Unija přećiwo šćěpjenju
Dalše wuradźowanja Ukrainy dla
Berlin/Washington/Moskwa (dpa/SN). Po swojim wčerawšim nastupnym wopyće pola prezidenta USA Joewa Bidena je zwjazkowy kancler Olaf Scholz (SPD) dźensa ze swojimi prócowanjemi wo diplomatiske rozrisanje konflikta Ukrainy dla pokročował. W běhu dnja chcyše so wón z francoskim prezidentom Emmanuelom Macronom a pólskim prezidentom Andrzejom Dudu k rozmołwam zetkać. Macron bě wčera w Moskwje a Kijewje rozmołwy wjedł. Po rozmołwje z ruskim prezidentom Wladimirom Putinom bě Macron přeswědčeny, zo je diplomatiske rozrisanje napjatosćow w Europje móžne. Putin zapadej wumjetowaše, zo tutón napjatosće wokoło Ukrainy wužije, zo by antirusku politiku šěrił.
Wonkowna ministerka Annalena Baerbock (Zeleni) chcyše so na frontowej liniji mjez Ukrainu a ruskimi separatistami wo połoženju wobhonić.
Mjenje njeskutkow na šulach
Demonstracije přećiwnikow politiki korony dla před kubłanišćemi
Drježdźany (dpa/SN). Ličba politisce motiwowanych njeskutkow na šulach Sakskeje je dale woteběraca. Tole wuchadźa z wotmołwy krajneho knježerstwa na małe naprašowanje politikarki Lěwicy Kerstin Köditz w krajnym sejmje. Po tym su loni cyłkownje 53 tajkich njeskutkow registrowali. We wšitkich padach su přepytowanja zahajili. Lěta 2020 bě jich 77 padow było, lěto do toho 105.
„Po statistice jedna so přewažnje wo tak mjenowane propagandowe delikty kaž našćuwanje ludu abo wužiwanje zakazanych symbolow. Za tym chowaja so po dotalnych nazhonjenjach nacionalsocialistiske insignije a neonacistiske parole, kotrež so wočiwidnje stajnje zaso na zakładnych šulach jewja“, Köditz rjekny.
Strózbje jednać
To a tamne (08.02.22)
Dźiwje swinjo na konopeju je wobydlerku w sewjerorynsko-westfalskim Hagenje njemało nastróžiło a zasadźenje policije zawinowało. Něhdźe 60 kilogramow ćežka wurosćena ranca bě so přez terasowe durje do domu zadobyła, stwu přeborkała a so skónčnje lehnyła. Policistam dyrbješe žona při telefonje potwjerdźić, zo nježortuje. Zastojnicy wołachu hajnika, kiž zwěrjo do swobody pušći.
Drogi susoda w swojim bydlenju składowała je rentnarka w Rüsselsheimje pola Darmstadta. 1,4 kilogramy kokaina, hašiša, marihuany a 12 000 eurow chowaše 70lětna w kófru. Policija w Darmstadtće z toho wuchadźa, zo žona wědźeše, zo jeje 35lětny susod z drogami wikuje. Přećiwo woběmaj su sudniske jednanje zahajili. Zastojnicy běchu kófer našli, po tym zo njeběchu w bydlenju 35lětneho tak derje kaž žane drogi namakali.
Znjewužiwanje, łžě a zakryće
Berlin (B/SN). W telewizijnym wusyłanju „Anne Will“ su njedawno wo přichodźe katolskeje cyrkwje diskutowali a so prašachu: „Móžemy tutu cyrkej hišće wuchować?“ Mjez diskutantami bě předsyda Němskeje biskopskeje konferency biskop Georg Bätzing. Hižo hodźinu po wótrej diskusiji wozjewichu w interneće 850 komentarow, kotrež signalizuja wulku rozhorjenosć wobydlerjow. Diskutanća běchu zwěsćili, zo je nutřkocyrkwinske předźěłanje skandala seksualneho znjewužiwanja zwrěšćiło. Kritisce wupraji so Georg Bätzing k emeritowanemu bamžej Benediktej XVI. z wočakowanjom, zo zmylki přiznaje a so pola potrjechenych woporow zamołwi.
