Wojerecy (SN/at). Prezidij Zwjazkoweho předsydstwa zaběra so dale z klětušej hłownej zhromadźiznu, kaž třěšny zwjazk po wčerawšim wuradźowanju we Wojerecach zdźěli. Tuchwilu njewotwidźomneho wuwića koronapandemije za poł lěta dla ma nětko zwjazkowe předsydstwo na posedźenju 20. nowembra wo tym wothłosować, hač měli „hłownu“ snano wot měrca do ćopłeho počasa přestorčić.

Prezidij rozjimaše dale wuhódnoćenje a konkluzije z naprašowanja zastupjerjow Domowiny, kotřiž w 34 rozsudźacych a poradźowacych gremijach sobu skutkuja. Referent za nutřkowne naležnosće Werner Sroka bě je zawodnje rozkładł. Čłonojo prezidija maja za wažne, stajnu wuměnu zarjada z wotpósłancami zesylnić. Wot referenta za hospodarske a infrastrukturne naležnosće Pětra Brězana zdźěłane stejišćo k naćiskej druheho cyłkowneho pokročowanja Regionalneho plana Hornja Łužica-Delnja Šleska je gremij wobkrućił. Tu Domowina wosebje poruča, wuznam Serbow jako rěčnych a kulturnych mostarjow w regionje wosrjedź Europy wuzběhnyć.

Wjesne towarstwo Domizna znowa z najrjeńšej žnjowej krónu

Chrósćicy/Drježdźany (BeW/SN). Mjeztym pjaty raz běchu čłonojo Chróšćanskeho wjesneho towarstwa Domizna lětsa rjanu žnjowu krónu za wubědźowanje sakskeho zwjazka wjesnych žonow nawili. Na lětušim 27. wubědźowanju wobdźěli so 35 wustajerjow, towarstwow a jednotliwcow a zapoda sydom krónow, jědnaće wěncow a 16 wudźěłkow w kategoriji freestyle. Wone běchu minjene dny w Drježdźanskej Křižnej cyrkwi wustajene, hdźež njeje jenož jury jednotliwe eksponaty posudźowała. Tež wopytowarjo smědźachu swój hłós wotedać a su tak sobu rozsudźili. Runja minjenym lětam su Chróšćenjo tež tónraz wurisanje wo najrjeńšu žnjowu krónu dobyli, tak zo móžeše jich kreatiwna hłowa Hana Grutcyna wčera dopołdnja z rukow sakskeho ministra za regionalne wuwiće Thomasa Schmidta (CDU) mytowanske wopismo přijeć. Nimo toho móžachu so Chróšćenjo tež w kategoriji najrjeńši žnjowy wěnc nad prěnim městnom wjeselić.

Budyšin (SN/at). Elke Nagelowa z Łaza, Jurij Šołta z Noweje Wjeski a Fryco Kša­maŕ­ z Drjenowa su lětuši lawreaća Myta Domowiny, kaž mytowanski wuběrk jeje zwjazkoweho předsydstwa wčera informowaše. Myto Domowiny za dorost spožči narodna organizacija Damianej Dyrlichej z Noweje Wjeski. Rozsudne za wu­znamjenjenje mjenowanych wosobow su jich „čestnohamtske skutkowanje ze wšoserbskim wuznamom“, a „wurjadne wukony w zmysle zachowanja a spěchowanja Serbstwa“.

Kóždolětne počesćenja serbskeho třěšneho zwjazka wudospołni Čestne znamješko Domowiny, z kotrymž waža sej „wosebite wukony při zwoprawdźenju programa Domowiny“. Wuznamjenjeni budu Friedhard Krawc ze Swóńcy, Hei­demarie Rychtarjowa ze Slepoho, Bjarnat Deleńk z Njebjelčic, Christa Dziumblowa z Bórkowow, Torsten Mak z Choćebuza, Juro Hanška z Brjazyny, Silvia Stephanowa z Čorneho Chołmca, Marja Ošikowa z Pančic-Kukowa, Jürgen Njek z Chrósćic a Marka Cyžowa z Lejna. Wuznamjenjenske zarjadowanje budźe pjatk, 9. oktobra, w Budyšinje.

Keramiku tworić njeje kóždemu date. Na dźěłarničce we Wulkodubrawskej Margarećinej hěće pak wobdźělnicy zwěsćichu, zo je hlina maćizna, z kotrejež móže kóždy něšto tworić.

Wulka Dubrawa (SN/MiR). Spěchowanski kruh za serbsku ludowu kulturu je lětsa wospjet dźěłarničku keramiki zarjadował. Nawjedowała je mały kruh zajimcow Budyšanka Helena Palmanowa.

Ducy do dźěłarnje wobhladachu sej wobdźělnicy, mjez kotrymiž bě tež šulerka, wustajeńcu wo stawiznach a nastaću zawoda za keramiske wudźěłki we Wulkej Dubrawje, hdźež je něhdźe tež tójšto Serbow dźěłało. Na to pokazuja historiske fota, pod kotrež móža wopytowarjo mjena zwobraznjenych na lisćinu napisać, ručež někoho spóznaja.

W dźěłarni móžeše so na to kóždy po swojej woli z keramiku zaběrać. Někotři běchu sej wot doma hižo narysowany naćisk sobu přinjesli. Tak stej nastałoj relie­faj ze zwobraznjenej serbskej narodnej drastu.