Paris/Washington (dpa/SN/K). Wonkowni ministrojo Němskeje, Francoskeje, Ruskeje a Ukrainy su dźiwajo na to, zo dochadźa z winy wobeju stron přeco zaso k wojowanjam w Donbaskim regionje, k tomu namołwili, zakónčić krejpřeliwanje na wuchodnej Ukrainje. „Pominamy spěšnu deeskalaciju a hnydomny přiměr“, rjekny šef francoskeje diplomatije Laurent Fabius wčera wječor po jich zetkanju. Jeho němski kolega Frank-Walter Steinmeier (SPD) so nadźija, zo su rozmołwy puć zrunali k lokalnemu přiměrej we wuchodoukrainskim sydlišću Širokinje.
Rom (dpa/SN). Na napjeće wočakowanej swójbnej synodźe we Vatikanje chcedźa wo nowowusměrjenju katolskeje cyrkwje při wobchadźenju z homoseksualnymi a rozwjedźenymi diskutować. We wčera předstajenym přihotowanskim dokumenće za lětušu nazymsku synodu rěka, zo maja hladajo na znowazmandźelenych rozwjedźenych „zhromadne dojednanje wo hypotezy puća wujednanja abo pokuty“. Homoseksualnych měłoj cyrkej a towaršnosć respektować a přiwzać. „Swójby, w kotrychž su wosoby z homoseksualnymi tendencami žiwi“, měli wosebity přewod a kedźbnosć dóstać.
Jenož hišće mjeńšina wěriwych je hladajo na mandźelstwo a swójbu po wučbje cyrkwje žiwa, kaž na spočatku spisa rěka. „Instrumentum Laboris“ złožuje so na kónčny dokument zašłeje synody. Namjety, wuchadźace z wuslědka woprašowanja Vatikana na biskopskich konferencach, jón wudospołnjeja. Synoda wo problemach swójby wotměje so wot 4. do 25. oktobra w Romje.
Při rjedźenju woknow tčacy wostałoj staj mužej w Berlinje. Sobudźěłaćerjej rjedźenskeje firmy dźěłaštaj nad zemju we wysokosći wosmeho poschoda twarjenja Axela Springera, jako so gondla hižo njehibaše. Fachowcy za wuchowanje ludźi z wulkeje wysokosće jeju wuswobodźichu. Z powjazami pušćichu wobeju na hłubje ležacu třěchu. Hač dyrbještaj wonaj po tym dale dźěłać, njeje znate.
Dospołnje nahi je muž w Ludwigshafenje paducha dosahnył, kiž bě so do jeho awta zadobył. Alarmowa připrawa jězdźidła 44lětneho w nocy wubudźi. Bjez toho zo by so zdrasćił, smaleše muž za 17lětnym paduchom, kiž je hladajo na bližaceho so naheho ćeknyć spytał. Muž pak jeho přewiny a dźeržeše, doniž policija njepřijědźe. Rubiznu dósta wróćo.
Rěča wo rozšěrjenju jamy
Rań (dpa/SN/ch). Wuběrki Braniborskeho krajneho sejma a jich kolegojo z Berlina dźensa w Ranju wuradźuja, hač je planowane rozšěrjenje jamy Wjelcej-juh energijopolitisce trěbne. Jězbje po brunicowym stejnišću přizamkny so posedźenje. Ćežišćo diskusije je energijowa změna, zdźěli Ralf Holzschuher (SPD), předsyda hospodarskeho wuběrka w krajnym sejmje. Braniborska bě hižo před dobrym lětom za wutwar jamy energijoweho koncerna Vattenfall hłosowała. Berlin pak sej lětsa w januaru žadaše, zo chce při tym słowčko sobu rěčeć. Na to posedźenje namjetowachu.
Wjace poskitkow za dźěći