To a tamne (13.11.15)
Wobličo za słónčnym škitom schowane a čisłowu tafličku z nowinskej papjeru zawodźětu měješe 26lětny roznošowar pizzy, jako je z awtom w Dortmundźe z 55 km/h na dróze z dowolenymi 30 km/h do radaroweje kontrole jěł, pokazujo srjedźny porst. Fachowcy pak móžachu na foće z pomocu lupy na zadnim woknje awta mjeno firmy spóznać, za kotruž 26lětny dźěłaše. Nětko hrozytej jemu bolostna chłostanka a dypk.
Třilětny hólčk je we Wiesbadenje sam z busom sobu jěł. Na naměsće před dwórnišćom bě wón staršeju z wočow zhubił, na čož sam do čakaceho busa zalěze, kaž policija zdźěli. Kedźbliwej sobujěducej mały pasažěr napadny. Wona dowjeze jeho na policiju. Ta informaciju wo zhubjenym hólčku hižo měješe.
To a tamne (12.11.15)
Rozhorjeni pućowacy su w Bayerskej ICE nuzowali zastać, zo bychu sej dalejězbu zmóžnili. Regionalny ćah bě techniskeho defekta dla blisko Dettingena we wokrjesu Aschaffenburg stejo wostał, a něhdźe połsta ludźi dyrbješe wulězć. Jako pak tón bjez nich zaso wotjědźe, zadźeržachu roznjemdrjeni před dwórnišćom ICE, kotryž chcyše runje wotjěć. Kak je so jim to poradźiło, policija nětko přepytuje.
Psy samo na sebi do muzejow njesmědźa. W Bremenskim domje stawizničkow tomu tak njeje, tam su kóždy čas witane. Dołhož so wobsedźerjo psow po muzeju rozhladuja, zastaruja je sobudźěłaćerjo domu z wodu a chłóšćenkami. Dotal mějachu jenož dobre nazhonjenja ze štyrinohačemi. Žadyn z nich njeje hišće ženje někajki eksponat nakusał.
To a tamne (11.11.15)
Paducha zadźeržała je žona w Münsteru. Kaž policija zdźěli, bě so muž póndźelu wječor do susodneho bydlenja zadobył. Tole wobkedźbujo zawoła žona policiju. Jako zastojnicy přijědźechu, ćekny 34lětny paduch na třěchu. Wottam suny so na třěchu terasy a móhł po rěblu twochnyć, kotryž tam připadnje steješe. Kedźbliwa susodka pak bě spěšniša a wza rěbl preč. Muž dyrbješe na třěše wostać, doniž jeho policija sobu njewza.
Joggingowe cholowy zakazać chce šula w šwabskim Schwieberdingenje. Drasta je tež wuraz nastajenja, argumentuje šulska nawodnica. Wona je mjeztym připowědźiła, zo chcyła wutworić dźěłowu skupinu wučerjow, staršich a šulerjow, kotřiž měli wo móžnym drastowym porjedźe na šuli rozmyslować. Hižo nětko pak je jasne, zo joggingowe cholowy k tomu njesłušeja. Hólcy wšak měnja, zo měli nětko tež wo legginsach rěčeć.
To a tamne (10.11.15)
Dokelž krej na jeho balkon kapaše, je muž w hessenskim měsće Nidda policiju wołał. Wona móžeše pak móžny krawny njeskutk spěšnje wuzamknyć, zwěsćiwši, zo njejedna so wo krej čłowjeka, ale zwěrjeća. Nad mužom bydlaca swójba bě čerstwe kotelety k sušenju na balkon powěsnyła. Policisća susodam radźachu, přichodnje něšto podpołožić, zo njeby krej dele kapała.
Kuriozny kriminalny pad zaběra policiju w Goslaru. Tam běchu paduši ze zahrody drohi sušak drasty z robustneho teakoweho drjewa pokradnyli. Město njeho stajichu na jeho městno sobupřinjeseny tuni sušak z aluminija. Skućićeljo chcychu drje wobsedźerce zmóžnić, tež přichodnje drastu na sušak wěšeć. Pokradnjenu drjewjanu ławku pak z ničim njenarunachu.
To a tamne (09.11.15)
Wjace hač 500 000 eurow je přesadźowanje zawostajenstwa Pierrea Bricea, hrajerja Winnetouwa, wunjesło. Legendarna třělba wuzbytkowa z 65 000 eurami najwyši wunošk, kaž swójba Bricea na naprašowanje powěsćernje dpa zdźěli. Jaguar jako posledni objekt su dźensa za 18 000 eurow předali. 1 500 eksponatow w Mühlenbecku pola Berlina poskićachu. Najwjetši dźěl wunoška chcedźa dźěćacemu pomocnemu skutkej přewostajić. Pierre Brice bě w juniju 86lětny zemrěł.
Njejapcy wotwěraca so hoberska dźěra je w zwjazkowym staće USA Mississippi něhdźe 15 awtow spóžrěła, kaž lokalny sćelak WTOK rozprawja. Kak je 180 metrow dołha, 15 metrow šěroka a dźewjeć metrow hłuboka jama na parkowanišću hosćenca we wsy Meridian nastać móhła, dotal njewědźa. Nichtó so njezrani. Nowy spěšnohosćenc běchu hakle njedawno wotewrěli.
