Prognozy 2022 ničo wjace hódne
Berlin (dpa/SN). Wójna w Ukrainje, ćeže při dodawanju tworow a přiběrace płaćizny wohrožeja z wida hospodarstwa konjunkturu. Rozmach hospodarstwa a dźěłowe městna su chutnje wohrožene, informuja zwjazki předewzaćelow Berlina a Braniborskeje. „Wšitke prognozy za lěto 2022 njejsu ničo wjace hódne“, rjekny hłowny jednaćel Christian Amsinck. Předewšěm industrija je wot sćěhow wójny potrjechena. Tři štwórćiny metalwobdźěłacych firmow eksportuje do Ruskeje, Běłoruskeje a Ukrainy. Kóžda druha firma z tutych krajow twory dóstawa.
Zwjazki žadaja sej energijowy dawk na diesel, zemski płun a tepjenski wolij, dawk za milinu kaž tež płaćiznu za wuhlikowy dioksid znižić. Nimo toho měli pruwować, hač njemóhła Janšojska milinarnja dlěje hač dotal planowane dźěłać. Spočatk lěta bě nalada regionalneho hospodarstwa hišće wo wjele lěpša była. Zwjazki wočakowachu tehdy hospodarski rozmach hač do pjeć procentow. Po ruskim nadpadźe na Ukrainu Berlinska Industrijna a wikowanska komora zdźěli, zo je hospodarstwo zwólniwe za swobodu Ukrainy „wulke brěmjo na so wzać“.
To a tamne (17.03.22)
Z kocorom ma jedna z Oldenburgskich kupnicow žiwidłow hižo někotre tydźenje njewšědneho stajneho hosća. Mjeztym wón wšědnje přichadźa, zo by před zachodom přebywał, nawodnica wobchoda rozprawja. Běło-čerwjeny kocor, kotrehož Čeker mjenuja, lěha tam na składowanych wěcach, druhdy pak tež po parkowanišću běha. Sobudźěłaćerjo pak na to dźiwaja, zo so do kupnicy njedóstawa, dokelž njeje to hygieny dla dowolene.
Pawk we wosobowym awće bě šofera w Essenje tak wustróžił, zo je tón kontrolu nad wodźidłom zhubił. Jako muž pawka wuhlada, zajědźe wón ze stróželemi z jězdnje. Na to prasny ze swojim jězdźidłom do murje a do płotu. Snadnje zranjeneho 40lětneho dowjezechu do chorownje, kotruž pak móžeše wón samsny wječor zaso wopušćić. Wěcna škoda přiwšěm 8 000 eurow wučinja.
„Wulka a zmužita kročel“
Delegacija Pólskeje, Čěskeje a Słowjenskeje w stolicy Ukrainy była
Kijew (dpa/SN). Knježerstwowi šefojo Pólskeje, Čěskeje a Słowjenskeje su ukrainskemu prezidentej Wolodymyrej Zelenskemu na zetkanju w ukrainskej stolicy Kijewje, wo kotryž wojuja, solidaritu a pomoc přilubili. „Tule, w Kijewje wot wójny roztorhanym, pisaja so stawizny“, potwjerdźi pólski ministerski prezident Mateusz Morawiecki. „Tu wojuje swoboda přećiwo swětej tyranstwa. Tu rozsudźi so přichod nas wšěch“, wón twitterowaše. Zastupnik Morawieckeho Jarosław Kaczyński wupraji so na zetkanju za mjezynarodnu měrowu misiju NATO, kotraž měła kmana być so zakitować.
„Wobdźiwamy waš zmužity bój“, rjekny čěski ministerski prezident Petr Fiala na zetkanju. „Wojujeće wo swoje žiwjenje, wo swój kraj a swoju swobodu. Wěmy, zo wojujeće tež wo naše žiwjenje. Njejsće sami.“
Unija nochce přihłosować
Berlin (dpa/SN). Frakcija CDU/CSU w zwjazkowym sejmje změnu wustawy za planowane přidatne miliardy eurow na dobro Zwjazkoweje wobory wotpokazuje. Dyrbi jasne być, zo sto miliardow eurow woprawdźe za Zwjazkowu woboru wudadźa, rjekny etatowy fachowc Mathias Middelberg powěsćerni dpa. Tuchwilna formulacija „k zesylnjenju kmanosće w zwjazkarstwje a při zakitowanju“ dowola tež hinaše formy wužiwanja.
Ukraina dale brónje dóstawa
Brüssel (dpa/SN). Najebać warnowanja Ruskeje Ukraina dale brónje z Wulkeje Britaniskeje dóstawa. To je zakitowanski minister Ben Wallace na kromje wuradźowanja z kolegami tamnych čłonskich krajow NATO w Brüsselu potwjerdźił. Na tym ruski raketowy nadpad na ukrainske wojerske zwučowanišćo njedaloko pólskeje mjezy ničo njezměni. Ruska bě minjene dny wospjet před dodawanjom bróni do Ukrainy warnowała a hrozyła, transporty z lětadłami nadpadnyć.
Rybarjo wostawaja w přistawach
Kraje škitne naprawy podlěša
Berlin (dpa/SN). Hladajo na po wšej Němskej přiběrace ličby infekcijow z koronawirusom su wjacore zwjazkowe kraje připowědźili, zo chcedźa wobstejace škitne naprawy hač do 2. apryla wostajić. Tónle přechodny čas je wobstatk namjeta zwjazkoweho knježerstwa, kotryž předwidźi wot 20. měrca jenož hišće dźěl dotalnych škitnych naprawow nałožować.
