Koncern LEAG swój rewěrowy koncept přiměrił
Rumnostny wobłuk II Wjelčanskeje brunicoweje jamy dale njewjedu, Prožym wostanje. Runje tak planowanja za Rychwałdsku jamu pomjeńša, areal komandantury wojerskeho zwučowanišća Hornja Łužica w Holi njewotbagruja, kaž LEAG informuje.
Budyšin/Choćebuz (SN/at). Zakład rozsuda je wobzamknjenje zwjazkoweho sejma, kotryž je minjenu srjedu zrěčenju zwjazkoweho knježerstwa a wobhospodarjerjow milinarnjow nastupajo zakonske zakónčenje wudobywanja brunicy w Němskej přihłosował. Kaž koncern Łužiska energija a milinarnje (LEAG) zdźěli, je wuchadźejo ze zrěčenja „jasnje mjenje brunicy trěbneje, hač Łužiski rewěrowy koncept LEAG z lěta 2017 předwidźi“. Za wotbagrowanje Miłoraza pak widźi předewzaće „dale jasnu a dopokazujomnu energijopolitisku a energijohospodarsku trěbnosć“. LEAG je swoje rewěrowe planowanja přiměriła a chce prěnjotnje wotpohladanu produkciju swojich jamow pomjeńšić.
Wuměna nazhonjenjow je derje nałoženy čas
Na digitalny marketingowy puć so zwažić je mnohim wulke wužadanje. Tež turistikarjo maja so z nim rozestajeć. Runje nětko za čas pandemije so tež woni lochko nimaja. Za wuspěšnu sezonu dźě je zaměrne wabjenje trěbne. Digitalna syć skići za to móžnosće.
Wojerecy (SN/BŠe). Bjez zaměrneho marketinga wobchodnistwo dźensniši dźeń hižo prawje njefunguje. Kotre móžnosće pak maja mjeńše předewzaća we wobłuku digitalneje komunikacije, zo bychu kedźbnosć zbudźili? Na to wotmołwitej dźěłarničce, kotrejž turistiski zwjazk Łužiska jězorina darmotnje poskići. Prěnju přewjedu hižo jutřišu wutoru, tamnu planuja 27. januara. Organizatorojo z toho wuchadźeja, zo zakładne zrozumjenje za socialne medije hižo wobsteji.
Zarjadowani pod hesłom „Social Media Rockstar“ a „Content Kings“ wěnujetej so mjez druhim prašenjam: Kak zhotowju zrozumliwe a dobre teksty? Kak móžu ze swójskim smartfonom rjane motiwy za socialne medije třěleć a je wobdźěłać? Kak wobchadźam z platformami Facebook, Instagram a YouTube, z kotrychž powěsće sćelu? Kak wuznamne su jednotliwe słowa a symbole?
Za krutu strowotu trjebaja tež swinje sylny imunitny system
Nuknica (SN/BŠe). Wulke poćežowanja zmištrować maja tuchwilu tež ratarjo, zo bychu naprawy hygieny přećiwo afriskej swinjacej mrětwje dodźerželi. Přistup do zawoda biobura Marka Smoły w Nuknicy maja wopytowarjo tuž jeno we wosebitym wobleku. Tež wulke nakładne awta, na přikład z młynom, kotryž picu mlěje, dyrbja tam dokładnje rjedźić. A swoje škórnje biobur na wosebitych matach desinfikuje.
Přikładny to kołoběh
Hižo 30 lět wobhospodarja Ronny Kutschke w Šešowje swój wobchod ...
W milinarnjach a jamach z połnej paru dale dźěłaja
Hižo minjeny tydźeń bě so we Łužicy sněžiło. Tež wčera je so dosć sněha našło. Zo bychu ludźo stajnje ćopłe bydlenje a milinu měli, su łužiske milinarnje njeparujomne. Wone tuž z połnej paru dale dźěłaja.
