Krótkopowěsće (30.08.22)
Protokole digitalnje přistupne
Budyšin. Dalšich 243 aktow Budyskeho měšćanskeho archiwa je digitalizowanych. Jedna so wo protokole zhromadźiznow Budyskich měšćanskich zapósłancow wot 1832 hač do 1945. Wone dokumentuja nastaće a dźěło w měrcu 1831 prěni raz woleneho wobydlerskeho zastupnistwa. Do toho bě jenož wosobam z priwilegowanych kruhow přistup k měšćanskim gremijam móžny. Protokole su nětko online přistupne.
Najsłónčniše lěćo scyła
Offenbach. Lětuše lěćo je po dotalnych ličbach Němskeje wjedroweje słužby najsłónčniše zašłych 70 lět. Dohromady su inkluziwnje prognozy hač do kónca měsaca 817 słónčnych hodźin naměrili. Dotalny rekord bě lěćo 2003 ze 793 hodźinami słónca w Němskej. 1951 su započeli zapisować, kak dołho słónco swjeći.
Nowinka při „wuchodźowanju“
Krótkopowěsće (29.08.22)
Mytuja projekty digitalizacije
Drježdźany. Sakske ministerstwo za hospodarstwo, dźěło a wobchad spožči lětsa prěni raz „Sakske digitalne myto“ za „inowacije na polu digitalizacije“. Hač do 2. septembra móža w swobodnym staće bydlacy namjety we wobłukach „towaršnosć“, „hospodarstwo“ a „open source“ zapodać, a to pod https://buergerbeteiligung.sachsen.de. Dobyćerjam kiwaja myta w hódnoće cyłkownje 165 000 eurow.
Sezona hribow so hišće dliji
Lipsk. Hribowa sezona so lětsa w Sakskej jenož pomału zahaji. Lěto bě dotal jara suche a tež dešća njeje so minjene dny wšudźe dosć našło. Zo bychu hriby rostli, trjebaja wone spadki, rjekny Heike Bunk, kotraž je w Lipsku jako poradźowarka za hriby zasadźena. Njezmějemy-li temperatury wyše 30 stopnjow celsiusa a změjemy-li dalše spadki, móhła w přichodnych tydźenjach prěnja prawa žołma hribow być.
Wětrnikowy megapark
Krótkopowěsće (26.08.22)
„Sorbisch? Na klar.“ z podcastom
Drježdźany. Pod hesłom „Tu móžeće sej něšto naposkać!“ poskići imagowa kampanja „Sorbisch? Na klar.“ nětko tež podcast. W nim maja připosłucharjo móžnosć, serbske wosoby zeznać. W premjernej epizodźe je Delnjoserbowka Hella Stoletzki z hosćom. Jako jingle přewodźa podcast spěw „Dwaj Hrodaj“ skupiny Astronawt. (Čitajće tež w Předźenaku.)
Smjerdźečenjo w Strakonicach
Strakonice. Na 24. mjezynarodnym festiwalu dudakow w čěskich Strakonicach wobdźěli so wot wčerawšeho hač do njedźele Serbska rejwanska skupina Smjerdźaca. Nimo 20 rejwarkow a rejwarjow, dweju dudakow a dalšich hudźbnikow z Łužicy předstaja tam 16 dalšich skupin ze Słowakskeje, Chorwatskeje, Běłoruskeje a Pólskeje swój program.
Z łódźu po Berzdorfskim jězorje
Krótkopowěsće (25.08.22)
Wukony babow zawěsćene
Lipsk. Zastaranje z wukonami babow je po informaciji strowotniskeho ministerstwa w Sakskej zaručene. Wot lěta 2018 su 116 powołansce swobodnje skutkowacych babow při załoženju eksistency ze spěchowanjom 5 000 eurow podpěrali, kaž zdźěli ministerstwo dźensa w Lipsku. Tam bě ministerka Petra Köpping (SPD) wo zwoprawdźenju dopóznaćow ze studije wo babach (2019) rozprawjała.
Předewzaćelske myto wupisane
Zhorjelc. 27. hornjołužiske předewzaćelske myto bu dźensa w Zhorjelcu wupisane. Lětsa chcedźa firmy za swój wusahowacy angažement k temje „Naslědne předewzaćelske jednanje we wužadowacych časach“ wuznamjenić. Wo tym informowaše Marketingowa towaršnosć Hornja Łužica-Delnja Šleska. Namjety maja hač do 28. septembra zapodate być, formular za to steji pod .
Skórnik sakske lěsy wohroža
Krótkopowěsće (24.08.22)
Hladanske mocy časćišo chore
Drježdźany. Přistajeni w hladanju starych a chorych w Sakskej su po datowej analyzy Chorobneje kasy technikarjow (TK) jasnje dlěje chori hač přisłušnicy druhich powołanskich skupin. Woni su loni přerěznje wjace hač dźesać dnjow dlěje wupadnyli. Mějachu-li wšitcy dźěławi loni w Sakskej w přerězku 15,2 dnjej njepřitomnosće bě to pola hladarkow a hladarjow 25,8 dnjow.
Pomocny program schwaleny
Drježdźany. Program k hnydomnej pomocy z wobjimom nimale dweju milionow eurow žałostnych lěsnych wohenjow w Sakskej Šwicy dla je sakske knježerstwo wčera schwaliło. Wot ministerstwa za wědomosć, kulturu a turizm nastorčena podpěra měri so na předewzaća hospodowarstwa a gastronomije kaž tež dalšich turistiskich posłužbarjow w regionje narodneho parka Sakska Šwica.
