Adwentnička wotprajena
Šunow. Adwentnička za wuměnkarjow gmejny Ralbicy-Róžant, kotraž so hižo wjele lět w Šunowskej Fabrikskej hospodźe wotměwa, tež lětsa płaćiwych koronapostajenjow za zarjadowanja dla njepřewjedu. Tole zdźěli wjesnjanosta Hubertus Ryćer (CDU) w najnowšim wudaću gmejnskeje nowiny. Wón prosy potrjechenych wo zrozumjenje. „Nadźijamy so, zo móžemy klětu zaso na zwučene wašnje hromadźe swjećić“, rěka we wozjewjenju dale.
Renft hraje w dźiwadle
Kamjenc. Legendarna kapała Renft koncertuje sobotu, 6. nowembra, w Kamjenskim měšćanskim dźiwadle na Połčničanskej dróze. Koncert započnje so w 19.30 hodź., zastup je wot 19 hodź. Po tym zo je šěsć něhdyšich čłonow kapały zemrěło a dalšej strowotnych přičin dla hižo hrać njemóžetaj, je Thomas „Monster“ Schoppe posledni z bywšeje originalneje wobsadki. Renft bě za čas NDR jedna z prěnich beatowych skupinow, kotraž je němsce spěwała. Swojich kritiskich spěwow dla bu skupina 1975 zakazana.
Smyčkarjo w kubłanišću
Přewjedu dźěłarničku
Budyšin. „Kajke je twoje stejišćo?“ rěka hesło dźěłarnički, kotruž přewjedu pjatk, 5. nowembra, wot 17 hodź. w Budyskim Kamjentnym domje. Při tym póńdźe hłownje wo to, kak z druhimi ludźimi prawje diskutuješ, jich měnjenje analyzuješ a swójske měnjenje zakituješ a prawje formuluješ. Nawod změje Benjamin Winkler ze Załožby Amadeu Antonio. Zajimcy móža so hač do jutřišeho přizjewić, a to pod telefonowym čisłom 0 35 91 / 5 31 99 72 abo e-mailnje pod . Wobdźělenje je darmotne.
Zběraja znowa pakćiki
Smjerdźaca. Humanitarne towarstwo Swj. Filomeny chce tež lětsa zaso dźěći a swójby w maćerno-dźěćacym domje w Dolní Podluži kaž tež w bołharskim měsće Razgrad a wokolnych wsach z hodownymi pakćikami zawjeselić. Wobsah pakćikow njeje předpisany, móžne su kakaw, słódčizny, hrajki, pisanske materialije a podobne. Pakćiki kaž tež poćehnjenja a najwšelakoriše hygieniske twory hromadźa wot 22. do 25. nowembra wšědnje wot 17 do 18 hodź. w Smjerdźečanskim kulturnym domje. Trjebanu drastu a črije lětsa njehromadźa. Dalše informacije poda Gerat Róbl pod telefonowym čisłom 01 72 / 7 94 75 22.
Jutře žana woda
Radwor. Dokelž jutře, wutoru, w Boranecach hłowny wodowód ponowja, we wjacorych wsach Radworskeje gmejny domjacnosće w času wot 8 do 17 hodź. žanu wodu njezměja. Mjez druhim potrjechi to Radwor samy, ale tež Kamjenej, Haj, Bronjo, Łupoj, Lutobč, Chasow, Měrkow, Miłkecy a dalše wsy. To samsne płaći w Njeswačanskej gmejnje za Łahow, Zarěč, Łupjansku Dubrawku a Łuh. Wobydlerjo měli sej za jutře trěbnu wodu do bowow pjelnić. Hdyž budźe nowy wodowód přizamknjeny, móže krótkodobnje k zamućenju wody dóńć.
Z techniku wobchadźeć wuknyć
Předstaja statistiku Serbow
Stróža. Na knižne předstajenje němskorěčneje publikacije „Statistik der Lausitzer Sorben“ Arnošta Muki přeprošujetej Ludowe nakładnistwo Domowina a zarjadnistwo biosferoweho rezerwata Hornjołužiska hola a haty srjedu, 3. nowembra, w 19 hodź. do Stróžanskeho Domu tysac hatow. Wudawaćel a přełožer Robert Lorenz předstaji tute fascinowace dźěło łužiskeje a serbskeje ludowědy. Zastup za dorosćenych płaći dwaj euraj, potuńšene jedyn euro. Wopytowarjo njech wobkedźbuja płaćiwe prawidło 3G a měli wotpowědny dopokaz a wupokaz w originalu sobu měć.
Pytaja hladarku
Chrósćicy. Dom swjateje Ludmile w Chrósćicach poskića dźěłowe městno za chorobnu sotru abo hladarku starych ludźi. Mužojo smědźa so runje tak požadać, kotrež hodźi so hnydom wobsadźić. Mzda płaći so po tarifowych rjadowanjach Carity. Požadanja přijimuja z póštu, Zejlerjowa 4 w 01920 Chrósćicach, abo z majlku na . Nadrobniše informacije poda nawodnica Mónika Wenclowa pod telefonowym čisłom 03 57 96 / 94 73 30.
