Waršawa. Polacy wola přichodnu njedźelu nowy parlament. Wjace hač 30 milinow wólbokmanych je namołwjenych, 460 mandatow sejma wuzwolić, wo kotrež so 7 896 kandidatow prócuje.
Ludźo w kraju z tym liča, zo dóńdźe po wólbach k zasadnej politiskej změnje. Po aktualnych naprašowanjach móže so knježaca Wobydlerska platforma (PO) z ministerskej prezidentku Ewu Kopacz na čole runje hišće dwaceći procentow hłosow nadźijeć. Opozicionelna strona Prawo a sprawnosć Jarosława Kaczyńskeho (PiS) móže porno tomu z něhdźe 36 procentami ličić.
Kandidatka PiS za ministersku prezidentku je Beata Szydło. Wšitcy w kraju pak wědźa, zo změje za njej stejacy Kaczyński wšitke nitki w rukomaj. Wotpowědnje direktnje so tydźenik Polityka tele dny na titulnej stronje swojich čitarjow prašeše: „Chceće, zo Kaczyński absolutnu móc w kraju přewozmje?“
DŹEWJATNAĆE miliardow krónow (něhdźe 705 milionow eurow) „zasłužeja“ w Čěskej profesionelni wobšudnicy na te wašnje, zo manipuluja tachometry trjebanych awtow. Wotjězdźane wozydła wobstaruja sej předewšěm we wukraju, a po jich snadnym sporjedźenju, ewentualnym wobnowjenju a wosebje zniženju stawa kilometrow na tachometru poskićeja je potym wjele dróše na předań. Tole stej automotoklub ÚAMK a autobazar AAA Auto na nowinarskej konferency publikowałoj, rozprawja powěsćernja. Tak bě zhonić, zo předawaja w Čěskej kóžde lěto nic mjenje hač 270 000 jězdźidłow ze zmanipulowanym tachometrom, štož je 45 procentow wotbytka trjebanych awtow. Jich wiki wučinjeja lětnje 127 miliardow krónow (něhdźe 4,7 miliardow eurow). Tak maja wone trójce tajki wobjim wotbytka kaž nowe awta. Zastupnik ÚAMK Petr Vomáčka ma wšelke naprawy za njezbytne. Nimo raznišich zakonjow přećiwo tomule jebanstwu dyrbjeli ze strony producentow awtow škit před manipulowanjom tachometrow zawjesć a při kóždym jich serwisu staw kilometrow registrować.
Waršawa. Kaž bomba zadyrił je comingout pólskeho duchowneho Krzysztofa Charamsy w pólskich medijach, w cyrkwi a po wšej towaršnosći. Charamsa, dotal čłon wažneje kongregacije za wučbu wěry we Vatikanje, něhdy organa inkwizicije, bě oficialnje přiznał, zo je homoseksualny. Runočasnje předstaji wón žurnalistam we Vatikanje swojeho partnera. W pisomnym stejišću pólski duchowny swoje splažne wusměrjenje zakitowaše, za kotrež „so njezamołwi“. Cyrkej wón namołwi, zo by swój dotal agresiwny a diskriminowacy zwuk napřećo homoseksualnym duchownym změniła. Sam pječa cyły rjad tajkich duchownych znaje, kotrychž ma přiwšěm za „wulkotnych měšnikow“. Po swojim wuznaću čuje so wón nětko „wuswobodźeny a zbožowny“.