Podstupim (dpa/SN). Frakcija Lěwicy w Braniborskim krajnym sejmje je krajne knježerstwo namołwjała, ćěkancow do Pólskeje dlěje njewotsunyć. Jich tam nimale bjez wuwzaća w lěhwach interně­ruja, bjez dosahaceho lěkarskeho zastaranja a bjez zwiska do kónčin zwonka lěhwa, zapósłanča Lěwicy Andrea Johlige wčera kritizowaše. Do toho bě wona zhromadnje z politikarjemi Lěwicy Europskeho parlamenta, zwjazkoweho sejma a druhich krajnych sejmow pólsko-běłorusku pomjeznu kónčinu wopytała.

Wotsunjenja do Pólskeje su po tak mjenowanym Dublinskim postupowanju móžne, hdyž su ludźo tam prěni króć wo azyl prosyli. Krajne knježerstwo měło so pola zwjazkoweho knježerstwa za to zasadźeć, zo ćěkancow z lěsow podłu pólsko-běłoruskeje mjezy wuchowaja, sej Johlige žada. W bahnojtych lěsach dyrbja woni w zymje při zmjerzkach pod surowymi wobstejnosćemi žiworić, rjekny wona k wobkrućenju. Na pólskej stronje mjezy je jich něhdźe 600, na běłoruskej stronje rěča wo něhdźe 800 ludźoch.

Düsseldorf (dpa/SN). Ilegalne wikowanje z falšowanymi šćěpjenskimi wupokazami dale přiběra. Policija přepytuje mjeztym po wšej Němskej w 12 000 padach. Ličba bě předewšěm loni w decembru raznje přiběrała, rozprawjeja policajske zarjady na naprašowanje powěsćernje dpa. Na čole ilegalneho wikowanja steji Bayerska ze 4 000 přepytowanskimi jednanjemi sćazanych wupokazow dla. Slěduje Sewjerorynsko-Westfalska z wjace hač 3 500 jednanjemi. „Dyrbimy bohužel z toho wuchadźeć, zo je woprawdźita ličba falšowanjow wo wjele wjetša“, zdźěli krajne knježerstwo w Mnichowje.

Přepytowarjo běchu w interneće cyły rjad „poskitkow“ namakali, kotrež přećiwnikow šćěpjenja wabja. Tući su zwólniwi, wjele pjenjez za falšowane wupokazy wudać, hačrunjež bychu original a srědk přećiwo wirusej zadarmo měć móhli.