Hromadźa staru papjeru
Přepodadźa hrajkanišćo a hětu
Chrósćicy. Dalši dźěl wobšěrneho projekta „Chrósćicy pohibuja wšitkich“ je na arealu bywšeje pěstowarnje dotwarjeny. Tuž přeproša gmejna wobydlerjow na oficialne přepodaće noweho hrajkanišća a grilowanskeje hěty jutře, pjatk, w 16.30 hodź. Wšitcy zajimcy su wutrobnje witani.
Pytaja instrumentalistow
W prózdninach do muzeja
Budyšin. „Baje, baje, bachu ...“, rěka dalši prózdninski poskitk Budyskeho Serbskeho muzeja jutře, štwórtk, wot 10 hodź. Při tym steja sćinowe bajki w srjedźišću. Wobdźělić móža so zajimcy, kotřiž zamóža bajki bać a je tež pokazać. W Serbskim muzeju móža woni swójske sćinowe dźiwadło a figury paslić. Přizjewjenja přijimuja e-mailnje pod adresu ticket@sorbisches-museum.de abo pod telefonowym čisłom 03591/270 87 00.
Wotewru wustajeńcu
Budyšin. Rězbarstwo Alojsa Šołty ze Žuric steji w srjedźišću noweje wustajeńcy Budyskeje Serbskeje kulturneje informacije, kotruž tam pjatk, 29. oktobra, w 17.30 hodź. wotewru. Pod hesłom „Korjenje – swětło w rjadźe – swobodne kreacije z drjewa“ pokaza serbski wuměłc přehlad swojeho tworjenja a jednotliwe eksponaty a jich nastaće rozłoži. Wopytowarjo maja płaćiwe hygieniske postajenja wobkedźbować. Za zarjadowanje płaći prawidło 3G. Wšitcy zajimcy su na wotewrjenje zajimaweje přehladki wutrobnje přeprošeni
Čita z druheje knihi
Na knižnu premjeru
Budyšin. „Stop a stup“ rěka nowostka Měrany Cušcyneje, kotraž změje štwórtk, 28. oktobra, w 19 hodź. z hudźbu Jana Cyža w Budyskej Smolerjec kniharni premjeru. Awtorka wjedźe čitarja do Budyšina, powěda wo skurilnych podawkach, rozmysluje wo dźiwnosćach serbskeje rěče a česćuje basnikow a rjekow wšědneho dnja. Zajimcy njech přizjewja so pod telefonowym čisłom 0 35 91 / 57 72 88. Płaći prawidło 3G.
W prózdninach do muzeja
Budyšin. Paslenske popołdnjo přewjedu jutře, srjedu, wot 14 hodź. w Budyskim Serbskim muzeju. We wobłuku prózdninskeho poskitka móža wobdźělnicy swoje kreatiwne ideje zwoprawdźić. Zajimcy njech přizjewja so pod abo pod telefonowym čisłom 0 35 91 / 27 08 70 -0.
Hraja zaso škot
Radwor. Přichodny škotowy turněr serbskich seniorow wotměje so jutře, wutoru, w 14 hodź. w Radworskim „Słodeńku“, něhdyšej lutowarni napřećo cyrkwi. Nowačcy su kaž stajnje lubje witani. Dalši turněr budźe w nowembru w Budyšinje, kaž hłowny organizator Měrćin Nowak zdźěli.
Pjenjezy za pišćele přepodali
Wojerecy. Jězorinowa załožba Wojerowskeje chorownje je tele dny z nahladnej sumu pjenjez ponowjenje pišćelow Wojerowskeje katolskeje cyrkwje na Karla Liebknechtowej podpěrała. Čłonaj załožboweje rady Thomas Delling a Uwe Blazejczyk přepodaštaj zastupjerjam wosady symboliski šek w hódnoće 45 000 eurow. Sobudźěłaćerjo Drježdźanskeje pišćeletwarskeje firmy Jähmlich nětko pišćele wurjedźa, trěbne dźěle narunaja a instrument znowa hłosuja.
Wot dźensnišeho puć ponowjeja
Budyšin. Na Hasy Käthy Kollwitz w Budyšinje su dźensa mjez dróhomaj Při rězarni a Jordanowej asfalt ponowjeć započeli. Dźěła traja po wšěm zdaću tři tydźenje, a to w dwěmaj wotrězkomaj. Přijězd do centruma zarjadow pak wostawa dale móžny, informuje měšćanske zarjadnistwo.
Komorny koncert w cyrkwi
Budyšin. Ansambl FisFüz wuhotuje jutře, sobotu, w 19.30 hodź. Budyski komorny koncert w Marje-Marćinej cyrkwi na Bebelowym naměsće. Wopytowarjo dožiwja program „Lale – Colours of Eurasia“. Ansambl FisFüz je skupina hudźbnikow, kotřiž so na orientaliske melodije, wirtuozne improwizacije a zapadne harmonije koncentruja. Orientaliske jazzowe trijo aranžuje tohorunja tradicionelne aziske twórby a je hudźbnje znowa interpretuje. Lisćik při wječornej kasy płaći 18 eurow, potuńšene 15 eurow.
Štó je šmóratko zhubił?
Pančicy-Kukow. Na pólnym puću mjez Chrósćicami a Kozarcami bu srjedu, 13. oktobra, smartfon typa Oppo namakany. Štóž je jón zhubił, móže sej šmóratko w twarjenju zarjadniskeho zwjazka Při Klóšterskej wodźe w Pančicach-Kukowje wotewzać.
Na knižnu premjeru
