Nowe ćahi su hižo na kolijach po puću
Komora ma jasne žadanja
Drježdźany (SN). Wosom z dźesać rjemjeslniskich firmow Drježdźanskeho komorneho wobwoda dyrbi dźensa wjace za energiju wudawać hač před lětom. Mjeztym zo so mnohe dotalne krizy jenož na mało branšow wuskutkowachu, je tónraz cyłe rjemjesło potrjechene.
Cyłkownje 80 procentow dźěłarnjow motorskich jězdźidłow přizjewi wyše energijowe kóšty, w twarskim rjemjesle je jich 79 procentow zawodow. Nimale wšitke předewzaća rozprawjeja wo stupacych płaćiznach za material a wo přetorhnjenych dodawanskich rjećazach. Jeničce wosom z 531 firmow, kotrež su so na naprašowanju wobdźělili, njeje ani wot toho jednoho ani wot tamneho potrjechene.
Myto za naslědnosć tež zawod z Wojerec dóstał
Hórnikecy (SN/BŠe). Zhorjelski a Budyski wokrjes stej wčera w Hórnikečanskej Energijowej fabrice 27. hornjołužiske předewzaćelske myto spožčili. Tak počesćichu tři regionalne zawody, kotrež so wosebje za temu naslědnosć angažuja.
Lětsa je znowa Marketingowa towaršnosć Hornja Łužica-Delnja Šleska (MGO) w nadawku wokrjesow předewzaćelow pytała, kotřiž z małych a srjedźostawskich firmow a klasiskich hospodarskich branšow, ale tež z kreatiwneho, turistiskeho a wólnočasneho hospodarstwa pochadźeja. Tohorunja dyrbjeli woni wobswěto- a socialnje znjesliwe hospodarić a z naslědnym wobchodniskim modelom jury přeswědčić. „Trajne předewzaćelske jednanje w ćežkich časach“ bě lětuše hesło wuznamjenjenja.
Naladaw rjemjesleje jara špatna
Drježdźany (SN). Rjemjesło na wuchodźe Sakskeje zhladuje z wulkej starosću do přichoda. To wujewja aktualne nazymske konjunkturne woprašowanje Drježdźanskeje rjemjeslniskeje komory. Porno lońšemu je nalada jasnje špatniša. Před lětom ležeše wobchodniska klima hišće pola 121 dypkow a nalěto pola 110 dypkow, nětko je jich jenož hišće 85 dypkow.
Předewšěm zaleži to na pesimistiskich wočakowanjach předewzaćow přichod nastupajo. Mjeztym zo maja předewzaća hišće wjele nadawkow, so firmy starosća. Wysoke energijowe płaćizny, sylnje přiběrace płaćizny materiala a surowiznow, stupace danje a přetorhnjene dodawanske rjećazy kaž tež inflacija předewzaća chětro znjeměrnjeja.
„Stupacych kóštow a runočasnje woteběraceho naprašowanja dla pola rjemjeslnikow tuchwilu hubjenu naladu wujewja. Někotre firmy starosća so wo swoju eksistencu“, zwurazni prezident Drježdźanskeje rjemjeslniskeje komory Jörg Dittrich. „Zo bychu so starosće předewzaćow pomjeńšili, dyrbi politika aktiwniša być. Přetož tajke wuwiće płaćiznow wobchodniske modele wohroža.“
Personal tuchwilu zdźeržliwši pytaja
Zamołwići rěča wo dale stabilnych dźěłowych wikach we wuchodnej Sakskej. Ličba 4 688 swobodnych dźěłowych městnow je wo 272 niša hač w septembrje, agentura za dźěło zdźěli.
Po prěnim warnowanskim stawku zawčerawšim pola Alstoma w Budyšinje ...
