Předsydstwo Serbskeho šulskeho towarstwa (SŠT) je na wčerawšim posedźenju wobzamknyło, zo swojich „wosom žadanjow za serbske šulstwo“ na wšitke frakcije Sakskeho krajneho sejma pósćele. Zdobom chcedźa z listom wo stejišćo frakcije k podatym žadanjam a wo rozmołwu prosyć.
Prolog
Žurla „Vis-à-vis“ we Wojerecach. Rynki stólcow so pomału pjelnja. Wotboka přišeptnje mi něchtó: „Dźensa je najmjenje ludźi přišło.“ Něhdźe 40 jich přiwšěm je, 30 ludźi so přez livestream wobdźěla. Hladaja wćipnje na podij, za kotrymž je na sćěnowinje widźeć: 4. Serbska debata. Tema dźensa: Štó zastupuje serbski lud? Přichod politiskeje participacije.
Participacija, što da to nětko zaso je? Mały ekskurs: za cuzym słowom chowa so jako serbski přełožk wobdźělenje abo tež sobupostajowanje. Debata ma potajkim wuslědźić, štó móhł serbski ludźik w přichodźe na parkeće wulkeje politiki zastupować.
Hórnikowe dny na Worklečanskej wyšej šuli su šulerjow, wučerjow a referentow krótko do jutrow do wosebiteho cyłka zjednoćili. Milenka Rječcyna je so ze šulskej nawodnicu Dianu Šołćinu rozmołwjała.
Šulerjo Michała Hórnika zasadnje znaja. Wón je w běhu kóždeho šulskeho lěta na wšelake wašnje tema wuwučowanja. Z kotreje přičiny sće tajke dny wuhotowali?
D. Šołćina: Tale tema je so za šulske lěto poskićiła, dokelž mamy 190. posmjertne narodniny a 130. posmjertniny Hórnika. A naša šula lětsa jeho mjeno 30 lět nosy. Tuž smy ideju zrodźili, zo tute lěto „Hórnikowe lěto“ pomjenujemy. Tuž su so wšitke dźěłarnički projektnych dnjow wokoło Michała Hórnika wjerćeli. Spočatk šulskeho lěta smy 1. septembra při pomniku Hórnika na jeho posmjertne narodniny spominali.
Z kotrych poskitkow sće na Hórnikowych dnjach čerpali?