Tomaš Žur hraje
Dróha zawrjena
Lejno. Wot 1. hač do 19. awgusta ponowja wokrjesnu dróhu K 9211 w Lejnom (Geierswalde) pola Wojerec we wobłuku křiwicy při hosćencu „Zur Grubenlampe“. Twarskich dźěłow dla budźe dróha w mjenowanym času dospołnje zawrjena. Wobjězd budźe wupisany.
Informuja wo dźěle rangerow
Stróža. Přirodoškit w najwšelakorišich formach steji w srjedźišću 11. rangeroweho dnja biosferoweho rezerwata Hornjołužiska hola a haty jutře, sobotu, w Stróži pola Hućiny. Wot 10 do 16 hodź. móža mali a wulcy wopytowarjo na dworje zarjadnistwa biosferoweho rezerwata kaž tež na přirodnodožiwjenskej šćežce při Hućinjanskich hatach zajimawosće wo dźěle rangerow zhonić.
Z kolesom putnikować
Smochćicy. „Mjez časom a wěčnosću – Putnikowanje z kolesom w žiwjenskich fazach změny a přewróta“ rěka zarjadowanje, na kotrež přeprošuje Smochčanske kubłanišćo swj. Bena wot srjedy do njedźele, 31. awgusta do 4. septembra. Mjez druhim wopytaja wobdźělnicy Zhorjelc, Kulow a Worklecy. Přizjewjenja přijimuja hač do srjedy, 10. awgusta.
Krječmar zaso nawjeduje
Lejno. 27 škotowarjow, mjez nimi jedna škotowarka, je so předwčerawšim na škotowym turněrje serbskich seniorow w Lejnje wobdźěliło. Z Křesćanom Donatom móžachu nowačka witać. Najwuspěšniši bě tónraz Manfred Rohark z 2 980 dypkami před Herrmanom Wokom (2 773) a Achimom Mejglom (2 653). Po sydom hrajnych kołach nawjeduje nětko zaso Herbert Krječmar před Siegfriedom Rawu a Wolfgangom Kühnom. Přichodny turněr wotměje so 30. awgusta w Radworju.
Přeprošuja na swjedźeń
Serbske Pazlicy. Z natočenjom piwa a wubědźowanjom hornjeje přećiwo delnjej wsy započnje so jutře, pjatk, wjesny swjedźeń w Serbskich Pazlicach. Wječor sćěhuja lampionowy ćah za dźěći a reje. Sobotu w 13 hodź. pokročuja z koparskim turněrom wjesnych mustwow a w 15 hodź. ze zabawu za dźěći. K rejam zahudźi wot 21 hodź. kapała Logarhythmus. Něhdźe w 23 hodź. předstaji młodźina swój program. Njedźelu poskićuja wobjed z pólneje kuchnje. Wot 15 hodź. budźe swójbny swjedźeń z kapału Horjany kaž tež z dźěćacym a młodźinskim programom. Wšitcy zajimcy zbliska a zdaloka su witani.
„Lózy hólcy“ wustupja
Křižowanišćo zdźěla zawrjene
Termin wobkedźbować
Budyšin. Załožba za serbski lud skedźbnja na to, zo je 31. julija 2022 posledni termin za zapodaće próstwow wo přizwolenje srědkow załožby za projekty w lěće 2023 ze spěchowanskej sumu nad 10 000 eurami. Próstwy, kotrež po tutym terminje dochadźeja, njemóža tam wobkedźbować. Próstwy za projekty prěnjeho połlěta 2023 ze spěchowanskej sumu pod 10 000 eurami maja hišće hač do 30. septembra 2022 chwile. K tutomu terminej skónči so tež doba zapodaća próstwow wo pjenjezy ze spěchowanskeho programa „Serbska rěč a kultura w strukturnej změnje“. Wobšěrne informacije, spěchowanskej směrnicy a aktualne trěbne formulary nańdu zajimcy na internetowej stronje załožby pod .
Dróha zawrjena
Delnja Kina. Hač do 5. awgusta je Stara wjesna dróha w Delnjej Kinje při wotbóčce na zwjazkowu dróhu B 156 za nadróžny wobchad zawrjena. Tam twarja nowy płunowód. Wot zawrjenja potrjechena je tohorunja měšćanska busowa linja 13 (Marktkauf – Delnja Kina – Bórk). Při woběmaj busowymaj zastanišćomaj w Delnjej Kinje bus w mjenowany času njezastanje.
Premjera knihi
Na swójbny swjedźeń
Pančicy-Kukow. Na dźěćacy a swójbny swjedźeń přeprošuje Domowinska skupina Pančicy-Kukow njedźelu, 24. julija, wot 15.30 hodź. na Kukowske hrodźišćo. Zhromadnje z Pančičansko-Kukowskim młodźinskim klubom změja tam wšelake zabawy kaž šminkowanje, kopańcu, molowanje a dalše přihotowane. Tež na serbsku bajku budu wopytowarjo słuchać móc. Poskićeć budu kofej a tykanc kaž tež napoje za dźěći a dorosćenych.
Wutoru zaso škot
Lejno. Přichodny škotowy turněr serbskich seniorow wotměje so wutoru, 26. julija, wot 14 hodź. w Lejnjanskim hosćencu. Wšitcy swěrni škotowarjo su zaso přeprošeni, tež nowačkojo, kaž organizator Měrćin Nowak zdźěli. Dalši turněr wotměje so potom 30. awgusta w Radworskim hosćencu „Zelena hałžka“.
