Zajim za dźěło a žiwjenje w domiznje dale jara wulki
Wosebje młodźi ludźo su před lětami pobrachowaceho dźěła w Budyskim wokrjesu dla do starych zwjazkowych krajow šli. Mnozy z nich chcedźa so zaso nawróćić, tu bydlić a dźěłać.
Budyšin (SN/JK). Po lońšim wuspěšnym zazběhu su organizatorojo, město Budyšin a krajnoradny zarjad kaž tež dźěłowa agentura a rjemjeslniska komora druhi raz přeprosyli zajimcow na bursu fachowcow w Budyskim hotelu Best Western.
Poslednja změna, ale žadyn kónc za łužisku brunicu
Choćebuz (SN/JK). Na kóncu změny je minjenu srjedu wječor posledni wuhlowy ćah jamu Choćebuz-sewjer wopušćił. Dwě lokomotiwje ćehnještej ćah ze 16 wagonami, nakładźenymi z 1 000 tonami wuhla, posledni raz do Janšojskeje milinarnje. Tak skónči so 40lětna doba wudobywanja brunicy na kromje Choćebuza.
Składnostnje historiskeho wokomika zhromadźichu so sta něhdyšich a nětčišich přistajenych energijoweho koncerna Vattenfall. Hromadźe z mnohimi hosćimi a zastupjerjemi krajneje a komunalneje politiki kaž tež hospodarstwa zhladowachu hišće raz na wuwiće wuhloweje jamy. Z jamy ma nastać najwjetši kumštny jězor Němskeje, 19 kwadratnych kilometrow wulki.
Poskitki dóšli
Choćebuz (SN). Za łužisku brunicowu spartu energijoweho koncerna Vattenfall su so štyrjo zajimcy z wotpowědnymi poskitkami přizjewili. Nimo třoch čěskich předewzaćow prócuje so tež němske Steag hromadźe z awstralskej inwestorskej skupinu Macquarie wo naslědnistwo šwedskeho koncerna. Po informacijach nowiny Westdeutsche Allgemeine Zeitung leži poskitk Steag w třicyfrowym milionowym wobłuku. Wuprajiło so předewzaće k tomu njeje. Tež koncern Vattenfall sam je so komentarow k dotalnym poskitkam wzdał. Nimo Steag zajimuja so za brunicowu spartu Vršanská Uhelná, ČEZ a EPH, kotrež je zhromadnje z financnym koncernom PPF swój poskitk před dnjomaj zapodało. Podźěl na poskitku Vršanskeje Uhelny ma čěski miliardar Pavel Tykač.
Vattenfall trochuje hódnotu brunicowej sparty na dwě do tři miliardy eurow. Hač do kónca januara wjednistwo rozsudźi, kotry poskitk chutnje a dokładnišo pruwuje. Koncernej EPH słuša hižo srjedźoněmske předewzaće Mibrag, kotrež ma swoje sydło w saksko-anhaltskim Zeitzu.
Nowe blido wužadanje było
Wosebity dar, kotryž sej młoda serbska swójba jutře, patoržicu, sama wobradźi, je minjene dny a tydźenje w dźěłarni Worklečanskeho blidarskeho mištra Pětra Handrika nastał.
Worklecy (SN/MWj). Wočakuješ-li doma wjetšu hosćinu, dyrbiš zwjetša dwě abo wjacore blida do dołheje tafle zestajeć. Tule starosć młoda serbska swójba wotnětka hižo njezměje. Jej je Worklečanski blidarski mišter blido zdźěłał, kotrež hodźi so hač na 5,30 metrow rozćahnyć, tak zo ma 22 ludźi za nim městno. Ale samo w začinjenym stawje je blido přeco hišće 2,30 metrow dołhe a skići něhdźe dźesać ludźom městno. Spočatk tydźenja je Pětr Handrik poslednje dźěle lakěrował, dźensa chcyše je nadawkarjej dowjezć.
Za tón pad, zo temperatury spadnu
Dalše FLEXITY za němsku stolicu
Berlinske wobchadniske předewzaće BVG ma dźeń a wjac ludźi transportować. Zo by nadawk zmištrowało, je pola Bombardier dalše tramwajki a přidatne tramwajkowe wozy skazało.
Budyšin/Berlin (SN). Wodźacy producent železniskeje techniki Bombardier Transportation budźe 47 přidatnych FLEXITY tramwajkow za Berlin twarić. Aktualny nadawk je skazanska opcija z wobłukoweho zrěčenja z lěta 2006 za twar 206 jězdźidłow za Berlinske wobchadniske zawody (BVG). Wobłuk aktualneho nadawka wučinja 176 milionow eurow. BVG su hižo štyri wozy předchadźaceho typa k wupruwowanju kaž tež 99 tramwajkow w lěće 2009 a 39 dalšich w lěće 2012 skazali. Ličba cyłkownje skazanych wozow powjetša tak na 189. Zo bychu přiběracej ličbje pasažěrow wotpowědowali, podlěši BVG 20 tramwajkow wo dwaj přidatnej wozaj na sydom wozow. Z pomocu FLEXITY-systema so to bjez problemow hodźi.
