Brüssel/Berlin (dpa/SN). Dźěłarnistwo policistow Němskeje njewočakuje z planowanej reformu azyloweho prawa EU žane wolóženja za policiju. „Migraciski ćišć do Europy a wosebje do Němskeje wostanje dale wulki“, rjekny předsyda dźěłarnistwa Heiko Teggatz powěsćerni dpa. „Dołhož wosebje Němska powabki, do Němskeje zapućować, spěšnje njeredukuje abo njewotstroni, ludźo dale spytaja, ilegalnje do Němskeje zapućować.“ Po jeho měnjenju je trjeba, ćěkancow při wonkownych mjezach EU konsekwentnje wotpokazać.

W Brüsselu chcychu dźensa reformu azyloweho prawa w EU doskónčnje wobzamknyć. Z njej maja spěšniše azylowe procesy při mjezach EU móžne być.

Gaza/Tel Aviv (dpa/SN). Při nadpadźe na swoje awto je sobudźěłaćer UNO w Ga­zaskim pasmje žiwjenje přisadźił. Dalši sobudźěłaćer UNO so po informacijach swětoweje organizacije zrani. Je to zdobom prěni mjezynarodny pomocnik UNO, kiž bu w Gazaskim pasmje mo­rjeny. Awto, z kotrymž běštaj mužej po puću do chorownje, bě jasnje jako awto UNO woznamjenjene. Po spočatku wójny w Gazaskim pasmje su tam dotal ­nimale 200 sobudźěłaćerjow UNO mo­rili. Wšitcy běchu Palestinjenjo.

Skupina prawicarskich israelskich ekstremistiskich aktiwistow je wčera spy­tała, transport pomocnych srědkow do Gazaskeho pasma zadźeržeć. Skupina blokowaše nakładne awta na pomjeznym přechodźe na juhu pasma, pale­stinske medije rozprawjeja. Aktiwisća ­ćahachu pomocne srědki z awtow a znajmjeńša dźewjeć jězdźidłow wobškodźichu. Policija je štyrjoch z cyłkownje sto wobdźělnikow zajała. W Gazaskim pasmje čaka něhdźe milion ludźi nuznje na žiwidła, wodu a medikamenty.

Zwjazkowy kancler Scholz sej z nawodami nordiskich krajow přezjedny

Stockholm (dpa/SN). Hladajo na rusku ofensiwu na sewjerowuchodźe Ukrainy su Němska a nordiske kraje Ukrainje ­dalše brónje přilubili. „Smy zjednoćeni w swojej podpěrje na dobro Ukrainy w zakitowanskim boju přećiwo ruskemu nadpadej“, rjekny zwjazkowy kancler Olaf Scholz (SPD) wčera na zetkanju ministerskich prezidentow Šwedskeje, Danskeje, Finskeje, Norwegskeje a Islandskeje w Stockholmje. „Podpěrujemy Ukrainu dale, dołhož je tole trěbne.“ Scholz wuraznje na to pokaza, zo je tuta jednota něšto, „štož njeje Ruska wočakowała“.

Hišće jasniši bu finski knježerstwowy šef Petteri Orpo. Połoženje na bitwišću je kritiske. Je na času, wjace činić. „Nochcemy nowy Mariupol w Charkiwje widźeć. Tohodla dyrbi nětko kóždy jednotliwy kraj na zapadźe, w Europskej uniji hnydom wšitko činić, štož móže.“ Ruske jednotki su před dnjemi ofensiwu w Charkiwskej kónčinje zahajili a wukonjeja tam masiwny ćišć na ukrainske wójsko.

Wjeselimy so, zo mamy kónčiny połne „žiweje dwurěčnosće“, štož za nas prěnjotnje woznamjenja: žiweje serbšćiny wšědny dźeń. A angažowani maćernorěčni Serbja tutoho regiona su hustodosć tež w susodnych gmejnach wažni pomocnicy při wožiwjenju našeje rěče. Tohodla su sej wšitcy dobyćerjo lětušeho wubědźowanja simul+ swoje myto zasłužili – a přejemy jim wjele zboža při zwoprawdźenju kreatiwnych idejow, wšako je hižo zašłe lěta na tute wašnje wjele noweho na dobro Serbstwa narostło. Tež w druhich kónčinach, hdźež su wuměnjenja za žiwu dwurěčnosć hišće wjele ćeše, je kedźbyhódnych dobyćerskich projektow. Njech tež tule dale a wjac serbskich rěčnych rumow nastanje! Při­wšěm bych sej přała, zo změja w přichodźe runje tute kónčiny, kotrež maja nastupajo žiwu dwurěčnosć tuchwilu wosebje wjele nachwatać, wjetši podźěl na wuznamjenjenych projektach. Nadźijam so, zo njebu lětsa žadyn wažny impuls rewitalizacije zabyty. Bianka Šeferowa