Moskwa (dpa/SN). Ruska chce spadowace dodawanje nafty do europskich krajow z eksportami do Aziskeje narunać. Tak su tež wiki „w južnej Aziskej a na wuchodźe“, zdźěli rěčnik ruskeho knježerstwa Dmitrij Pjeskow po informaciji agentury Interfax wčera w Moskwje. Swětowe wiki su mnohostronske a njewobsteja jeno z Europy. „Najebać to su europske wiki premium“, rěčnik ruskeho prezidenta Wladimira Putina wobkrući.
Předewšěm reaguje Pjeskow na připowědźenja zwjazkoweho kanclera Olafa Scholza (SPD), kiž chce „relatiwnje spěšnje“ njewotwisnje wot ruskich energijowych importow być a so dowožowanja wuhla a wolija wzdać. Po dotalnych wuwjedźenjach zwjazkoweho hospodarskeho ministra Roberta Habecka (Zeleni) zamóže Němska ruski import wolija hač do lěća wo połojcu pomjeńšić.
Přiwšěm pak Pjeskow na to skedźbni, zo Ruska na tym wobsteji, zo maja europske kraje přichodnje zličbowanki za zemski płun w ruskej měnje rubl zapłaćić. Jelizo so kraje spjećuja, njebudźe Ruska swój płun darmotnje do Europy dodawać. Hladajo na tuchwilnu situaciju njeje to za kraj „móžne a zmysłapołne“
Berlin (dpa/SN). Zwada wo tak mjenowane ćežišćowe rjadowanje za daloko sahace naprawy přećiwo koronawirusej dale traje. Ze stron CDU/CSU po wšej Němskej płaćiwe rjadowanja kritizuja. Tola tež komunalne zwjazki maja wobmyslenja.
Zwjazkowym krajam su wot minjeneje njedźele jenož hišće snadne škitne naprawy za wužiwanje nahubnikow a testow dowolene. Woni pak móža naprawy w kónčinach z wosebje wjele infekcijemi w swójskej zamołwitosći wukazać. Wjacore kraje skorža, zo pobrachuja za to prawniske zakłady. Mjeztym je zwjazkowy minister za strowotnistwo Karl Lauterbach (SPD) potwjerdźił, zo njebudźe nowe prawniske rjadowanja změnić.
Rěčnik frakcije CDU/CSU za strowotniske naležnosće w zwjazkowym sejmje Tino Sorge rjekny nowinarjam, zo měli centralne wurazy kaž „hotspot“ w zakonju jasnje definowane być. Tež hłowny jednaćel zwjazka městow a gmejnow Gerd Landsberg kritizuje, zo njeje zakonjedawar jasne kriterije za ćežišćowe kónčiny postajił a to krajam přewostajił.
Schönefeld (dpa/SN). Wot Berlina direktnje do New Yorka lećeć je wot wčerawšeho z lětanišća Berlin-Braniborska (BER) móžno. Předewzaće United Airlines poskića zwisk k tamnišemu lětanišću Newark. Wšědnje přizemi a wotlěta mašina w Schönefeldźe. „Wobě metropoli Berlin a New York měłoj so zwjazać“, airline wčera zdźěli. Poskitk je prěni zwisk přez dołhu čaru do USA z noweho lětanišća. Ze Schönefelda lětaja mašiny nimo toho do Singapura, Doha a w zymje tohorunja do Dubaja. Wčera su lětadło Boeing 767 do směra na New York oficialnje rozžohnowali, při čimž pryskaše lětanišćowa wohnjowa wobora wodowe fontany. Berlinska knježaca měšćanostka Franziska Giffey (SPD) a Berlinski hospodarski senator Stephan Schwarz (njestronjan) běštaj na rozžohnowanje přišłoj.
Zastupjerjo z politiki a hospodarstwa sej hižo lěta tajke zwiski přez dołhu čaru z noweho lětanišća žadaja. Hižo na bywšim lětanišću w Tegelu bě tajkich zwiskow jara mało. Často maja pasažěrojo z Berlina a Braniborskeje zwiski wot Frankfurta nad Mohanom abo Mnichowa wužiwać a tam přelězć.
Cebrowe smuhi na puć molowali su njeznaći w Nieparsu pola Stralsunda a dyrbja nětko z prawniskimi konsekwencami ličić. Kaž rěčnica policije zdźěli, je so molowanska akcija w nocy na njedźelu wotměła. Blisko smuhow je šula. Starši a wobydlerjo sej hižo dlěši čas tajki přechod za dźěći žadaja, dotal bjez wuspěcha. Zamołwity zarjad chce pjeć smuhow nětko z čornej barbu přemolować dać.
Komunistiski dźenik Haló noviny w Čěskej wuchadźa kónc apryla posledni raz. Tole je centralny komitej komunistiskeje strony Čěskeje a Morawy po „wichorojtej debaće“ wčera wobzamknył. Nakład nowiny bě naposledk na jenož hišće 6 000 eksemplarow woteběrał. Dźenik bě naslědnik bywšeho socialistiskeho propagandoweho organa Rudé právo. Zdobom wobzamknychu přichodnje tydźenik wudawać. Při minjenych wólbach parlamenta bě komunistiska strona na pjećprocentowej mjezy zwrěšćiła.