Třěchikryjerjo dóstanu wjace mzdy
Frankfurt n. M. (SN). Po dołhich a kontrowersnych jednanjach stej so wobě stronje tarifoweho zrěčenja třěchikryjerskeho rjemjesła na do přichoda sahacy tarifowy kompromis dorozumiłoj. Industrijne dźěłarnistwo twarstwo-agrar-wobswět (IG BAU) a Centralny zwjazk Němskeho třěchikryjerskeho rjemjesła (ZVDH) dojednaštej so, zo chcetej mzdy něhdźe 100 000 dźěławych k 1. nowembrej wo pjeć procentach zwyšić. Hižo klětu w oktobrje dóstanu dalše tři procenty wjace mzdy. Cyłkowna doba noweho tarifoweho zrěčenja skónči so w septembrje 2024. Přidatnje dóstanu přistajeni wurunanje jasnje stupacych žiwjenskich kóštow w formje bjezdawkoweje inflaciskeje premije we wysokosći 950 eurow, kotraž měła so z dwěmaj přiražkomaj w nalěću 2023 a 2024 wupłaćić.
Tež powołanski dorost w třěchikryjerskim rjemjesle móže so nad wjace pjenjezami wjeselić. Mzdu wučomnikow za kóžde wukubłanske lěto w dwěmaj kročelomaj powyša. Tak dóstanu wučomnicy w třećim wukubłanskim lěće přichodnje 1 260 eurow, wot oktobra 2023 su to potom 1 320 eurow.
Stawki na wuchodźe zahajene
Berlin/Budyšin (SN). Dźěłarnistwo IG metal Berlin, Braniborska, Sakska je po prěnim warnowanskim dnju w metalowej a elektroindustriji wčera přewšo spokojom. Cyłkownje su so něhdźe 1 600 sobudźěłaćerjow z Berlina na stawkach wobdźělili. „Dźěłodawarjow namołwjam, jasne signale chutnje brać a spěšnje polěpšeny poskitk předpołožić“, wuzběhny nawodnica jednanjow IG metal Irena Schulz.
800 protestowacych wutwori wčera před twornju BMW w Spandauwje čłowjeski rjećaz. Připołdnju stupi w Pankowje 600 kolegow před wrota zawoda Stadler. W nocy je nócna słužba twornje Mercedes rozsudźenosć přistajenych branše podšmórnyła.
Afričenjo so za truty zajimuja
W Kamjencu su sej wuwiće a činitosće dokładnje wohladali
Kamjenc (UM/SN). Na prěni pohlad skutkuje to kaž cyle normalne nahrawanje powětroweho wobraza z pomocu truta. Třěcha zelenych łopjenow ze štomow pokrywa nimale cyłu wobrazowku, tu a tam pak jewja so blaki, hdźež móžeš zemju widźeć. Módra płonina na wobrazowce pokazuje jedyn z mnohich hatow we wokolinje sewjernje Kamjenca. Naraz spóznaješ wjacore swětłe dypki. Jako sej wobraz we wjetšim rozpušćenju bliže wobhladaš, jewi so zadźiwanemu wobkedźbowarjej swójba šupow, kotraž so při brjoze hata pohibuje.
Scholz chce BASF wopytać
Carny Gózd (dpa/SN). Zwjazkowy kancler Olaf Scholz (SPD) chce wutoru 1. nowembra stejnišćo chemijoweho koncerna BASF w južnobraniborskim Čornym Gózdźe wopytać. Kaž předewzaće wčera zdźěli, budźe sej Scholz hromadźe z nawodom předsydstwa BASF Martin Brudermüller twar fabriki za katodowe materialije, kotrež so za produkciju baterijow wužiwaja, wobhladać.
BASF chce w swojej nowej připrawje we Łužicy katodowe materialije za 400 000 elektriskich jězdźidłow wob lěto zhotowjeć. Nimo toho twari koncern prototypisku připrawu za baterijowy recycling. Kaž předewzaće zdźěli, je zaměr, kołoběh produkcije zawrěć, zo bychu wodźacu poziciju w recyclingu litium-ionowych baterijow za awtowu industriju přewzali.
Dla negatiwneho hospodarskeho wuwića a ćešich ramikowych wuměnjenjow w Europje schwali wjednistwo BASF njedawno lutowanski program, kotryž chcedźa wot klětu hač do lěta 2024 zwoprawdźić. Skrótšić chcedźa hłownje w Ludwigshafenje, hdźež je sydło koncerna. Při tym předewzaće šmórnjenje dźěłowych městnow njewuzamkuje.
