Przemysl (dpa/SN). Prezidentka komisije EU Ursula von der Leyen je so minjenu nóc z ćahom z juhowuchodneje Pólskeje na puć do Kijewa podała. W ukrainskej stolicy wočakowaše ju w běhu dnja prezident Wolodymyr Zelenskyj. Bywšu zakitowansku ministerku přewodźuje delegacija, kotrejž přisłušeja tež społnomócnjeny EU za wonkowne naležnosće Josep Borrell, słowakski ministerski prezident Eduard Heger a wjacori zapósłancy eu­rop­skeho parlamenta. Powětrowy rum nad Ukrainu je wójny dla zawrjeny. Von der Leyen je prěnja zapadna načolna politi­karka, kotraž Ukrainu po wotkryću masakra w předměsće Kijewa Buču wopyta. Jako reakciju na masaker bě EU dalši paket sankcijow přećiwo Ruskej wobzamknyła, kiž wobsahuje mjez druhim zakaz importa ruskeho wuhla. Zelenskyj je sej w nócnym widejowym poselstwje dalše sankcije přećiwo Ruskej a wosebje ćežke brónje žadał, zo móhł so kraj ruskemu nadpadej wuspěšnje wobarać.

Na prěni napohlad je wčerawši rozsud zwjazkoweho sejma přećiwo winowatostnemu šćěpjenju pře koronawirus triumf demokratije: Wjetšina zapósłancow najwyšeho zakonje dawaceho gremija je roz­su­dźiła – a hotowe. Na druhim boku je wuslědk wothłosowanja poražka, haj blamaža za knježerstwo. Zwjazkowy kancler Olaf Scholz njeje kmany, swoju knježerstwowu koaliciju – kotraž ma wjetšinu w sejmje – za sobu zhromadźić. A někotryžkuli by na městnje strowotniskeho ministra Karla Lauterbacha wotstupił.

Wčerawši dźeń pak tež pokazuje, kajki njestabilny zwjazk wona amplowa koalicija je, štož móhło so tež w druhich pra­šenjach jako fatalne wopokazać. Nic naposledk dźěše wo stronsko-politiske manewry. Opozicija chcyše na kóždy pad poraž­ku knježerstwa, zo by swoju móc pokazała. Móžemy so jenož nadźijeć, zo ličby infekcijow dale woteběraja. Hewak změjemy nazymu, kajkuž ju nichtó wjace dožiwić nochce. Marko Wjeńka

900 eurow před pjenježnym awtomatom namakała je 23lětna žona w sewjerosakskim Delitzsch a je pjenjezy pola policije wotedała. Kaž zastojnicy zdźěla, nětko za wobsedźerjom pjenjez pytaja. Policija potrjechenu wosobu prosy, so z dopokazom wo wotzběhnjenju na policajskim rewěrje přizjewić.

We wuliwje duše z porstom tčacy wo­stała je žona w šwicarskim Winterthurje pola Züricha, jako kupjel rjedźeše. Wohnjowi wobornicy dyrbjachu ju wuswobodźić, štož spočatnje ani tak lochko njebě. Hnydom tři jězdźidła wohnjoweje wobory běchu na akciji wobdźělene. Susod bě wołanje žony słyšał a policiju alarmował. Ani policistam ani wuchowanskim sanitetarjam so njeporadźi, problem rozrisać. Skónčnje dyrbjachu wobornikow přiwołać. Tući z pomocu piły wuliw rozrězachu a žonu njezranjenu wuswobodźichu.

Berlin (dpa/SN). Prěni króć po lońšich wólbach zwjazkoweho sejma je so dźensa komisija fachowcow zetkała, kotraž ma namjety k změnje wólbneho prawa zdźěłać. Wutworjenje komisije je wobstatk koaliciskeho zrěčenja SPD, FDP a Zelenych. Hłowna přičina je spochi přiběraca ličba zapósłancow parlamenta. Poprawom postajena ličba 598 zapósłancow je tak mjenowanych přewisowacych mandatow dla mjeztym na 736 rozrostła. Orban poskićuje Budapest

Budapest (dpa/SN). Madźarski ministerski prezident Viktor Orban je ruskemu prezidentej Wladimirej Putinej stolicu Budapest jako hosćićela jednanjow wo přiměr w Ukrainje poskićił. Tole je Orban po telefonaće z Putinom na nowinarskej konferency zdźělił. Putin bě Orbana za­zwonił, zo by jemu k wólbnemu dobyću gratulował. Na to bě jemu Orban namjetował, zo móhli so jednanja z wobdźělenjom zwjazkoweho kanclera Olafa Scholza (SPD) a francoskeho prezidenta Emmanuela Macrona w Budapesće zahajić.

Centrum Mariupola zdobyty