Waršawa. Spřisahanje noweho prezidenta USA Joewa Bidena srjedu we Washingtonje je w pólskich medijach jara rozdźělny wothłós zbudźiło. Liberalne nowiny kaž Gazeta Wyborcza abo Rzeczpospolita wo ceremoniji před Kapitolom wobšěrnje rozprawjeja, witajo noweho prezidenta.
Konserwatiwny a poboku pólskeje knježaceje strony PiS stejacy dźenik Gazeta Polska Codziennie wěnuje so porno tomu wotwolenemu prezidentej Donaldej Trumpej. W dołhim přinošku so nowina jemu za wšitke zasłužby na dobro Pólskeje dźakuje. Tak bě Trump přesadźił, zo Polacy za jězbu do USA žadyn wizum njetrjebaja. Nimo toho je wón ameriskich wojakow do Pólskeje słał, kotřiž maja kraj před „inwaziju“ Ruskeje škitać. Nic naposledk chcyše runje tak kaž Pólska nowemu płunowodej Nord Stream 2 mjez Ruskej a Němskej zadźěwać. Donald Trump budźe Pólskej jara pobrachować, nowina konstatuje.
Praha. Po přewšo rjanym zymskim kóncu tydźenja, hdźež bě so wjele sněha našło, je póndźelu rano třěskaca zyma wobydlerjow Čěskeje trapiła. Prěnje ranje noweho dźěłoweho tydźenja bě mjenujcy z -27 stopnjemi w Orlickich horinach dotal najzymniše lěta 2021. Na wjacorych městnach po cyłym kraju běchu meteorologojo temperatury daloko pod -20 stopnjow naměrili.
Waršawa. Skandal wokoło zdźěla prominentnych wosobow, kotrež běchu so njewoprawnjene pře koronawirus šćěpić dali, so w Pólskej dale rozšěrja. Po Nowym lěće su skandal w medicinskej fakulće Waršawskeje uniwersity wotkryli. Studenća běchu wobkedźbowali, zo so někotři na kruće wukazany šćěpjenski porjad njedźerža a rynk čakacych prosće wobeńdu. Na to bě minister za strowotnistwo Adam Niedzielski komisiju do uniwersity pósłał, kotraž měješe pad přepytować. Čłonojo komisije zwěsćichu, zo njebě so jenož 20 ludźi při šćěpjenju „doprědka tłóčiło“, ale na wšě 200.
Adam Niedzielski reagowaše zludany a hněwny. Wón připowědźi, zo nochce ze swojim ministerstwom dale z profesorami uniwersity dźěłać, dokelž nima hižo žaneje dowěry k nim. Wot rektora kubłanišća prof. Zbigniewa Gacionga je sej wón žadał, zo ma wotstupić. Tón pak scyła na to njemysli a ministrej wumjetuje, zo njewotwisnosć kubłanišća rani.
Praha. Najrjeńše zymske wjedro a čerstwy sněh wabještej minjeny kónc tydźenja tójšto ludźi do přirody. Hačrunjež su zymske sportowe srjedźišća koronapandemije dla tuchwilu zawrjene, nochcychu so někotři zymscy sportowcy dožiwjenja w sněze na čerstwym powětře wzdać. Tak dožiwi juhočěska Šumawa sobotu a njedźelu hoberski nawal zahorjenych sněhakowarjow. Tež do centruma zymskeho sporta Bedřichov w Jizerskich horinach bě sej telko přiwisnikow běłeje pychi dojěło, zo dóńdźe tam njedźelu hižo rano krótko do wosmich k wobchadnemu chaosej. Policija dyrbješe dróhu do wsy samo zašlahać.
POSLEŠĆO wutřasć a je čerstwje přewětrić słuša samozrozumliwje k prawidłownym wobstaranjam při rjedźenju spanskeje stwy. W morawskej Ostravje je tak tež rentnarka činiła, bydlaca z mandźelskim w 9. poschodźe platoweho wysokodoma. Tola hinak hač pola bajkoweje knjeni Holdy (Holle) njejsu při tym sněhowe mjetele na zemju padali, ale z balkona krónowe bankowki wšěch móžnych hódnotow přisamom so sypali. Wboha seniorka je tak njezbožownje cyłe swójbne, za čas žiwjenja nalutowane zamóženje we wysokosći 170 000 krónow do powětra wuklepała. Poprawom běchu myslene za stare dny a za dźěći.
Waršawa. W Pólskej su njedźelu, 27. decembra, započeli wobydlerjow přećiwo koronawirusej šćěpić. Zakład toho je wot knježerstwa zestajeny „narodny šćěpjenski program“. W nim je nadrobnje zakótwjene, w kotrym rjedźe chcedźa ludźi ze serumom před wirusom škitać. Jako prěnich su medicinski personal šćěpili. Přichodni budu wobydlerjo starownjow a hladarnjow kaž tež wučerjo, kotrychž wot 25. januara šćěpja. Do teje skupiny słušeja na přikład policisća, wojacy, powołanscy wohnjowi wobornicy a železnicarjo. Woni su wosebje wohroženi, dokelž maja kontakt z ludźimi. Dotal su po informacijach medijow 153 000 ludźi přećiwo wirusej šćěpili.
Praha (dpa/SN). W Čěskej republice chcedźa wućeženje swojich krematorijow po cyłym kraju koordinować. To je nutřkowny minister Jan Hamáček wčera po posedźenju centralneho krizoweho staba připowědźił. Wulkeje ličby na koronawirus zemrětych dla su institucije w nimale wšitkich regionach wućežene.
Najhórše je połoženje w morawsko-šleskim zarjadniskim regionje, hdźež su hranicu poćežowanja hižo překročili. Z tamnišeho industrijneho města Ostrava chcedźa nětko połsta ćěłow za spopjelenje do 150 kilometrow zdalenych Hustopeč dowjezć. „Tak chcemy tež w druhich padach postupować“, socialdemokrat připowědźi. Najwjetše swobodne kapacity maja hišće w stolicy Praze.
Tuchwilu maja w susodnym kraju nowy rekordny staw koronainfekcijow. Wčera běchu zamołwići 17 278 padow w běhu 24 hodźin zličili, telko kaž hišće nihdy wob dźeń. Po nowym šćěpjenskim planje knježerstwa ministerskeho prezidenta Andreja Babiša chcedźa najprjedy raz ludźi, staršich hač 80 lět, a strowotniski personal šćěpić, hakle po lěću tamnych wobydlerjow.