To a tamne (16.10.20)
Lětsa soby žanu sezonu njezměja, rozprawja wobsedźer wulkeho stadła w Jendźelskej. Wjele hodownych wikow a adwentnych zarjadowanjow je koronapandemije dla wotprajenych. Tak drje George Richardson lětsa cyłkownje 95 procentow wobrota přisadźi. Runje tydźenje wokoło hód su jenički čas, ze sobami pjenjezy zasłužić.
Dom wopušćili a škitny nahubnik zabyli? To w Japanskej žadyn problem njeje. Ludźo móža sej tajke we wobchodach, kotrež su tam 24 hodźin wočinjene, bórze pak tež w awtomatach kupić. Hladajo na koronapandemiju nadźija so napojowy koncern DyDo přidatneho wobrota, hdyž nahubniki do awtomatow integruje.
To a tamne (15.10.20)
Britiska rockband The Who je prawidłownje na koncertach swoje gitary wotpohladnje skóncowała. Štóž pak sej mysli, zo su je tak wotbyli, so myli. Swoje instrumenty su po tym přeco zaso hromadźe lěpili, dołhož njebě šija gitary skóncowana, přeradźa mjeztym 75lětny spěwar skupiny Roger Daltrey. Za nowe gitary tehdy žane pjenjezy njemějachu, lěpk bě hižo drohi dosć.
Najebać koronapandemiju kwas swjećić je mnohim wulke wužadanje. Wšako njeje telko hosći dowolenych. Hinduistiski porik we Wulkej Britaniskej je přiwšěm něhdźe 200 hosći přeprosył. W awtokinje móžachu woni w swojich awtach na wulkich wobrazowkach štyrihodźinsku ceremoniju sćěhować. Něhdźe 300 dalšich ludźi po cyłym swěće je swjatočnosć přez widejo tohorunja widźało.
To a tamne (14.10.20)
Při nazymskich temperaturach jeničce w pjeluškach je dwulětna holčka ze staršiskeho bydlenja twochnyła a so samalutka na puć podała. Na zbožo ju kedźbliwy šofer wuhlada a zawoła policiju. Jako zastojnicy přijědźechu, sedźeše holčka kabat 33lětneho woblečena w ćopłym awće. Mać bě chětro překwapjena, jako jej policija dwulětnu přepoda. Wona bě so mjenujcy z dalšimaj dźěsćomaj spać lehnyła a sej wusnyła. Tak tež njepytny, zo bě dźowka stanyła a so zminyła.
Jedyn z najwjetšich wioletnje-pink błyšćacych so diamantow budźe w nowembrje w Genfje přesadźowany. Drohotny kamjeń, kotryž běchu w podkopkach na sewjeru Ruskeje namakali, je po ruskim baleće „Duch róže“ pomjenowany. Fachowcy trochuja jeho hódnotu na hač do 32 millinow eurow, kaž z awkciskeho domu Sotheby’s rěka.
To a tamne (13.10.20)
Twjerde pjenjezy po kilach w rěce našli su dźěći w badensko-württembergskim Bretzfeldźe. Dubiozneje namakanki dla je nan dźěsća skónčnje policiju zawołał. Zhromadnje ze zastojnikami su skónčnje 45 kilogramow dwueurowkow z wody zwućahali, a to w hódnoće 10 000 eurow. Kaž pak so spěšnje wukopa, běchu wšitke wopačne. Nětko pyta policija za wotstronjerjemi pjenjez.
Nurjenski woblek zdrasćeny je muž na tři najwyše hory Wulkeje Britaniskeje zalězł. W nimale 60 kilogramow ćežkim wuhotowanju, z kotrymž hodźi so wosebje hłuboko nurić, je 58lětny Lloyd Scott 978 do 1 345 metrow wysoke wjerški zmištrował a přez tak mjenowanu „Three peaks challenge“ něhdźe 46 000 puntow nazběrał. Z pjenjezami financuje Scott sportowe poskitki za zbrašenych młodostnych.
To a tamne (12.10.20)
Z 51 lětami zapozdźenja je klóšter w Bayerskej pohladnicu z Roma skónčnje dóstał. Hižo 20. apryla 1969 bě wěsta Hildegard postrow z Roma wotpósłała. Njekorektneje adresy dla pak njeje karta swój cil dotal docpěła. Hakle před dnjemi je póstownica póstowu kartu w klóštrje Münsterschwarzach pola Würzburga wotedała, a ta je tam nětko wulka tema.
Njeznata žona je roznošowarja nowin minjeny štwórtk w badensko-württembergskim Bermatingenje chětro rozhněwała. Najprjedy jeho zadźeržeše, hač móhł ju sobu wzać, štož wón wotpokaza. Krótko po tym wostaji póstownik klučik w awće tčacy, zo by nowinu do listoweho kašćika tyknył, njeznata z awtom prosće wotjědźe. Pjatnaće kilometrow dale je padušnica samo hišće njezbožo zawiniła a pěši ćeknyła. Pozadk kuriozneho padu dotal hišće wujasnjeny njeje.