Kijew (B/SN). Po telefonaće minjeny tydźeń z bamžom Franciskusom je ukrainski prezident Wolodymyr Zelenskyj połny nadźije, zo pontifeks Ukrainu wopyta. „Sym přeswědčeny, zo by wopyt bamža kóždeho Ukrainjana dušinje podpěrał. Posrědkowansku rólu Swjateho stoła, skónčić bědu ludźi, bychmy jara witali.“ Vatikan je telefonat bjez podaća wobsahowych ćežišćow wobkrućił. „Tež Ruska by tajku posrědkowansku funkciju Swjateho stoła w dialogu mjez Ruskej a Ukrainu witała“, praji nawoda wotrjada za europske naležnosće wonkowneho ministerstwa Aleksej Paramonow statnej ruskej powěsćerni Nowosti.
Wótra kritika z Čěskeje
Berlin (dpa/SN). Zwjazkowy strowotniski minister Karl Lauterbach (SPD) chce zwjazkowym krajam štyri kriterije hladajo na postajenje hotspotow koronapandemije dla namjetować. Dźensa chcychu so strowotniscy ministrojo zwjazkowych krajow zetkać a wo přiwótřenych naprawach w kónčinach z wosebje wjele natyknjenjemi z koronawirusom wuradźować. Po słowach Lauterbacha měli so na přikład połoženje w chorownjach a hladarnjach wobkedźbować, tak zo wostanje nuzowe zastaranje chorych dale zaručene.
Rozkora hrozy
Brüssel (dpa/SN). Europskej uniji hrozy hladajo na rozdźělenje ukrainskich ćěkancow rozkora. Nutřkowni ministrojo 27 krajow EU dźensa wo zhromadnym postupowanju wuradźuja. Němska a Pólska stej sej z nuzowym apelom na Europsku komisiju wobroćiłoj. Zwjazkowa nutřkowna ministerka Nancy Faeser (SPD) namjetowaše rozdźělenske kwoty, štož nutřkowna komisarka EU Ylva Johansson wotpokaza.
Bydlenske imobilije dróše
Kijew/Berlin/Waršawa (dpa/SN). Ruske wójsko pokročuje z nadpadami w Ukrainje. Po ukrainskich medijowych rozprawjach zwěsćichu w tamnišej stolicy Kijewje kaž tež we Łucku, Riwnje a Charkowje wjacore ćežke eksplozije. We Łucku na sewjerozapadźe Ukrainy bu ćěriwowy depot trjecheny. Do toho su po wšěm kraju powětrowy alarm wuwołali. Ukrainske wjednistwo wumjetowaše ruskemu wójsku „nječłowjesku taktiku“. K tomu słušeja na přikład „dźělna abo totalna blokada humanitarnych koridorow a blokada woblěhowanych městow“, pisaše poradźowar ukrainskeho prezidenta Mychajlo Podoljak na twitteru. Nimo toho pokročuje Ruska z „totalnymi raketowymi nadpadami“ přećiwo ukrainskim městam, wosebje w přistawnym měsće Mariupolu. Po swójskich wopisowanjach su ukrainske jednotki wuspěšnje přećiwne nadběhi we wokolinje Charkiwa přewjedli. Při tym su ruske wójska wčera z wjacorych sydlišćow wutłóčili. Tež blisko Kijewa su wuspěšne byli. Podaća njehodźa so njewotwisnje přepruwować.
Saarbrücken/Berlin (dpa/SN). SPD z načolnej kandidatku Anke Rehlinger je wólby krajneho sejma w Posaarskej z wulkim wotstawkom dobyła a zamóže nětko samo bjez partnera knježić. Rehlinger hišće dźensa z wodźacymi gremijemi na zwjazkowej a krajnej runinje wo dalšim postupowanju wuradźuje, wšako ma wona wuslědk wólbow za jasny mandat za wutworjenje noweho posaarskeho knježerstwa.
Mjeztym wuradźuje strona CDU w Posaarskej wo přichodźe bywšeho ministerskeho prezidenta Tobiasa Hansa, kiž chce zamołwitosć za wčerawšu poražku přewzać.
SPD je prěnje z lětsa předwidźanych štyrjoch wólbow krajnych sejmow jasnje dobyła. Po dotalnym wuslědku docpě strona 43,5 procentow hłosow wolerjow. W lěće 2017 běchu tomu jenož 29,6 procentow. Nimo CDU budźe tež AfD w krajnym sejmje zastupjena. Porno tomu tole Zeleni, FDP a Lěwica docpěli njejsu. Po wobličenjach pobrachowachu Zelenym jenož 23 hłosow wolerjow.
Drježdźany (dpa/SN). Sakska nadźija so mnohich požadanjow wo wukubłanje na lěkarja we wjesnych kónčinach. Wona je sej wěsta, zo móže wšitke za to předwidźane studijne městna hižo w prěnim kole wobsadźić, rjekny ministerka za strowotnistwo Petra Köpping (SPD) minjeny štwórtk w krajnym sejmje. Wot 1. apryla móža so zajimcy za jedne z něhdźe 40 studijnych městnow přizjewić. Městna njepodleža krutemu numerusej claususej kaž hewak studij humaneje mediciny nastupajo. Za to dyrbja so zajimcy zawjazać po studiju znajmjeńša dźesać lět w kónčinje dźěłać, w kotrejž lěkarjo pobrachuja. Štóž zrěčenje njedodźerži, dyrbi 250 000 eurow płaćić. Krajny sejm bě loni zakoń za lěkarjow we wjesnych kónčinach wobzamknył. Doba přizjewjenja kónči so 15. apryla.