Choćebuz (SN/BŠe). W prěnim tydźenju noweho lěta běchu štyri łužiske brunicowe jamy předewzaća Łužiska energija a milinarnje (LEAG) kaž tež jeho tři łužiske milinarnje w Braniborskej a Sakskej połnje wućežene. Runje nětko w ćmowym počasu zawěsćeja wone zastaranje ludnosće w Němskej z milinu. Wšako solarne připrawy a wětrniki tuchwilu wjele energije njeprodukuja. W minjenych dnjach bě jara mało słónca, a wětřika zdźěla tež žanoho njebě.
Konditarka a hižo pjekarska mišterka
Diana Pašcyna chce pozdźišo raz swójbnu pjekarnju w Chrósćicach dale wjesć
Spodobnje debjene torty, poprjancy a praliny nas cyłe lěto wabja. Někotre tajke wudźěłki su kaž wuměłske twórby. A wězo produkty konditarjow jara derje słodźa. Kreacije zhotowja mjez druhim tež Diana Pašcyna w Chrósćicach.
Pjekarstwo bu młodej žonje prawdźepodobnje do kolebki połožene. Wšako staj jeje staršej Zahrodnikec pjekarnju hnydom w swójskim domje załožiłoj. Swójbny projekt je ju tuž přez cyłe dźěćatstwo přewodźał a dobra wóń často do pječernje wabiła. Njezadźiwa tuž, zo je so nětko sama rozsudźiła, w swójbnym předewzaću dźěłać chcyć. „Wuchodźiwši Chróšćansku zakładnu šulu a Budyski Serbski gymnazij sym sej wědomje tónle puć wuzwoliła, byrnjež za powołanje konditarki abituru a tak dwě dalšej šulskej lěće njetrjebała. Ženje pak njewěš, dokal će puće wjedu“, młoda mać wuswětla. Nimo toho začuwaše so po złoženju matury za wukubłanje zrališa. „Tež dźensa njebych ničo hinak činiła.“
Rozćěkane wowcy w lěsu pytali
Wjelk stadło wowčerja Gerata Šmita nadpadnył
Smječkecy (SN/BŠe). Jako wowčer Gerat Šmit wčera na pastwu pola Smječkec přijědźe, bě wona prózdna a skoćata do wšěch kóncow rozćěkane. „Jedna wjetša skupina steješe na łuce, hnydom při prěnich chěžach wsy“, wón rozprawješe. Tamne wowcy su swójbni w běhu dnja w bliskim lěsu do směra na Róžant a Pěskecy namakali. Kelko wowcow je stadłu zwostało, njehodźi so dokładnje rjec. „Zwěrjata su spłóšiwe a ćěkaja, tuž njemóžu je ličić“, Hórčan wujasni. Tři wowcy, kotrež dyrbjachu lětsa porodźić, bě wjelk zakusał, šěsć dalšich je zranjenych.
Fachowcy wjelčeho běrowa su hišće wčera dopołdnja pokazki na pastwje zawěsćili. „Wjelk jako skućićel je wěsty, wšako su jeho slědy w sněze na pastwje widźeć“, Gerat Šmit rozłoži. Dale je spóznajomne, zo bě so stadło na dwěmaj blakomaj z pastwy wudobyło, po tym zo bě je wjelk honił. Hač wowčer za swoje mortwe skoćata zarunanje dóstanje, so pruwuje.
Byrnjež Jurij Młodźink w Róžeńće dawno hižo wuměnkar był, so ...
W lěće korony wjele wuknyli
Wo „lěće z wužadanjemi za nas wšitkich“ rěči Kathrin Groschwald, předsydka jednaćelstwa Budyskeje wotnožki Zwjazkoweje agentury za dźěło, zhladowaca na lěto korony 2020.
Budyšin (SN/at). Přerěznje 18 278 bjezdźěłnych, porno lětu 2019 wo 3,8 procentow wjetšu bjezdźěłnosć a pola předewzaćow zwěsćenych 10 068 socialneho zawěsćenja winowatostnych swobodnych dźěłowych městnow – to su dźěławosć Budyskeje wotnožki dźěłoweje agentury charakterizowace hrube ličby za minjene lěto. Zarjad je zhladowanje wčera w zwisku z aktualnymi ličbami dźěłowych wikow wozjewił.