Žony a strukturna změna
Krótkopowěsće (23.08.22)
Fonds za krute pady zarjadować
Drježdźany. Sakska socialna ministerka Petra Köpping na zarjadowanju fondsa za krute pady wysokich płaćiznow za energiju dla wobstawa. Ministerski prezident Michael Kretschmer (CDU) a hospodarski minister Martin Dulig (SPD) staj wobaj potwjerdźiłoj, zo je tajke něšto trěbne, rjekny politikarka SPD wčera w Drježdźanach. „Tuž njemóže to změrowanska pila być, ale ma so stać z realitu.“
Termin zapodaća podlěšeny
Zhorjelc. Zapodaće podłožkow za 14. wuměłske přesadźowanje je Załožba za wuměłstwo a kulturu w Hornjej Łužicy hač do 28. awgusta podlěšiła, kaž Zhorjelski krajnoradny zarjad zdźěla. Twórby, kotrež maja so přesadźować, prezentuja w Muzeju Budyšin we wosebitej přehladce wot 9. hač do 22. septembra. Tam budźe tež přesadźowanje 24. septembra.
Podpěra městu Choćebuz
Krótkopowěsće (22.08.22)
Kubšicy a Hamor na čole
Budyšin. Trajacy dešć kónc tydźenja je tež w Hornjej Łužicy přirodźe přewšo tył. W nocy wot soboty na njedźelu su w Kubšicach a Hamorje w běhu 24 hodźin 77,4 litry resp. 72,2 litraj na kwadratny meter naměrili. Wobě komunje mjenowaše Němska wjedrowa słužba jako načolnikow. Pomróčenje w běhu dnja přiběra, za nóc wočakuja dalše spadki.
Label LABA so wobara
Zhorjelc. Hornjołužiski modowy label LABA wobara so na Drježdźanskim wyšim krajnym sudnistwje přećiwo rozsudej krajneho sudnistwa Zhorjelc, zo njesmě t-shirt z portretom žony na zakładźe mólby Hanki Krawcec hižo předawać. Po měnjenju labela njewobsahuje wusud zakładne prašenje za poměrom mjez prawom na swójskim wobrazu a wuměłsku swobodu.
1 968 krónow za Ukrainu
Krótkopowěsće (19.08.22)
Warnuja před njewjedrom
Berlin/Budyšin. Po tydźenjach suchoty a wulkich lěsnych wohenjow je Němska wjedrowa słužba dźensa před lokalnje ćežkimi hrimanjemi na wuchodźe a sewjerowuchodźe kraja warnowała. Za wječor njewjedram podobne wuwiće njewuzamkuja. W nocy na sobotu wočakuja nad Łužicu sylne pomróčenje, móhło tež k spadkam z hrimanjom a sylneho dešća dla k njewjedram dóńć.
Koronainfekcije dale traja
Budyšin. W prózdninskim času bu wuwiće infekcijow z koronawirusom tróšku do pozadka stajene. Pandemija pak hišće přetrata njeje. Wo tym swědči 154 nowych natyknjenjow w Budyskim a 109 w Zhorjelskim wokrjesu, wo kotrychž Roberta Kochowy institut dźensa informuje. Incidenca we wokrjesu Budyšin je 291,3, ta we wokrjesu Zhorjelc 235,1.
Słuchokniha nětko tež jako mp3
Budyšin. W Ludowym nakładnistwje Domowina njedawno wušła słuchokniha „Flockdownkino“ Měrany Cušcyneje je nětko tež jako mp3 download přistupna. Tam čita awtorka sama wubrane teksty ze zběrki krótkoprozy „Stop a stup“ z lěta 2021. Za 7,50 eurow hodźi so na internetnej stronje kupić.
Měšćanski běh kaž loni
Krótkopowěsće (18.08.22)
Spěchuja Kulturnu fabriku
Wojerecy. Wuznam Wojerowskeje Kulturneje fabriki jako „socialnu městnosć“ chcedźa powyšić, za to Sakska srědki přewostaja. Sociokulturny centrum změje něhdźe 265 000 eurow hač do lěta 2024, wozjewi socialna ministerka Petra Köpping (SPD) wčera při wopyće we Wojerecach. „Trjebamy tajke městna zhromadnosće a spěchujemy je z našim krajnym programom.“
Wohenje a grilowanje zakazane
Budyšin. Wotewrjene wohenje a grilowanje na arealu při Budyskim spjatym jězoru su trajaceje suchoty dla nachwilnje zakazane. Wo tym je tudyše měšćanske zarjadnistwo wčera informowało a na to skedźbniło, zo je strach wudyrjenja lěsnych wohenjow dale njesměrnje wulki. Zakaz měri so runje tak na zjawne wohnišća při spjatym jězoru.
Čěske plany w Ukrainje
Krótkopowěsće (17.08.22)
Mjenje wohnjowych wobornikow
Bad Schandau. Połoženje při lěsnym wohenju w Sakskej Šwicy so změruje. Tak njejsu hižo telko wohnjowych wobornikow trěbnych kaž dotal. Kaž krajnoradny zarjad Sakska Šwica-Wuchodne Rudne horiny zdźěli, su ličbu zasadźenych mocow na 370 zredukowali. Woheń, kotryž bě so 25. julija z Čěskeje Šwicy na Saksku Šwicu rozšěrił, je tam 150 hektarow wulki teren zničił.
Niše žiwjenske wočakowanje
Wiesbaden. Žiwjenske wočakowanje w Sakskej je za čas koronapandemije sylnje wotběrało. Wone ležeše pola nowonarodźenych hólcow 2021 nimale połdra lěta niže hač do pandemije, pola nowonarodźenych holcow tróšku wjace hač lěto. Wo tym je Zwjazkowy institut za ludnostne slědźenje we Wiesbadenje dźensa informował. Spady w tajkim rozměrje su slědźerjo posledni raz ke kóncej NDR zwěsćili.
Turisća tuchwilu faluja