To a tamne (06.11.15)
Třoch wopačnych policistow při kradnjenju lepiła je prawa policija w Berlinje. Kaž wona zdźěli, běchu mužojo wudawali, zo chcedźa personalije turistow přepruwować. Na te wašnje wšak jim móšnje kradnychu. Ciwilnym policistam bě padušna trójka napadnyła, jako japanskeju turistow narěča a so na to z jeju móšnjemi zhubi. Awto pakostnikow něšto pozdźišo zadźeržachu a muži w starobje 28, 38 a 50 lět zajachu.
13 lět zhubjeneho hólca su w USA zaso namakali. Policisća wuslědźichu 18lětneho Juliana Hernandeza skerje připadnje w Clevelandźe (Ohio). Hólc bě so w starobje pjeć lět zhubił. Po informacijach policije bydleše wón ilegalnje pola nana, kiž pak njeměješe žane prawo na njeho. Policija muža zaja. Tón bě daty hólca za wysoku šulu a jězbnu dowolnosć falšował, štož pak so wukopa.
To a tamne (05.11.15)
Po 38 000 eurow drohej rjadowniskej jězbje do New Yorka je direktor Roberta Kochoweho gymnazija w Berlinje konsekwency sćahnył a jězby tajkeho razu přichodnje zakazał. Kaž wón powěsćerni dpa rjekny, su na kubłanišću razne diskusije wo tym wudyrili, tež mjez wučerjemi. Pjenjezy za jězbu 13 šulerjow běchu z fondsa wzali, z kotrymž dźěći ze socialnje słabych swójbow spěchuja. Wšitcy šulerjo su wuměnjenja za to spjelnili.
Dwanaćelětny je w Bayerskej swojeho dźěda z kwadom – dwuwóskatym motorowym jězdźidłom – šoferował, doniž policija wobeju njezadźerža. Pječa měješe muž hłowybolenje wot nahłownika, na čož bě swojemu wnučkej wodźidło přewostajił, kaž 63lětny při policajskej kontroli rjekny. Dokelž njeje wnučk hišće chłostanjakmany, dóstanje dźěd skóržbu jězdźenja bjez jězbneje dowolnosće dla.
To a tamne (04.11.15)
Swojeho pod wliwom drogow stejaceho syna je žona w porynsko-pfalcskim Grünstadće pola policije wotewzała – a bě sama chětro natutkana. 29lětneho syna běchu póndźelu bjez jězbneje dowolnosće a ze wšelakimi wopojnymi srědkami w awće lepili. Dokelž njebě wón jich dla hižo kmany jěć, dyrbješe mać po njeho přijěć. Zastojnikam wězo „chorhojčka“ žony napadny. Pječa bě jenož dwě piwje piła. Tež jej pak policisća dalejězbu z awtom zakazachu.
Wosobinske wěcy „železneje lady“ Margaret Thatcher chcedźa spočatk decembra w Londonskim awkciskim domje Christie’s přesadźować. Na předań budu debjenki, toboły a kostimy něhdyšeje britiskeje premierministerki. Wěcy su 250 do 250 000 eurow hódne. Wunošk dóstanu namrěwcy politikarki.
To a tamne (03.11.15)
Połne pjelchi su cłownicy na Düsseldorfskim lětanišću sćazali. Wone pak běchu połne złota. 71lětna bě z njewšědnym schowom spytała, złote debjenki w hódnoće 16 000 eurow pašować. Zastojnicy pak pjelchi w jeje tobole namakachu. Tež dźowka 71lětneje měješe debjenki za tysac eurow při sebi. Dowolene by 430 eurow było. Nětko matej so před sudnistwom zamołwić. „Znajemy tójšto schowow za debjenki, ale pjelchi běchu nam nowe“, praji rěčnik cła nowinarjam.
555 přerazantnych šoferow wšědnje je awtomatiska připrawa za měrjenje spěšnosće na awtodróze njedaloko Wiena fotografowała. Wot meje běchu na twarnišću spěšnosć 80 km/h wukazali a błyskač stajili. Mjeztym je dróha dotwarjena a měrjenski nastroj zaso preč. 100 000 šoferow pak přiwšěm chłostanku dóstanje.
To a tamne (02.11.15)
Z awtom do bydlenskeje stwy jěł je muž při njezbožu njedaloko sewjerorynsko-westfalskeho Wesela. 22lětny bě sobotu rano w křiwicy kontrolu nad wodźidłom zhubił, je na to z awtom płót přełamał a sćěnu domskeho a hakle w bydlenskej stwě stejo wostał. Šofer so snadnje zrani. Wobydlerjo wostachu njezranjeni, stwa pak je chětro rozbita. Policija trochuje cyłkownu škodu na 70 000 eurow.
Z jónkrótnej telefoniskej rozmołwu je na štomje sedźacy muž w USA přihladowarjam telewizijneho wusyłanja strašne zapławjenja w zwjazkowym staće Texas zbližił. Po sylnym zliwku bě woda awto muža sta metrow sobu storhnyła. Skónčnje so jemu poradźi z awta na štom zalězć. „Sedźu tu na štyri metry wysokim štomje. Je chětro zyma“, muž moderatoram life-wusyłanja telefonisce rozłoži. Po štyrjoch hodźinach jeho wuchowachu.
