To a tamne (02.10.15)
Wosamoćena kupa je w Awstralskej na předań. Kupa Waterhouse je tři kilometry wot sewjerneho pobrjoha Tasmaniskeje zdalena, je kilometer šěroka a 4,5 kilometrow dołha. Na njej stej domčkaj, mały přistaw, lětanišćo za małe mašiny a krasny pěskojty přibrjóh, kaž wikowar imobilijow zdźěla. Nimo toho je tam wjele płoniny za plahowanje wowcow. Kupa, kotraž ma cyłkownje 3,5 milionow eurow płaćić, je w swójbnym wobsydstwje.
Črjóda wopicow je w Simbabwe radijowy sćelak zlemiła. Prawdźepodobnje hłódne pawiany běchu na sćežorje wusyłanski kabl překusali. Jako nadobo radijo wupadny, tukachu sobudźěłaćerjo na wupad miliny. Inženjerojo pak zwěsćichu, zo bě wusyłanski kabl na horje njedaloko stolicy Harare překusany. Někotre wopicy tam samo hišće běchu.
To a tamne (01.10.15)
Dweju hólcow z Delnjeje Sakskeje na wulěće z pokradnjenym awtom je policija lepiła. Pachołaj w starobje jědnaće a dwanaće lět běštaj na awtodróze A 2 po puću do Berlina, jako jeju pola Wolfsburga zadźeržachu. Při tym jědźeštaj runje tak spěšnje kaž druhe awta. Šoferojo zastojnikow wołachu, dokelž běštaj jimaj hólcaj napadnyłoj. Awto staj pokradnyłoj, dokelž bě wobsedźer klučik tčacy wostajił.
Wosrjedź sudniskeho jednanja je sej přisydnica w Bochumje wusnyła, jako prawiznik swój kónčny pledoajej přednjese. Sudnik jednanje na to přetorhny. Poł hodźiny pozdźišo smědźeše prawiznik hišće raz wotprědka započeć.
To a tamne (30.09.15)
Ze swojim turbanom staj přisłušnikaj nabožneje zhromadnosće sikh wjacorych młodostnych w Indiskej před zatepjenjom wuchowałoj. Poprawom nabožne předpisy mužam njedowoleja, turban w zjawnosći z hłowy wzać, medije rozprawjeja. Młodostni běchu we wobłuku nabožneho nałožka do kanala padnyli a hrožachu so zatepić. Mužej tuž swój dźewjeć metrow dołhi turban rozwalištaj a staj z nim młodostnych wućahnyłoj.
Pola šewca po črije byli su třo najwjetši mužojo swěta w münsterlandskim Vredenje. Běchu to z 2,51 metrami najwjetši muž, 33lětny Sultan Kösel z Turkowskeje, w Parisu bydlacy Marokkočan Brahim Takioullah z 2,46 metrami a 2,32 metrow wulki Abdramane Dembele, tohorunja w Parisu bydlacy ze Słonowinoweho pobrjoha. Dźěłarnja Georga Wesselsa hižo wjele lět črije za nich zhotowja.
To a tamne (29.09.15)
Swojoraznu jězbnu šulu skónčiła je policija w poruhrskim Hagenje. Zastojnikam bě awto napadnyło, kotrež po parkowanišću tam a sam jězdźeše. Njemało pak so dźiwachu, jako wuhladachu 13lětneho za wodźidłom. Pódla njeho sedźeše 38lětny nan, mějo dwaj promilej alkohola w kreji. 13lětny rjekny, zo jězdźić zwučuje. To wšak je w přitomnosći staršeju dowolene, jeho nan přispomni. Zastojnicy běchu hinašeho měnjenja a 38lětneho wobskoržichu.
Wino němskeje jednoty su studenća ze wšěch winowych kónčin kraja zhotowili. Při tym su wina wšitkich 13 plahowanskich kónčin k jednomu změšeli. Je to prěni projekt tajkeho razu w Němskej. Předstajić chcedźa wino 3. oktobra w Frankfurće nad Mohanom.
To a tamne (28.09.15)
Zadwělowany přihladować dyrbješe 60lětny w Delnjej Frankskej, kak so jeho awto w rěce Mohanje tepi. Muž chcyše sobotu wječor po informacijach policije swój čołm z pomocu připowěšaka z rěki wućahnyć. Čołm pak wopokaza so jako přećežki a sćahny připowěšak kaž tež awto do rěki. Muž móžeše runje hišće z awta wulězć, prjedy hač so wone podnuri. Wohnjowa wobora drje je zaso wućahny, wěcna škoda pak njeje runjewon mała.
Njeprošeneho hosća dyrbješe policija wčera rano z bydlenja žony w Saarbrückenje wjesć. Měnjo, zo je pjany při bydlenskich durjach znaty jeje přećela, bě žona njeznateho njedźelu rano do bydlenja pušćiła. Tón pak dźěše runu smuhu do spanskeje stwy a so lehny. Jako so přećel nawróći, so wukopa, zo wón muža we łožu scyła njeznaje. Tón bě so prosće mylił a wo wopačne durje kłapał.