Bayerski kabinet je wčera wobzamknył, zo maja hač do 2. apryla dotalne rjadowanja 2G a 3G kaž tež winowatosć wužiwanja škitneho nahubnika w šulach a wobchodach wostać. Tež sakske krajne knježerstwo je wobmjezowanja hač do 2. apryla podlěšiło. W Mecklenburgsko-Předpomorskej a w Hamburgu wobstejace wobmjezowanja tohorunja bjez změnow wostanu. W Sewjerorynsko-Westfalskej chcedźa rozsud zwjazkoweho sejma wočaknyć, kiž chcyše dźensa wo aktualnym połoženju wuradźować.
Jutře chce kancler Olaf Scholz (SPD) z ministerskimi prezidentami zwjazkowych krajow móžne dalše škitne naprawy wobrěčeć.
Zelenskyj optimistiski
Kijew (dpa/SN). Kónc wojowanjow w Ukrainje njeje wotwidźomny. Z wjacorych městow kraja rozprawjachu minjenu nóc wo alarmach. Najebać to je ukrainski prezident Wolodymyr Zelenskyj hladajo na jednanja ze zastupnikami Ruskeje optimistiski. Pozicije su bóle realistiske hač dny do toho, zwurazni wón w swojim minjenu nóc wozjewjenym widejowym poselstwje. Spokojom być pak Ukraina hišće njemóže. „Chcemy tak spěšnje kaž móžno měr a dobyće. Trjebamy pak sćerpnosć“, rjekny Zelenskyj.
Mjeztym wojowanja dale traja. Najhórje je wokoło přistawneho Mariupola. Ruske wójsko město z wjacorych směrow nadběhuje. Wčera je so přiwšěm něhdźe 20 000 ludźom poradźiło Mariupol wopušćić. Region wokoło Odessy ruske wójnske łódźe stajnje zaso z raketami wobtřěleja, kaž ukrainske nutřkowne ministerstwo informuje.
Za dawkowe wolóženja
Wulke zastatki při čitanju
Berlin (dpa/SN). Zwjazkowa ministerka za kubłanje Bettina Stark-Watzinger sej hladajo na najnowše přepytowanje čitanskeje kompetency šulerjow 4. lětnika žada, zo njesmě wjace k wobšěrnym zawrjenjam šulow dóńć. „Njemóžemy akceptować, zo su wuknjacy 4. lětnika při čitanju poł šulskeho lěta zhubili. Při tym je čitanje jedne z najwažnišich zakładnych kompetencow“, rjekny politikarka FDP powěsćerni dpa.
Reprezentatiwna studija instituta za šulske wuwićowe slědźenje Dortmundskeje uniwersity bě pokazała, zo su dźěći 4. lětnika za čas koronapandemije při čitanju jasnje wotpadnyli. Mjez nimale 4 300 testowanymi zakładnymi šulerjemi mějachu ći w 4. lětniku loni po dobrym lěće wobmjezowanjow pandemije dla „substancielnje słabšu“ čitansku kompetencu hač 4. lětniki lěta 2016. Přerěznje pobrachuje jim poł šulskeho lěta. Socialnje słabi šulerjo su wosebje sylnje wotpadnyli, Stark-Watzinger zwěsća. Ministerka skedźbnja na nachwatanski program Zwjazka korony dla, z kotrymž chcedźa wuknjacym pomhać, zo wobstejace zastatki nachwataja.
To a tamne (16.03.22)
Wubědźowanje psyčich sankowych zapřahow Iditarod w Alasce je prěni króć Brent Sass z USA dobył. 42lětny ze zwjazkoweho stata Minnesota přeprěči wčera z jědnaće zapřehnjenymi psami cilowu smuhu – po 1 800 kilometrach we wosom dnjach, 14 hodźinach, 38 mjeńšinach a 43 sekundach, kaž zarjadowarjo pisaja. Iditarod je najćeše wubědźowanje psyčich zapřahow, zwjetša pod ekstremnymi temperaturami. Lětsa měješe 49 wobdźělnikow skerje miłe wjedro.
Kóčki dla dyrbješe wohnjowa wobora w Augsburgu awto rozebrać. Pěšcy běchu skoćatko wuhladali, kotrež njemóžeše so same wuswobodźić. Wobornicy prošachu wobsedźerja wo dowolnosć, dźěle motoroweje rumnosće wutwarić směć. Spočatnje twochnjenu kóčku dyrbjachu popadnyć, zo móhli ju skótnemu lěkarjej dowjezć, rěčnica policije zdźěli.
Premierojo po puću do Kijewa
Waršawa (dpa/SN). Knježerstwowi šefojo Pólskeje, Čěskeje a Słowjenskeje nastajichu so dźensa na puć do Kijewa, zo bychu ukrainskeho prezidenta Wolodymyra Zelenskeho zetkali. Ćah z pólskim ministerskim prezidentom Mateuszom Morawieckim, toho zastupnikom Jarosławom Kaczyńskim, čěskim ministerskim prezidentom Petrom Fialu a jeho słowjenskim kolegu Janezom Janšu je rano pólsko-ukrainsku mjezu přeprěčił. Wizita je z EU w Brüsselu wothłosowana.
Wulki zajim za ćěkancow
London (dpa/SN). Prěnje pjeć hodźin po starće posrědkowanskeho portala je so wjace hač 43 000 Britow přizjewiło, zo móhli wjacore měsacy ukrainskich ćěkancow hospodować, zdźěli britiske knježerstwo. Zajimcy, kotřiž chcyli ćěkancam znajmjeńša na šěsć měsacow rumnosć darmotnje přewostajić, dyrbja so do toho přepruwować dać. Nimo toho maja mjena ćěkancow, kotrychž su při-wzali, registrować. Wudawki jim knježerstwo ze 415 eurami měsačnje zaruna.
Na lětanišćach stawkowali
