Budyšin (CS/SN). Mjeztym štwórty króć běchu ludźo minjeny pjatk popołdnju na „pózdnju změnu“ přeprošeni. Je to wot Budyskeho měšćanskeho zarjadnistwa organizowana jězba, kotraž zmóžnja dohlad za kulisy wšelakich Budyskich zawodow. Někotre z cyłkownje dźewjeć čarow běchu spěšnje wuknihowane, tak tež čara čo. 6, kotraž wjedźeše mjez druhim k zhotowjerjej pisakow Edding a do Wulkodubrawskeho zawoda za graty prasowanskich wudźěłkow.
We Wojerecach tča wjelestronske hospodarske potenciale. Wuměnjenja za zasydlenje a infrastrukturu pak maja so dale polěpšić, zo bychu inwestorow do města wabili.
Wojerecy (AK/SN). „Mamy so hišće bóle zwičnjeć, přeco w dorěčenju z wokolnymi komunami. Mamy wodźacu rólu, a tejle zamołwitosći wotpowědujemy“, podšmórny wyši měšćanosta Torsten Ruban-Zeh (SPD) minjeny štwórtk, jako wopytachu sobudźěłaćerjo Helmholtzskeho slědźenskeho centruma Drježdźany-Rossendorf a Drježdźanskeje Techniskeje uniwersity Wojerecy, Lejno kaž tež Čornochołmčanski Krabatowy młyn.
„njumii“ rěkaja nowemu rjemjeslniskemu kubłanskemu centrumej w Drježdźanach. „Nastała je nowa domizna rjemjesła“, měnješe prezident Drježdźanskeje rjemjeslniskeje komory Jörg Dittrich na oficialnym přepodaću.
Drježdźany (SN/at). Metalotwarcy, elektrotechnikarjo, klempnarjo, drobnomechanikarjo a mechanikarjo za ratarske mašiny z cyłeje wuchodneje Sakskeje wuknu hižo wot lěta 2019 w jednym z najmodernišich wukubłanišćow Němskeje. Minjeny pjatk bu „njumii“ swjatočnje wotewrjene. Posrědkowanje fachoweje wědy njeje w kompleksu w Drježdźanach-Albertowym měsće na wěsty wobłuk wjazane. Kaž Jörg Dittrich rozłoži, „wuknu tu wukubłancy, rjemjeslniscy a mištrojo w samsnej měrje“. Runje tak móža sej šulerjo w praktikumach powětr rjemjeslniskich powołanjow wokoło nosa duć dać. Tež tajcy z wjelelětnymi nazhonjenjemi w swojej profesiji zhonja hódnu wědu za swoje wšědne dźěło. Zapřijaty zarjadowanski centrum je „městnosć zetkawanjow a za diskusije, kotraž bytostnje k wutworjenju měnjenjow w rjemjesle přinošuje“, je komorny prezident přeswědčeny.
Němska železnica je wčera w Choćebuzu nowe testowe polo za digitalnu techniku wotewrěła. Wone rozpřestrěwa so mjez delnjołužiskej metropolu, Halle nad Solawu na zapadźe a Niskej na juhu po třoch zwjazkowych krajach a ma wobdźělenym kónčinam perspektiwu po brunicowej dobje zmóžnić.
Choćebuz (SN). Wjetši klimowy škit, lěpše wodźenje wobchada z ćahami a mjenje hary, to wšo chce Němska železnica (DB) z digitalnej techniku docpěć, kotruž dyrbja testować. Zwjazkowy minister za wobchad Andreas Scheuer (CSU) rěčeše wčera w Choćebuzu wo „jónkrótnym projekće w Europje“, wo digitalnych wuhibkarnjach a kuplowanjach jako přikładach za planowane inwesticije. Z digitalnej techniku, na to skedźbni šef DB Netz Frank Sennhenn, hodźi so w padźe zapozdźenja za ćah po cyłej Němskej nowy jězbny plan wobličić a nahrawać. Po słowach braniborskeho ministra za infrastrukturu Guida Beermanna (CDU) je Łužica modelowy region za to, zasadźić inowatiwnu techniku na kolijach.
Rań (AK/SN). Pućowarjo móža nětko kołowokoło Rańskeho jězora pućować. Tež kolesowarjo njetrjebaja hižo ze šćežki wotbočić. Wo to starał je so zaměrowy zwjazk Łužiska jězorina Braniborska. Kolesowarska šćežka wokoło jězora je nětko tež we wobłuku Rěpišćoweje (Reppister) wyšiny kompletna. Asfaltowana šćežka je 2,8 kilometrow dołha a tři metry šěroka. „W dobrym stawje su elementy při wuhladnišću. Wudospołnili su je ze zwobraznjenjom płonin wotbagrowanych wsow. Tute elementy słuža dopomnjeću na hórnistwo w regionje“, informuje sobudźěłaćerka zwjazka Julia Kussatz. Wot měrca do junija 2021 běše zaměrowy zwjazk naprawu zwoprawdźił. Twarske kóšty za projekt wučinja 550 000 eurow brutto. Zapłaćił je jězorinowy zwjazk naprawu ze swójskich a ze srědkow po paragrafje 4 zarjadniskeho dorěčenja wo saněrowanju hórnistwa mjez Zwjazkom a krajemi. To su srědki k zwyšenju standarda w regionje, hdźež maja ze sćěhami hórnistwa wobchadźeć.