Hišće w sudniskej žurli zajaty
Wolóženja jasnje do jutrow
Berlin (dpa/SN). Dobry tydźeń do přichodneje konferency ministerskich prezidentow je zwjazkowy minister za strowotnistwo Karl Lauterbach bórzomne zběhnjenje wobmjezowanjow koronawirusa dla připowědźił. „Myslu, zo móžemy jasnje do jutrow wolóženjam přizwolić“, rjekny politikar SPD nowinarjam. Tuchwilu by pak za to hišće přezahe było. 16. februara je přichodne wuradźowanje Lauterbacha z krajemi planowane.
Starosća so namocy dla
Berlin (dpa/SN). Zwjazkowa nutřkowna ministerka Nancy Faeser (SPD) starosća so přiběracych politisce motiwowanych namócnosćow přećiwo politikarjam dla. Po aktualnych ličbach Zwjazkoweho kriminalneho zarjada su namócnosće přećiwo politisce zamołwitym wo 200 procentow přiběrali. To pokazuje po jeje słowach přiběracu hrubosć a zacpěwanje stata a demokratije. Faeser chce so wo to postarać, zo so w socialnych medijach dlěje hidu a teorije zapřisahanja nješěrja.
Nuzowy staw w stolicy
Chětro wjele diplomatije Ukrainy dla
Washington. Před pozadkom konflikta Ukrainy dla je so zwjazkowy kancler Olaf Scholz (SPD) dźensa do USA podał, hdźež wočakowaše jeho prezident Joe Biden. Dwaj měsacaj po swojim spřisahanju je to zdobom nastupny wopyt Scholza w USA. Do swojeho wotlěta do Washingtona je Scholz w sćelaku ARD hišće raz wotpokazał, brónje do Ukrainy dodawać. Wón chcył ameriskemu prezidentej hišće raz potwjerdźić, zo je Němska najswěrniši partner USA w Europje.
Wopyt zwjazkoweho kanclera je zazběh diplomatiskeje ofensiwy. Přichodny tydźeń chce so Scholz do Kijewa a po tym do Moskwy podać. Do toho je hišće zetkanje ze statnymi a knježerstwowymi šefami baltiskich krajow w Berlinje planowane. Nimo toho chcetaj francoski prezident Emmanuel Macron a pólski prezident Andrzej Duda k rozmołwam wo krizy na Ukrainje do Berlina přijěć.
Hišće dźensa chcyše so Macron na puć do Moskwy k prezidentej Wladimirej Putinej podać. Wobaj běštaj minjene dny wospjet telefonowałoj.
Prěnje konkretne kročele
Trěća synodalna zhromadźizna k ponowjenju katolskeje cyrkwje nimo
Frankfurt (dpa/SN). Z prěnimi konkretnymi wobzamknjenjemi je so sobotu třeća synodalna zhromadźizna k ponowjenju katolskeje cyrkwje w Němskej zakónčiła. Předsyda Němskeje biskopskeje konferency Georg Bätzing hódnoćeše tři dny trajace zetkanje w Frankfurće nad Mohanom jako „wulki wuspěch“.
Konkretnje su wobzamknyli, zo maja wěriwi biskopstwow přichodnje wjetši wliw při powołanju noweho biskopa. Nimo toho wuprajichu so za to, homoseksualne pory žohnować, ženjenym duchownym dźěło zmóžnić a žony na diakonow wuswjećić. Jasnje wuprajichu so delegaća za změnu cyrkwinskeho dźěłoweho prawa. Tuchwilu hroža sobudźěłaćerjam cyrkwinskich institucijow w padźe dźělenja mandźelstwa dźěłoprawniske konsekwency, w najhóršim padźe pušćenje. Dotal je njejasne, kak bamž Franciskus na wobzamknjenja reaguje. Minjeny čas běchu z Vatikana skerje kritiske signale słyšeć byli.
