To a tamne (07.12.22)
Dokelž běchu swoje rubjenstwo w interneće prezentowali, poradźi so wčera policiji w Pritzwalku, paduchow lepić. Objekt požadosće běše 50 kilogramow ćežka, z pěskom pjelnjena plastika rumpodicha. Fota plastiki w přirodnej wulkosći nadeńdźechu sobudźěłaćerjo města a policije w socialnych syćach a móžachu tak identitu skućićelow zwěsćić.
Takle kancler Olaf Scholz zawěsće zymu njemrěje: Lěwica w Choćebuzu je jemu 70 metrow dołhi šawl napletła! Pisany šawl symbolizuje angažement Lěwicy přećiwo socialnej zymje w towaršnosći, kotruž amplowa koalicija po jeje měnjenju zawinuje. Zapósłanc zwjazkoweho sejma Christian Görke chce šawl w Berlinje kanclerej Scholzej přepodać. Wobstatk akcije su tež dopisnicy ze zdźělenkami wo stupacych finančnych poćežowanjach Choćebužanow.
To a tamne (06.12.22)
To a tamne (05.12.22)
W Lipsku su so wčera prěnje hodowne wiki za psy wotewrěli. Při Cottaskim puću na zapadźe města móža dwu- a štyrinohače woměrje podłu 25 budkow wikowarjow dundać, zdźěli organizatorka Monika Eckstein-Scheffler. W poskitku maja tam samoplećene nowe našijne paski a za toho abo tamneho zbožowneho psa tež probu picy. Horce wino pak tam njepředawaja.
Klětu ma so wosebje błyšćić – znajmjeńša hdyž dźe po firmje w USA. „Viva Magenta“ bu jako definowaca barba přichodneho lěta wuzwolena, zdźěli předewzaće Pantone. Wona „wotbłyšćuje elan a móc“, rěka we wopodstatnjenju. „To je barba, kotraž ma swoje korjenje w přirodźe a nowy signal sylnosće zwuraznja.“ Magenta je „sylna a bjez stracha“ a zdobom wjesołosć a optimizm podpěruje.
To a tamne (02.12.22)
Pacient Ewangelskeje kliniki w Berlinje bu na wopačnej stronje operowany. „Wobžarujemy, zo je w našim domje k zaměnjenju dóšło“, zdźěli wčera rěčnica domu. Tak dyrbješe so muž kónc nowembra zranjenja na lěwej noze dla operować. Tola lěkarjo su strowu prawu nohu „lěkowali“. Poprawom je wěstotnych naprawow, zo by so tajkim zmylkam zadźěwało. Tola tón króć je so wšitko nimo kuliło. Pacient dósta nětko financielne wotškódnjenje.
Kolesowarja z warnowanskim lacom je šofer na zwjazkowej awtodróze A4 pola Kamjenicy w nocy na štwórtk wuhladał a policiju zawołał. Zastojnicy su kolesowarja skónčnje zadźerželi. Kaž so wukopa měješe panu z awtom. Šmóratko, z kotrymž móhł wo pomoc prosyć, žane njeměješe, ale na zbožo koleso. Nětko ma wón wězo z chłostanskim pjenjezom ličić.
To a tamne (01.12.22)
Wabjenski film w Tirolu wujewja diskusiju. Tak zastupi w filmje z alpskich nałožkow znata tradicionalna figura do korčmy a skaza sej šalku macchiato z wowsnym mlokom. Slogan wabjenja rěka: „W Tirolu je kóždy witany.“ Najwyši zastupjer tirolskich burow nětko kritizuje, zo nimaja zamołwići filma respekt za tradicionalnu alpinsku produkciju kruwjaceho mloka jako zakładny kamjeń turizma.
Indiske wójsko chce z psami a ptačkami přećiwo trutam njepřećelow na sewjernej hranicy kraja postupować. Zwěrjata su trenowali, rozprawješe wčera nowina „India Today“. Psy słyša truty a přisłušnikow wójska alarměruja. Potom startuja milany, kotrež lětanske nastroje w běhu někotrych mjeńšin namakaja. Pazoraki maja kameru na hłowje a móža tak lět trutow wobkedźbować.
To a tamne (30.11.22)
Němska je na fanowym turněrje na „Němskej mjezynarodnej šuli Doha“ z dobyćom 1:0 přećiwo Costa Rice třeće městno wobsadźiła. Přiwisnicy ze šěsć krajow wobdźělichu so minjenu sobotu na zarjadowanju kluba narodnych mustwow w Doha. Z dobyćerjom turněra sta so Jendźelska. Na turněrje wobdźělichu so fanojo kopańcy z Jendźelskeje, Waliziskeje, Costa Rica, Japanskeje, Nižozemskeje kaž tež Němskeje.