Premjera knihi
Budyšin. „Čas ma křidła“ rěka nowa w Ludowym nakładnistwje Domowina wušła kniha, kotraž změje štwórtk, 28. julija, w 19 hodź. w Budyskej Smolerjec kniharni premjeru. Z pěsnjemi, hrónčkami a fabulemi wěnujetaj so zestajerka Marka Maćijowa a Fabian Kaulfürst žiwym facetam tworjenja Handrija Zejlerja a předstajitaj nowu zběrku jeho žiwjenskich mudrosćow.
Dróha zawrjena
Budyšink. Wotrězk wokrjesneje dróhi K7219 mjez Budyšinkom a Poršicami w Malešanskej gmejnje je hač do 26. awgusta twarskich dźěłow dla dospołnje zawrjeny. W tym času w Budyšinku žane busy při busowym zastanišću njezastawaja. Nachwilnje zarjaduja busowe zastanišćo při awtodróhowym mosće při wotbóčce puća wot Poršic do Skanec.
Zaso wjace wopytowarjow
Budyšin. Ličba přenocowanjow wopytowarjow Budyšina bliži so zaso niwowej do korony. Kaž měšćanske zarjadnistwo zdźěli, zličichu w aprylu 5 591 hosći, štož wučinja něšto wjace hač 13 000 přenocowanjow. Přerěznje wostachu ludźo 2,3 dny w měsće. W aprylu 2019 mějachu 6 433 wopytowarjow z 15 414 přenocowanjemi.
W prózdninach do muzeja
Radźićeljo wuradźuja
Pančicy-Kukow. Po dołhim dlijenju twarskich dźěłow móže so gmejnska rada Pančicy-Kukow jutře w 19 hodź. k swojemu posedźenju prěni raz zaso w awli Šule Ćišinskeho zetkać. Mjez druhim zaběraja so radźićeljo z hospodarskim planom 2022. Dale steji na dnjowym porjedźe planowanske zrěčenje za wutwar kružneho wobchada w Zejicach. Wšitcy wobydlerjo su wutrobnje přeprošeni.
Biblioteka přećehnje
Kamjenc. Wot dźensnišeho je Kamjenska měšćanska biblioteka přećaha dla zawrjena. W přichodnych pjeć tydźenjach dyrbja něhdźe 33 000 knihow a dalšich medijow na techniku RFID přestajić. Na to dowjezu wšón wobstatk do nowych rumnosćow biblioteki na Wuchodnej čo. 16. Hač do njedźele Kamjenskeje Boršće (21. awgusta), hdyž twarski kompleks Lessingoweho gymnazija přepodadźa, ma wšitko na městnje być. Dwutydźenskeje testoweje fazy dla pak wotewru biblioteku hakle wot 2. do 4. septembra ze swjedźenskim kóncom tydźenja.
Tangenta połojčnje zawrjena
We wsy wulce swjeća
Sulšecy. Z natočenjom piwa, wubědźowanjom dobrowólnych wohnjowych wobornikow staršich hač 40 lět kaž tež z rejemi za młodych a staršich započnje so dźensa wjesny swjedźeń w delnich Sulšecach. Jutře wot 13 hodź. přewjedu 8. wubědźowanje w třělenju jědnatkow z mustwami regiona. Wječor budu reje pod hesłom „WiesnBeats“. Njedźelny wjeršk budźe wot 16 hodź. swjedźenski program Sulšečanskich žonow pod hesłom „Běše raz a njepřińdźe zas“. Tež wjesna wjeta pobrachować njebudźe.
Załoža młodźinsku woboru
Radwor. Swjedźeń wohnjoweje wobory wotměje so wot dźensnišeho do njedźele při Radworskej wohnjowobornej gratowni. Dźensa wot 18 hodź. přeprošuja tam na natočenje piwa a grilowanje. Jutře w 15 hodź. załoža oficialnje Radworsku młodźinsku wohnjowu woboru. Nimo toho demonstruja dźěło wobornikow a prezentuja swoju techniku. Wječor budu reje w gratowni. Njedźelu přizamknje so wot 10 hodź. rańše piwko. Wo ćělne derjeměće so kameradojo na wšěch dnjach postaraja.
Wotewru wustajeńcu
Wodźa po pohrjebnišću
Budyšin. We wobłuku kabinetneje wustajeńcy wo židowskich stawiznach w Hornjej Łužicy w Budyskim muzeju wotměje so srjedu, 13. julija, we 18 hodź. wodźenje po Budyskim židowskim pohrjebnišću na Mužakowskej 67. Pod hesłom „Dom wěčnosće“ powjedźe muzeologa Hagen Schulz do stawiznow 1906 zapołoženeho pohrjebnišća a rozprawja wo wosudźe ludźi, kotřiž su tam posledni wotpočink našli. Wodźenje je darmotne. Wšitcy mužojo maja na wodźenju čapku nosyć.
Prózdninske poskitki
Wojerecy. Tež lětsa ma Wojerowski kompjuterowy muzej Konrada Zusy wšelake prózdninske poskitki. Na přichodnych štyrjoch pjatkach wot 15. julija wotměja so stajnje wot 13 do 16 hodź. prózdninske dźěłarnički w muzeju na Bonhoefferowej. Zajimowane dźěći wot dźesać lět při tym nawuknu, kak móža krótke trikowe filmy wjerćeć, swójske dowolowe karty abo t-shirty z pomocu lasera wuhotować abo roboter z lego-klockow programěrować. Za dźěłarnički dyrbja normalny zastup płaćić. Jeničce za t-shirty zběraja přidatnje tři eura. Zajimcy měli so do toho pod telefonowym čisłom 03571/ 209 60 80 přizjewić.
Darmotnje parkować
