Pismikaj RB stejitej aktualnje za njepřestajnu debatu w koparskim swěće. Wšudźe so wo tym w němskich medijach rozprawja a tež na kromje serbskich sportnišćow so mócnje diskutuje. Kawsa RB Lipsk dźěli, kaž to tydźenja w nowinje LVZ čitach, přiwisnikow kopańcy kaž něhdy profet Mójzes Čerwjene morjo. Po kóncu tydźenja dóstanje tale tematika zawěsće přidatny pohon, dokelž je mustwo RB Lipsk po dobyću přećiwo Leverku­senej a po poražce Bayerow w Dortmundźe načolnistwo prěnjeje koparskeje zwjazkoweje ligi přewzało. Z tym do sezony zawěsće nichtó ličił njebě! Za někotrych woznamjenja to dotalny wjeršk dospołneho wutupjenja koparskeje kultury. Tamni widźa w tym skónčnje zaso šansu, zo bój wo němske mišterstwo na napjatosći dobywa.

Fakt je: W běhu jeno sydom lět poradźi so konstruktej RB Lipsk razantny postup z pjateje ligi na čoło tabulki prěnjeje koparskeje ligi. Prěni raz po 14 měsacach njesteja nětko Bayerojo na prěnim městnje, ale nowačk z Lipska.

„Christiano, pój!“ – „Ja njejsym Christian, ja sym Frederic!“ Tajku abo po­dobnu situaciju dožiwju nimale kóždu wutoru na treningu a zdźěla tež kónc tydźenja při hrach Ralbičanskeje młodźiny F. Třeće lěto sym tam nětko hižo trenar. Hišće ženje pak njemějach tajke ćeže z mjenami swojich chowancow. Čehodla­ pak? Zdźěla su wutoru popoł­dnju wjac hač 30 dźěći na delanskim trawniku a honja za bulom. Wězo stanje so mi při tym, zo raz te abo tamne mjeno zaměnju. Zo pak so mi tole pola Christiana a Frederica kaž tež Richarda a Ludwiga stajnje stawa, ma druhe přičiny. Wobaj porikaj staj dwójnikaj a so woprawdźe jenož­ w najmjeńšich detailach rozeznawaja. Te pak wot daloka hišće njespó­znaju a mi ničo druheho njezwostanje, hač mjena hódać. Najhórje wšak stajnje je, hdyž mataj wobaj při treningu hišće samsny trikot – a to so scyła tak zrědka njestanje. Langec a Ditrichec bratraj pak njejstaj jeničkaj dwójnikaj. Tež Frenclec Lavinia a Livius honitaj wuspěšnje za Sokołsku młodźinu F za bulom.