Potrjeba fachowcow wuchodosakske předewzaća dale wužada. Dopokaz toho su zdobom swobodne dźěłowe městna, kotrež su tudyše firmy Budyskej wotnožce zwjazkoweje agentury za dźěło w nowembrje přizjewili.

Budyšin (SN/at). Dźěłowa agentura rěči we wuchodnej Sakskej wo stabilnych dźěłowych wikach. Bjezdźěłnosć je w nazymniku wo 2,2 procentomaj resp. 371 wosobow na 17 571 stupała. Porno lońšemu nowembrej pak je to přirost wo 1 358 resp. 8,4 procenty.

Naprašowanje za dźěłowymi mocami je porno oktobrej w nowembrje woteběrało. Kaž dźěłodawarski serwis informuje, su twornje 675 nowych socialneho zawěsćenja winowatostnych dźěłowych městnow přizjewili, štož je ze 162 jobami něhdźe pjećina mjenje. Tele wuwiće nimale wšitke branše jenak potrjechi, rěka w měsačnej dźěłowičnej rozprawje Budyskeje agentury za dźěło. Jenož we wobłukach wobchad a składowanje, kubłanje a zdźěłowanje, w swobodnopowołanskich, wědomostnych a techniskich posłužbach kaž tež w gastronomiji je wjace wakantnych dźěłowych městnow. Po­dobne bě połoženje hižo w oktobrje.

Drježdźany (SN). Najebać hubjene konjunkturne wuhlady wostanje wukubłanje kruty wobstatk we wuchodosakskich rjemjeslniskich zawodach. Cyłkownje 484 žonow a 1 687 muži je hač do nowembra wukubłanje w rjemjeslniskim předewzaću Drježdźanskeho komorneho wobwoda zahajiło. Ličba nowych zrěčenjow wotpowěduje tym minjenych lět. Loni bě ze spočatkom nowembra dohromady 2 135 žonow a muži wukubłanje na wuchodźe Sakskeje zahajiło. „Wukubłanje je puć, z kotrymž rjemjeslniske zawody w regionje swojich fachowcow přichoda dóstanu“, zwurazni hłowny jednaćel Drježdźanskeje rjemjeslniskeje komory Andreas Brzezinski. „Při tym su šansy w rjemjesle jara dobre. Kročele wot wučomnika k mištrej, k firmowemu šefej, njejsu w rjemjesle rědke.“

K Drježdźanskemu komornemu wobwodej słušeja wokrjesy Mišno, Budyšin, Zhorjelc, Sakska Šwica-Wuchodne Rudne horiny kaž tež stolica swobodneho stata.

Budyšin (SN/bš). Někotre projekty kategorije „Łužica – žiwa dwurěčnosć“ idejoweho wubědźowanja SIMUL+, kotrež běchu 2021 wuznamjenjene, su so lětsa hižo přewjedli (SN rozprawjachu). Swój projekt pjekarske zjednoćenstwo tučasnje hišće přihotuje. „Motiwy serbskich nałožkow grafiska firma runje wuwije“, kaž jednaćelka Budyskeho wokrjesneho rjemjeslnistwa Sabine Gotscha-Schock na naprašowanje zdźěli. Wotpohlad je, motiwy na pjekarske tity ćišćeć a tute potom na pjekarjow zjednoćenstwa dale dać. Mjez mnohimi idejemi nałožkow, kotrež móhli na tity ćišćeć, chcedźa tři zwoprawdźić: chlěb a sól, kermuša, kmótřiska całta. Ideje za to nastachu w zhromadnym dźěle ze Załožbu za serbski lud. Dale budu na titkach k nałožkam so hodźace recepty wotbłyšćene, kotrež su pjekarjo wuwili. Ručež su naćiski za motiwy zhotowjene, budu tity čisćane. Planowane je, zo nowe tity klětu hač do kónca prěnjeho kwartala pjekarjam rozdawaja, rjekny Sabine Gotscha-Schock. Budyske pjekarske zjednoćenstwo je so prěni raz wo projekt w dwurěčnej kategoriji prócowało a za to 10 000 eurow zdobyło.

Agrarna towaršnosć „Am Eichberg“ kooperuje z Łazowskej gmejnu

Něhdźe 50 sypaniznowych kubiknych metrow drjewa skład skići. Wottam dóstawaja so třěski a włokniny z přewozom direktnje do spalernje. „Wšitko połno­awtomatisce běži. Technika hodźi so ­njekomplikowanje posłužować. Pospochi 24 hodźin móžemy drjewotřěskowu připrawu wužiwać. Cyłkowny wukon ­wučinja 150 kilowattow“, praji Lukas Beukelmann, jednaćel Šćeńčanskeje agrarneje towaršnosće „Při Dubiču (Am Eichberg)“. Na teritoriju zawoda ze sydom sobu­dźěłaćerjemi zastaruje připrawa maši­nowu halu, dźě­łarnju, sušenje žita kaž tež běrowowe a bydlenske twarjenja z ćopłotu. Klětu matej dwaj komunalnej bydlenskej blokaj w bjezposrědnym susodstwje k tomu přińć. Dom při Starej Budyskej dróze 52/54 z dwanaće bydlenjemi trjeba wukon ćopłoty 50 kilowattow. Dom na Nowošćeńčanskej 1 ze štyrjomi bydlenjemi trjeba ćopłotny wukon 20 kilowattow. Wobě twarjeni móže ­mjenowana připrawa přichodnje z ćopłotu zastarać.