To a tamne (09.10.20)
Wone stejachu wosrjedź nocy před radnicu, kinom a na puću. Rěč je wo 15 kruwach. Policija a wohnjowa wobora dyrbještej je w nocy na štwórtk w Alsdorfje pola Aachena popadnyć. Z pomocu powjazow móžachu skoćata skónčnje hromadźe ćěrić. Dalšu kruwu nańdźe policija ze swojim patruljowym wozom. Zawołany bur je swój skót po dwěmaj hodźinomaj z připowěšakom wotwjezł.
Tajki twaroh na sćěnje, mysla sej zawěsće mnozy, kotřiž tele dny wuměłca Benjamina Houlihana we Wolfsburgu wobkedźbuja. Z twarohom a žiwidłowej barbu wón ze swojim jazykom 30 kwadratnych metrow wulke płatno „pomoluje“. Twórbu chcedźa wot kónca oktobra we wuměłstwowym muzeju pod hesłom „In aller Munde“ pokazać. Wjac hač 150 wuměłcow budźe tam zastupjenych. Hač pak wšitcy mjenowane hesło tak chutnje bjeru kaž Houlihan?
To a tamne (08.10.20)
Połnje wobsadźeny šulski bus dyrbješe połdra hodźiny čakać, doniž njeje parkowace awto skónčnje wotjěło. Stało je so to minjeny pjatk w Neustadće pola Coburga. Tam je so 63lětny muž njesměrnje rozhněwał, dokelž so w zajězdźe na ležownosć zas a zaso jězdźidła zawróćeja. Tež bus tam zaparkowa. Hakle policija a busowy předewzaćel zamóštaj 63lětneho změrować. Poměry wobsydstwa zajězda chcedźa nětko přepytować a znowa posudźować. Muž pak ma z chłostanjom ličić, dokelž je z gwałtom bus zadźeržał. Dźěći dyrbjachu z dalšim busom do šule dowjezć.
W Berlinskim kabineće Madame Tussauds su prezidenta USA Donalda Trumpa nětko pod karantenu stajili. Tak su wokoło wustajeneje figury banćik připrawili. Tež škitny nahubnik Trump ma.
To a tamne (07.10.20)
Dokelž njemóžeše žona swoju ruku hižo z gullyjoweho wěka w Siegburgu wućahnyć, zawołachu starosćiwi přećeljo wuchowansku słužbu. Młodej žonje bě mjenujcy kluč do gullyja padnył, a tón chcyše wona wućahnyć. Ruka pak tčacy wosta. Z pomocu wosebiteho maza su wuchowarjo žonu w běhu jenož někotrych mjeńšin wuswobodźili.
Romski kołk, debjenki ze srjedźowěka, hrajki z wiktorianskeho časa: Štóž w Londonje podłu rěki Thames za něčim pyta, móže jónkrótne kruchi nańć. Tuž přeprošuje organizacija Thames Explorer Trust na pućowanje, zo bychu za pokładami pytali. Kaž archeologowka Vanessa Bunton rozkładźe, bě rěka za čas Romjanow najwjetša deponija wotpadkow. W zwisku z přiliwom a wotliwom wody w rěce so tam tuž zas a zaso njewšědne relikty na přibrjóh dóstawaja.
To a tamne (06.10.20)
Wšo, štož so błyšći, njeje hnydom złoto. To nazhoni nětko tež paduch, po tym zo je so do filiale banki w Bad Herrenalbje zadobył. We witrinje wuhlada wón błyšćatu dulu złota. Na to rozbi masiwnu škleńcu witriny, z čimž je škodu wjacorych tysac eurow zawinił. Kaž so wukopa, pak njejednaše so wo złoto, ale bě to jenož chětro derje wuhotowana atrapa.
Ze swěrnym přećelom so rozžohnować, hač je to kóń abo dalše domjace skoćo, je nětko w Schwäbisch-Hallskim zwěrjećim krematoriju móžno. Po słowach mějićelki pochowanskeho předewzaća Sandry Lutz móža konje swojich wobsedźerjow zdźěla hač do 40 lět přewodźeć. Tak su sej dostojne rozžohnowanje zasłužili. Ludźo poskića ludźom tež wosebite popjelnicy, samo w formje sedła. Dokelž za zwěrjata winowatosć pochowanja njewobsteji, smědźa sej ludźo jich popjeł zdźeržeć abo jón na lubowanym městnje roztrusyć.
To a tamne (05.10.20)
Irske sudnistwo ma sandwichi předewzaća Subway za słódkosć, dokelž wobsahuje wužiwany chlěb wjele wjace cokora hač předpisane. Tak njesłuša wudźěłk k zakładnym cyrobiznam a njeje hižo wot wobrotoweho dawka wuzamknjeny. Subway drje dale twjerdźi, zo přewjele dawka w Irskej płaći, rozsud sudnistwa pak je jasny. Swoje recepty ameriski žiwidłowy koncern tak jednorje změnić njemóže, wšako ma stejnišća we wjac hač 100 krajach po cyłym swěće.
Holly, Chunk abo Jumbo Jet, štó z cyłkownje 14 ćežkich požadarjow wubědźowanje jako najrjeńši mjedwjedź dobudźe. Holly z narodneho parka w Alasce bě sej loni titul kralowny zawěsćiła. Lětuša konkurenca pak je chětro wulka. K zazběhej t. mj. „Fat-bear“-tydźenja je hižo 140 000 fanow mjedwjedźow swój hłós wotedało. Dobyćerja jutře postaja.
