To a tamne (15.01.21)
Londonski Tower je jednoho ze swojich rapakow zhubił. Tak je Britiske kralestwo po legendźe swojemu kóncej wo kročel bliže. „Swojeho lubowaneho rapaka Merlinu njejsmy hižo wjacore tydźenje widźeli. Dyrbimy z tym ličić, zo je zahinył“, z Towera rěka. Nětko je tam hišće sydom rapakow. Po starym přiwěrku trjebaja znajmjeńša šěsć, hewak „króna a wša Wulka Britaniska zańdźetej“. Mjeztym maja samo swójsku plahowarnju rapakow, zo bychu tomu zadźěwali.
Dźěćace narodniny z wjace hač 30 ludźimi je policija w Hamelnje skónčiła. Hosćo spytachu so hišće schować – na nuzniku, w kamorach abo za durjemi. Zastojnicy pak wšěch namakachu a swjedźeń rozpušćichu. Kóždemu z dorosćenych hrozy pokuta hač do 150 eurow. Policiju na ilegalnu party skedźbnił bě susod, kiž pak chce anonymny wostać.
To a tamne (14.01.21)
Z pomocu motorskich sankow je policija w Allgäuju ilegalnu party w hórskej chaće z wjace hač 20 hosćimi rozpušćiła. Přechodźowarjam běštej hara a hudźba napadnyłoj. Jako chcychu zastojnicy ke chaće jěć, dyrbjachu zwěsćić, zo bě jenička šćežka na horu z awtom hosći zastajana. Wobstarachu sej tuž motorske sanki za dalejězbu. Warnowani hosćo party drje so w bliskim lěsu chowachu, přiwšěm policija nimale wšitkich lepi.
Hnydom štyri razy do njetrjebawšeje karanteny koronawirusa dla pósłał je sobudźěłaćer strowotniskeho zarjada w Israelu swoju ekspřećelku. 35lětny na sewjeru kraja bě ju z handyjom wo tym informował, zo bě kontakt k natyknjenej wosobje měła a zo dyrbi hnydom do izolacije. Dokelž bě žona po kóždej SMSce znapřećiwjenje zapodała, zaběra so nětko policija z naležnosću.
To a tamne (13.01.21)
Młódšich ludźi přećiwo koronawirusej šćěpić chcedźa wot dźensnišeho w Indoneskej. Jako prěni je so prezident Joko Widodo w swojim palasće šćěpić dał. Slěduja sobudźěłaćerjo strowotnistwa a wosoby w starobje 18 do 59 lět. Po tym puću chcedźa docpěć, zo su wulke dźěle wobydlerstwa spěšnje škitane. Nabožinscy nawodźa kraja z 270 milionami wobydlerjow su wobkrućili, zo njeje serum ze swinjacych produktow zhotowjeny a so tuž za muslimow hodźi.
Sarkastiske pokiwy policije je muž w Berlinje na puć dóstał, po tym zo běchu jeho ze 105 km/h na jednej z hłownych dróhow stolicy lepili. Štóž najebać zymske puće dwójce tak spěšnje kaž dowolene smali, změje dwaj měsacaj chwile zwěsćić, hač so „póduše čriji na chódniku suwaja. 280 eurow pokuty by za tójšto jězdźenkow dosahało“, policija pisa.
To a tamne (12.01.21)
Elefanty Drježdźanskeho coowa smědźa sej nětko 40 metrow wysoki šmrěk słodźeć dać, kotryž je dotal jako hodowny štom w nutřkownym měsće stał. Do wotpowědnych porcijow rozrězany su jón wčera do wonkowneho areala elefantow dowjezli. Wosebita firma bě hałzy wotrězała a zdónk na kruchi rozdźěłała, zo móhli sej słony z nimi hrajkać. Hałzy šmrěka su jim mnohich eteriskich wolijow dla nimo toho wosebita chłóšćenka.
Fatalne misnjenje je so mužej w Šwabskej stało. Wón je policiji zdźělił, zo běchu njeznaći 500 kilogramow ćežki nastroj za industrijne skowanje z hale pokradnyli. Krótko na to so wón znowa přizjewi a wohańbjeny rjekny, zo je so naležnosć wujasniła: Muž bě nastroj před měsacami znatemu požčił a na to prosće zabył. Při telefonaće jemu znaty praješe, zo mašina hišće pola njeho steji.
To a tamne (11.01.21)
24 hodźin bjez přestawki telefonować chce reporter rozhłosoweho sćelaka 1 Live WDR. Při tym chce moderator Daniel Danger ze znajmjeńša 500 ludźimi rěčeć, kaž nowinarjam přeradźi. „24 hodźin telefonować, před tym mam wulki respekt. Ze swojej přećelku rěču najdlěje 20 mjeńšin při telefonje.“ Zastupnik Němskeho rekordneho instituta chce wusyłanje 21. januara přewodźeć. Wón chce na to dźiwać, zo su rozmołwy z ludźimi „zmysłapołne“.
Konopej zhubiła je žona na awtodróze w Bayerskej. 20lětna transportowaše mebl njepřiwjazany na připowěšaku a ani njepytny, jako tón njedaloko Woringena na jězdnju padny. Za njej jěducy šofer njemóžeše so wuwinyć a nastroj přejědźe. Při tym nasta škoda 2 000 eurow. Hakle, jako žona wotboči, jej malheur napadny. Nětko dyrbi z chłostanjom ličić.
