Berlin/Drježdźany (dpa/SN/K). Dale a wjetša žołma ćěkancow načinja dale a wjace problemow, čehoždla su přisłušni zastupnicy politiki, komunow, hospodarstwa, cyrkwjow a dobroćelskich zwjazkow nuzowani, sydnyć so za jedne blido. Badensko-württembergski ministerski prezident Michael Kretschmann (Zeleni) je na tajke zhromadne wuradźowanje přeprosył. Předewšěm nastupajo zaměstnjenje ćěkancow nastawaja njemałe ćeže. W Drježdźanach su minjeny pjatk chwatnje wosebite stanowe sydlišćo natwarili, hdźež po wudawanju městneho Čerwjeneho křiža tuchwilu 783 ludźi přebywa.
Stuttgart (dpa/SN). Ze sydomdypkowym programom chcetej Badensko-Württembergska a Bayerska přichodnje zhromadnje přećiwo paducham postupować, kotřiž so do bydlenjow zadobywaja. „Juh Němskeje ma so paducham z přewšo strašnej kónčinu stać“, rjekny nutřkowny minister Badensko-Württembergskeje Reinhold Gall (SPD) minjeny pjatk při podpisanju kooperaciskeho zrěčenja wobeju krajow w Stuttgarće. Bayerski nutřkowny minister Joachim Hermann (CSU) rěčeše wo „boju přećiwo profesionelnym cwólbam z wuchodneje Europy“.
W juhoněmskich zwjazkowych krajach je ličba padustwow w bydlenjach minjene lěta dramatisce rozrostła. Tola tež w druhich kónčinach Němskeje registruja dźeń a wjace tajkich padow, wjace hač 152 000 w minjenym lěće.
Program předwidźi mjez druhim wšědnu wuměnu datow wo podhladnych wosobach abo awtach. Tež wuhódnoćenje slědow paduchow ma so polěpšić. Při zhromadnych kontrolach na awtodróhach chcedźa skućićelow dosahnyć.
Mała zwada wo blešku piwa je so na Mnichowskim hłownym dwórnišću k masowej bijeńcy wuwiła. Něhdźe dźesać ludźi spyta spočatnje w diskusiji mjez předawarku a kupcom posrědkować, kaž zwjazkowa policija zdźěli. Dalše wosoby a stražnik so do zwady měšachu, na čož situacija eskalěrowaše. Skónčnje stražnik 36lětneho powali, na čož dyrbjachu jeho do chorownje dowjezć. Přećiwo stražnikej a pjeć dalšim wosobam přepytuja nětko ranjenja ćěła dla.
Dokelž njeje paduch pokradnjeny trezor wočinić móhł, je wjacorych rjemjeslnikow wo pomoc prosył. Prašeše so jich, hač njemóhli trezor namócnje wotewrěć, dokelž je pječa kombinaciju ličbow zabył. Firma w Ulmje wšak policiju zawoła, a ta zwěsći, zo bu mały trezor z bydlenskeho domu pokradnjeny.
Sprjewja ze sulfatom poćežena
Zły Komorow/Drježdźany (dpa/SN/ch). Za poćeženje Sprjewje ze sulfatom je předewšěm hórnistwo zamołwite, zwěsći posudk. Wudobywanje brunicy a dźěło milinarnjow we Łužicy na tym wučinja 45 procentow. Z 30 procentami slěduja bywše hórnistwowe kónčiny, wo kotrež so LMBV stara. Zbytk su přirodne přičiny. Posudk bu w nadawku LMBV wot Instituta za wodu a pódu w Drježdźanach zhotowjeny. Wuslědki stej powěsćowy magacin Spiegel a LMBV na swojej internetnej stronje wozjewiłoj. Awtorojo posudka z toho wuchadźeja, zo je wjeršk poćeženja Sprjewje ze sulfatom docpěty.
Nahrawaja krimi