„Ze skazanku dalšich 47 FLEXITY- tramwajkow a zasadźejo dlěše ćahi reaguje BVG na wužadanja, nastawace z dale rosćaceje němskeje stolicy nastanu“, podšmórnje Klaus-Dietrich Matschke z BVG.
Posledni ćah pojědźe srjedu
Wuhlowa jama Choćebuz-sewjer je jedna z łužiskich pjeć hišće aktiwnych koncerna Vattenfall. Wuhlo su w Janšojskej milinarni zmilinili. Nětko přestanu w jamje brunicu wudobywać.
Choćebuz (SN/JK). Budźe to zawěrno historiski wokomik, hdyž wopušći srjedu na kóncu změny posledni wuhlowy ćah jamu Choćebuz-sewjer do směra na Janšojsku milinarnju. Po 34 lětach njebudu blisko Choćebuza hižo brunicu wudobywać. Z něhdy 17 łužiskich wuhlowych jamow budźetej energijowy koncern Vattenfall a pozdźišo nowy mějićel brunicoweje sparty jenož hišće w štyrjoch jamach za łužiskim złotom ryć.
Wot lěta 1981 su w Choćebuskej jamje brunicu wudobywali, hač do dźensnišeho dohromady 220 milionow tonow. W jamje njeležeše wona hłuboko a jeje woršta bě wosom do dźesać metrow tołsta. Brunicu wožachu wot spočatka do Janšojskeje milinarnje, wšědnje 60 000 tonow. Jama Choćebuz-sewjer je jenička, z kotrejež jězdźachu wuhlowe ćahi direktnje do milinarnje.
Rozsudy trěbne
Choćebuz/Düsseldorf (SN). Energijowy koncern Vattenfall prosy po informacijach powěsćernje dpa wšitkich zajimowanych kupcow brunicoweje sparty, zapodać hač do hód wotpowědny, njezawjazowacy poskitk. Spočatk lěta potom rozsudźa, kotreho zajimca hospodarsce hłubšo pruwuja. Vattenfall sam nochce so k předawanskemu procesej wuprajić.
Rozprawy, zo so nimo čěskeju předewzaćow ČEZ a EPH tež němski energijowy koncern Steag wo přewzaće brunicoweje sparty prócuje, rěčnik Vattenfalla wotpokaza. „Njewjedźemy rozmołwy a njejsmy žane kontakty nawjazali“, wón kónc tydźenja w Düsseldorfje potwjerdźi.
Energijowy koncern Vattenfall ma hač k doskónčnemu rozsudej hišće tójšto problemow rozrisać. Pólskej gmejnje Gubin a Brody stej koncern na narunanski pjenjez wobskoržiłoj. Jako wuskutk bliskeju wuhloweju jamow Janšojce a Choćebuz-sewjer matej so wonej z problemami při zastaranju z pitnej wodu bědźić. Wodu, kotraž ma přewulki podźěl železa, dyrbja přidatnje rjedźić. Přičinu wysokeje koncentracije widźitej pólskej komunje w bliskimaj jamomaj Vattenfalla.
Efektiwnje tepić njeje kumšt
Worklecy/Kamjenej (SN/JK). Tuchwilne nimale nalětnje temperatury a niske płaćizny wolija wobsedźerjow domow zwjeseleja. Takle hodźi so na přijomne wašnje lutować.
Za lěpšu klimu
Drježdźany (SN). Z widom na wuslědki mjezynarodneje klimoweje konferency minjenu sobotu w Parisu je prezident Drježdźanskeje rjemjeslniskeje komory dr. Jörg Dittrich hódnoćił přinošk sakskeho rjemjesła za škit wobswěta a łahodne wužiwanje přirodnych resursow. „Wjele toho, štož je wobstatk wšědneho dźěła rjemjeslnikow, słuži zaměrej zachowanja a škita wobswěta. Poćah mjez ekonomiju, ekologiju a socialnymi naležnosćemi rjemjesło čile pěstuje“, wón podšmórny. Wone jenož regionalnje njeprodukuje, ale poskića tu tež swoje wudźěłki a posłužby z regionalnym poćahom.
W nowinarskej zdźělence wuzběhny zdobom Jörg Dittrich wažnosć rjemjesła jako multiplikator při zwoprawdźenju naprawow wobswětoweho a klimoweho škita. W tym zwisku napomni prezident rjemjeslniskeje komory politikarjow, wuworić trěbne wobłukowe wuměnjenja. Wosebje při zhotowjenju žiwidłow ma so rjemjesło z mnohimi běrokratiskimi ćežemi ze stron Europskeje unije bědźić. Dittrich sej tohodla tež žada, zakoń wo wobnowjomnych energijach (EEG) na dobro rjemjesła sprawnje rjadować.
