runje tak kaž w hosćencach a na priwatnych swjedźenjach. Hodźinu po wólbach smědźa po wšěm kraju zaso piwo točić.
Wjacore sćěny do wuhenja wudypali su zatłusnjeneje kóčki dla w Francoskej. Zwěrjo bě so při přeslědźenju noweho bydlenja zhubiło. Po někotrych dnjach susod wobsedźerki mjawčenje kóčki słyšeše. Wohnjowi wobornicy wudypachu w kóždym poschodźe domu dźěru do sćěny: Skónčnje móžachu wosłabjene zwěrjo namakać a wuswobodźić.
To a tamne (12.05.23)
W tyzce za deskowe hry kaž šach abo halma je sej muž na britiskej kupje Isle of Man drogi domoj pósłać dał. Sobudźěłaćerjam pósty wón napadny, jako so stajnje zaso za posyłku prašeše. Jako pakćik skónčnje dóńdźe, jón přeswětlichu a policiju informowachu. Ta namaka pakćiki konopje w hódnoće 2 200 puntow, rjenje jako dar zapakowane. 24lětneho muža zajachu. Sudnistwo zasudźi jeho na pruwowanski čas dwanaće měsacow.
Młodźo běłeje mjedwjedźicy w Hamburgskim zwěrjencu Hagenbeck je holčka. Splah mjeztym 21 tydźenjow stareje mjedwjedźicy móžachu při šćěpjenju wuslědźić, zwěrjenc zdźěla. Młodźo je njesměrnje mobilne, aktiwne a přeslědźa wšitko, štož hladarjo jemu poskićuja, hałuzy, mlóče, bul z picu abo wodu z hadźicy. Wopytowarjo móža mać a młodźo bórze na wobrazowce wobkedźbować.
To a tamne (11.05.23)
Maturitne klawsury šulerjow spalił je wučer před jednym z powołanskich gymnazijow w Parisu. Z akciju protestowaše wučer přećiwo njedostatkam francoskeho kubłanskeho systema. Wón zapali klawsury 63 šulerjow w bowje, nowinarjo rozprawjeja. Wučer kritizuje, zo njemóže ani jedyn ze šulerjow po sydom lětach přeco hišće jendźelsce, štož njezaleži na pobrachowacej woli chowancow, ale na katastrofalnych wučbnych planach zamołwiteho šulskeho zarjada.
Pjany kolesowar je policiju w Sanitzu w Rostockskim wokrjesu prosył, jeho domoj přewodźeć. 53lětny bě po informaciji policije na straži zazwonił, dokelž stajnje zaso z kolesa padaše. Zastojnicy přińdźechu na pomoc a jeho přewodźachu. Test alkohola wunjese 2,5 promilow. Najebać pomocliwosć policije dyrbi muž nětko z chłostanskim jednanjom ličić.
To a tamne (10.05.23)
Pěškow pohnuć, čerwjene ample na nadróžnych přechodach skónčnje respektować, chcedźa w Francoskej. Za to zasadźuja w sydom městach kraja nětko ample ze žołtej přechodnej fazu. Štóž je hišće na dróze, ma ju wopušćić, druzy dyrbja čakać. Zaměr pospyta je, wěstotu pěškow zwyšić a tež šoferow awtow kubłać. Francozojo so wo čerwjene ample wulce njestaraja, ale chcedźa sami rozsudźić, hdy je najlěpši wokomik, dróhu přeprěčić. Loni je 484 pěškow při amplach po zražce z awtom žiwjenje přisadźiło.
Špatnje přiwjazany čołm na třěše awta je w Oranienburgu sewjernje Berlina wobchadne njezbožo a 2 700 eurow škody zawinował. 77lětny šofer bě čołm z ćeńkimi gumijowymi pasami přiwjazał. Wětřika dla je so čołm wottorhnył a prědnje wokno napřećo jěduceho awta přerazył. Třo sobujěducy so zranichu.
To a tamne (09.05.23)
Zhromadnje z konjom do tramwajki zalězł je muž w Stuttgarće. Na wjacorych widejach je widźeć, kak muž z cowboyjowym kłobukom a běłym lacom hač na nastupnišćo přijěcha. Tam wón z konja zalěze a zwěrjo při hłowojcy do tramwajki wjedźeše. Kuriozna scena je so njedźelu rano w Fellbachu sewjernje Stuttgarta wothrawała. Pječa pak je muž z konjom hnydom zaso wulězł, po tym zo běchu ludźo scenu ze šmóratkom nahrawali.
Hobersku słomjanu wutrobu je winicar w Stuttgarće swojimaj dźowkomaj wěnował. Na naddimensionalnej wutrobje stej mjenje Lotte a Ida čitajomnej. Wutroba njeje jenož wuznaće lubosće nana k dźowkomaj w starobje dweju a dźewjeć lět, ale je tež cyle praktiski srědk přećiwo zesuwanju zemje na nahłej skłoninje. Muž produkuje na swojim „Małym kuble“ wot lěta 2020 přirodne wino.
To a tamne (08.05.23)
Z mikrofonom w ruce je rěčnica Judith Rakers dźensa w rańšim magacinje sćelaka ARD powěsće čitała. „Kaž runje słyšu, nimamy žadyn zwuk. Tohodla pokročuju nětko cyle po starym wašnju z tutym mikrofonom“, rjekny 47lětna a čitaše powěsće z wulkej rutinu dale. Přičina defekta bě prózdnja baterija w mini-mikrofonje při jeje šaće, „byrnjež technikarjo baterije do kóždeho wusyłanja wuměnili“.
Delfin w zaliwje rěki Trave w Baltiskim morju je wulka atrakcija a přiwabja syły wobydlerjow a turistow. W srjedźišću steja přewozne łódźe, kotrež delfin „delle“ přewšo rady přewodźe a při nich stajnje zaso z wody skaka. Po słowach rěčnika wodoškitneje policije, delfin łódźe a čołmy lubuje. Tež čołm policije je wón na tute wašnje hižo přewodźał. Prawdźepodobnje je „delle“ rój harjenkow přesćěhował a so tak do zaliwa rěki zabłudźił.
To a tamne (05.05.23)
Zhubjenych pruwowanskich nastawkow francoskeje elitneje uniwersity dla dyrbi něhdźe 4 400 młodych ludźi nastawk hišće raz pisać. Wobalka z nastawkami njeje w sekretariaće uniwersity dóšła, zdźěla uniwersita w Lyonje. Po njewuspěšnym pytanju uniwersity a póšty su so rozsudźili, pruwowanje wospjetować, zo bychu wšitcy samsne šansy měli. Cyłkownje 4 400 młodych ludźi bě so za sto studijnych městnow přizjewiło.
Tigry w „zwěrjencu hacanja“ su zamołwitym w sewjerorynsko-westfalskim Neussu tójšto mjerzanja wunjesli a na kóncu samo sudnistwo zaběrali. Pućowacy coo „Melody“ měješe nimo ponyjow, wóslikow, kozow a kamelow tež wjacore tigry sobu. Rubježne zwěrjata pak njejsu w tym zwisku dowolene, měšćanski zarjad argumentuje. Sudnistwo bě samsneho měnjenja a je hóstnu hru skónčiło.