To a tamne (08.01.21)
Hišće za čas telefonata nana do porodneje kliniki je so w bydlenju w Mnichowje dźěćko narodźiło. Muž bě při telefonje rjekł, zo je jeho žona we 38. tydźenju samodruha a zo su so hrona započeli. W tym wokomiku bě w pozadku hižo wukřik dźěsća słyšeć. Hnydom poda so nuzowy lěkar k bydlenju swójby, hdźež nańdźe mać a strowe hólčatko.
Mylnje nuzowe čisło wolił je paduch w jendźelskim měsće Stoke-on-Trent a je tak policiju alarmował. „Smy drje runje najnjezbožownišeju paduchow swěta zajeli“, pisa policija hrabinstwa Staffordshire. Mužej w starobje 49 a 42 lět běštaj so w Stoke-on-Trenće do domu zadobyłoj. Jako so jedyn z njeju na konopej sydny, zazwoni toho mobilny telefon awtomatisce nuzowe čisło policije. Ta móžeše jeju činjenju připosłuchać, doniž njepřijědźe a wobeju njezaja.
To a tamne (07.01.21)
Paduch w sewjerorynskim-westfalskim Windecku bě so do domu porika zadobył a tam tři laptopy, šmóratko a pjenjezy spakosćił. Naposledk je nuznik wužiwał, hdźež wobydlerka jeho lepi. Rozhorjena so wona njeznateho wopraša, štó je a što chce. Zadobywar chětře stany, hrabny sej pućowanski wačok, kotryž bě tohorunja pokradnył, a so zminy. Jeho „zawostajenstwo“ w nuzniku dyrbješe přećel žony wotstronić.
Saznicy chcedźa image čornych zwěrjatow polěpšić. Tajkich maja mjenujcy w zwěrjatownjach nadosć, dokelž ludźo čorne zwěrjata z njezbožom zwjazuja. Zjednoćenstwo saznikow w Berlinje je tuž kalender ze zwobraznjenymi saznikami a čornymi zwěrjatami kaž psami, kóčkami a nuklemi wudało. Prěnje 500 eksemplarow je hižo předatych. Dobytk chcedźa zwěrjatownjam přewostajić.
To a tamne (06.01.21)
Při zražce ze sněhowym mužom bu ćah w Köthenje wobškodźeny. Intercity Němskeje železnicy bě njedźelu do figury zajěł, kotraž při kolijach steješe. A lokomotiwa so wobškodźi. Policija pyta nětko za swědkami a skedźbnja na to, zo přebytk we wobłuku kolijow žiwjenje wohroža. To wšak dyrbješe bohužel tež sněhowy muž nazhonić.
Dokelž njeje žona na wučinjene zetkanje přišła, so 59lětny w Münsteru chětro rozhněwa. Najprjedy da so do sobudźěłaćerja spěšnohosćenca a je na to samo přiwołaneju zastojnikow nadběhował. Skónčnje so jimaj poradźi roznjemdrjeneho muža přemóc. Přiwšěm staj so lochko zraniłoj. Skućićel ma nětko z chłostanskim jednanjom ličić.
To a tamne (05.01.21)
Mobilna sawna na kromje puća je policajske zasadźenje wuskutkowała. Swědcy w saarlandskim Wallerfangenje běchu pozdatnje naheho muža w sudźe wuhladali a so na tym postorkowali. Zawołana policija pak njemóžeše žane přeńdźenje zwěsćić, sud bě na připowěšaku awta derje připrawjeny a muž w kupanskich cholowčkach. Sawna pod hołym njebjom njeje zakazana. Wón njetrjeba tuž ze žanymi konsekwencami ličić.
Dotal njeznaty dobyćer lota z Badensko-Württembergskeje je swoju poslednju šansu zapasł so přizjewić a sej 11,3 miliony eurow hódne dobyće wotewzać. Tele pjenjezy du nětko do hornca wosebitych wulosowanjow. Hižo wot apryla 2017 běchu za dobyćerjom pytali. Najebać prawidłowne namołwy njeje so nichtó přizjewił. Tajki pad dotal na juhozapadźe Němskeje hišće dožiwili njejsu.
To a tamne (04.01.21)
Žonu ze swójskeho balkona wuswobodźić dyrbješe minjeny tydźeń wohnjowa wobora w Mnichowje. Dwulětny synk bě ju z bydlenja wuzamknył. Poprawom chcyše mać jenož wonka telefonować, zo njeby spjace dźěćo myliła. Syn pak přiwšěm wotući a durje balkona začini. Tuž dyrbješe žona wohnjowu woboru wo pomoc prosyć.
Poprawom měješe to za porik w Awstriskej jedyn z najrjeńšich dnjow žiwjenja być. Tola wony dźeń skónči so z katastrofu. Što bě so stało? Porik krosnowaše na horu Falkert w Korutanskej. Na wjeršku staji 27lětny skónčnje prašenje, hač nochcytaj so zmandźelić, čemuž 32lětna rady přizwoli. Po wšěm zdaću sonow wo přichodnym zhromadnym žiwjenju dla so žona wobsuny. Slubjeny drje chcyše ju hišće dźeržeć, štož so jemu njeporadźi a 32lětna sunje so 200 metrow po horje dele. Na zbožo je ju wobhospodar hěty namakał a wuchował. Zranjeneho muža dyrbješe helikopter do doła dowjezć.