Španiski narodny trenar Luis Enrique je přeradźił, što jeho hrajerjo płaća, jeli interne směrnicy teama njedodźerža. „Štóž přepozdźe přińdźe, dyrbi płaćić. W jědźerni je zakazane šmóratka wužiwać. To započina pola sto eurow, a so stajnje podwoji hač do njeskónčneho“, rozkładźe 52lětny w streamje z fanami.
To a tamne (29.11.22)
Dokelž je mać jeho pječa pod časowy ćišć stajiła, je muž na awtodróze w Berlinje z nimale sto kilometrami na hodźinu přespěšnje jěł. Dowolene je tam tempo 80, zdźěli policija wčera na Twitteru. Muž je zastojnikam na městnje wuswětlił, zo je swoju mać z lětanišća wotewzał. Wona je časowy ćišć wukonjała a tuž je po awtodróze smalił. Tuž dyrbi šofer nětko ze znajmjeńša 800 eurami pokuty ličić. Nimo toho dóstanje dypkaj w Flensburgu a njesmě tři měsacy z awtom jězdźić.
Chorosć wopičich jětrow dóstanje nowe mjeno. Swětowa strowotniska organizacija (WHO) wužiwa wotnětka pomjenowanje Mpox. Tole zdźělichu zamołwići wčera w Genfje. Lěto móžetej so hišće wobě mjenje wužiwać. Nowe mjeno je organizacija wuzwoliła, dokelž hodźi so w druhich rěčach derje wurjekować a wužiwać.
To a tamne (28.11.22)
W Japanskej je policija kocora na wobchadneho policista pomjenowała. Z małym kolesowym nahłownikom na hłowje wustupi dźesaćlětny Pitaro w YouTube-wideju policajskeho zarjada prefektury Shimane, zo by wobydlerjow pohonjował, jemu runja činić a nahłownik nosyć. Ze swojim něžnym napohladom sposrědkuje Pitaro mužam a žonam kóždeje staroby wulki wuznam wobchadneje wěstoty, rozłoži rěčnik tamnišeho policajskeho zarjada.
Jědnaće lět stary kusk kwasneje torty princa Williama a princesny Kate bu nětko za 390 puntow (dobrych 450 eurow) přesadźeny. To bě mjenje hač trochowana hódnota 400 do 600 puntow. Dalši kusk kwasneje torty Williamoweho nana krala Charlesa III. a jeho mandźelskeje Camille z lěta 2005 njeje sej nichtó kupił. Jasnje wjace pjenjez wunjese porno tomu foto Queen Elizabeth II. a jeje mandźelskeho princa Philipa. Za portret z podpismomaj mjeztym zemrěteho kralowskeho pora je kupc 980 puntow zapłaćił.
To a tamne (25.11.22)
Wěstotny personal na lětanišću w New Yorku je w kófrje pasažěra žiwu kóčku namakał. We skeneru za wačoki su zwěrjo spóznali a je wuswobodźili. Kóčka bě w dobrym strowotniskim stawje a je so zaso domoj nawróćiła. Pasažěr pak poda, zo słuša kóčka někomu druhemu z jeho domjacnosće. Přiwšěm dyrbi wón nětko z chłostanskim jednanjom ličić.
Wudra z mjenom Taiyo je dobyće Japanskeje přećiwo štyrikróćnemu swětowemu mištrej Němskej na zahajenskej hrě swětowych mišterstwow zawčerawšim wěšćił. Zahorjeni japanscy fanojo kopańcy w syći maja Taiyoa tohodla za jara kompetentneho. Tuž směmy wćipni na jeho dalše prognozy być.
To a tamne (24.11.22)
Dokelž je swoje kruwy na dróhach swobodnje wokoło běhać dał, je sudnistwo w Indiskej muža k šěsć měsacam jastwa zasudźiło. Kaž nowina „Times of India“ zdźěli, je muž po argumentach sudnikow z tym žiwjenje druhich wohrožał. Z wusudom chcedźa eksempl statuěrować, zo bychu trendej přewjele kruhow na dróhach zadźěwali. Jedna přičina je, zo nochcedźa mnozy kruwy hinduistiskeje nabožiny dla morić.
Překwapjace wulka ličba ludźi po cyłym swěće wěri do toho, zo dawa chodojty, kotrež móža ze swojimi nadpřirodnymi kmanosćemi druhim škodu načinić. Kaž w fachowym magacinje „PLOS One“ předstajena studija wupraja, wěri 40 procentow wobydlerstwa z 95 krajow do zjawa. W Němskej wěri něhdźe 13 procentow naprašowanych do wjerow. Hospodarski wědomostnik Boris Gershman z American University we Washingtonje je so w studiji mjez lětami 2008 a 2017 wjace hač 140 000 ludźi naprašował. Globalna wuprajiwosć studije pak je mało zapřijatych krajow dla wobmjezowana.