To a tamne (25.09.15)
Chłóšćenkowe awtomaty za wopicy maja wot najnowšeho w Berlinskej coologiskej zahrodźe. Z nich móža sej wopicy słódne pelety wućahnyć – jeli to zdokonjeja. Za to dyrbja sej z kiješkow grat paslić a z jeho pomocu chłóšćenku z awtomata wućahnyć. Dalše pelety po wěstym časowym planje awtomatisce do chłóšćenkoweho kašćika padnu. Wulka lěpšina nowych nastrojow je: Wopicy su cyły dźeń zaběrane.
Nowy rekord spěšnosće awta chcedźa jendźelscy inženjerojo nastajić. Za to předstajichu wčera w Londonje wotpowědne jězdźidło Bloodhound. Awto, lěpje prajene lětadło na kolesach, ma hač do 1 600 km/h spěšne być. Dotalny rekord je 1 228 km/h. Nastajić chcedźa nowy rekord w Južnej Africe.
To a tamne (24.09.15)
Mylnje z paduchom awta stał je so 66lětny w bayerskim Kreuthu. Nawróćiwši so z pjekarnje njezalěze wón do swojeho, ale do runje tak wupadaceho awta a z nim wotjědźe. Krótko na to přińdźe wobsedźer awta z pjekarnje a zawoła policiju. Padustwo pak so spěšnje jako misnjenje wukopa. Wobaj šěrej wozaj běštej pódla so stałoj. Nimo toho bě „wobkradnjeny“ klučik awta tčacy wostajił.
Wosebiteho jandźela pěstona měješe koala w Awstralskej. Po zražce z awtom bě wón dlěši čas w motorowej hawbje zatłusnjeny. Šoferka bě do njeho zajěła a hakle dźesać kilometrow dale w garaži widźała, zo zwěrjo hišće w awće tči. Koala bě zražku kaž tež razantnu jězbu z awtom derje přetrał. W Awstralskej dochadźa stajnje zaso k njezbožam z koalemi, dokelž so wone „njelepje“ zadźerža, kaž nowiny pisaja.
To a tamne (23.09.15)
Mjerzanje ze sudnistwom hrozy mužomaj w Pólskej, kotrajž twjerdźitaj, zo staj ćah ze złotom němskich nacijow namakałoj. Nawodnica regionalneho zarjada za škit pomnikow je jeju mjeztym pola statneho rěčnistwa wobskoržiła. Wonaj běštaj njedaloko delnjošleskeho Wałbrzycha z pomocu radaroweho nastroja za ćahom pytałoj, njeměještaj pak žanu zarjadnisku dowolnosć. Skóržba nadźijomnje dalšich pytarjow wottraša.
Z mlokom woheń hašał je šofer mlokoweho nakładneho awta w delnjosakskim Bramsche. 41lětny bě wčera z awtom po puću, jako poča so zadnja wóska kurić. Bórze na to so wona paleše a wobruč so pukny. Šofer zasta, wotpušći štyri bowy mloka z tanka a tak woheń zhaša. Wohnjowa wobora jenož hišće wósku chłódźeše. Mloko do druheho awta wotklumpachu, zo móhli koleso wuměnić.
To a tamne (22.09.15)
Njewšědny narodninski dar je Margarete Erben z bayerskeho Kaufbeurena k stoćinam dóstała: jězbu do Libereca. Wona je tam hač do měrca 1945 bydliła – po tym pak město wopušći a so tak pozdźišemu wotsunjenju němskeho wobydlerstwa wuwiny. Na wopyće, organizowanym hromadźe z Liberecskej radnicu, su ju nětko hoberske změny napohlada města najbóle překwapili.
Prečćisnjene roztorhane pjenjezy staraja so w Darmstadće dale wo njeměr. Roztřihane a roztorhane dźěle eurobankowkow su woprawdźite pjenjezy, kaž policija zdźěla. To je přepytowanje Zwjazkoweje banki wunjesło. Dotal su pjenjezy na 23 městnach w Darmstadće namakali. Při tym jedna so wo 500-, 100- a 50eurowki. Zdźěla ležachu wone na dróze. Cyłkownje jedna so mjeztym wo nimale 20 000 eurow.
To a tamne (21.09.15)
Runje dźesać mjeńšin na swobodźe dyrbješe 58lětny hižo zaso do jastwa. Muža běchu minjeny pjatk pušćili. W samsnym času dóńdźe do bliskeje policajskeje straže wukaz zajeća přećiwo njemu, podhlada jebanstwa dla, kaž policija zdźěli. Zastojnicy muža njedaloko jastwa lepichu a hnydom zaso sobu wzachu.
Tójšto zapozdźenja zawinowała je skupina howjadow minjeny pjatk, jako stejachu wone na centralnej čarje spěšnikow mjez Kasselom a Fuldu. Wotrězk, na kotrymž tež spěšniki mjez Berlinom a Frankfurtom a Hamburgom a Frankfurtom jězdźa, bě mjez 19.35 a 21.05 hodź. zawrjeny. Zhromadnje z wobsedźerjom policisća kruwy popadnychu. Spěšniki wšak dyrbjachu w tym času po druhich čarach jězdźić, štož wjedźeše k zapozdźenjam hač do 45 mjeńšin. K zražkam z howjadami pak na zbožo njedóńdźe.
