Wissing hrozy z naprawami
Berlin (dpa/SN). W zwadźe wo reformu zakonja za škit klimy je zwjazkowy minister za wobchad Volker Wissing (FDP) před drastiskimi naprawami na njedobro šoferow awtow warnował, štož móhło hač ke kónctydźenskim zakazam jězdźenja sahać. Tole wuchadźa z lista Wissinga frakciskim šefam amploweje koalicije SPD, Zelenych a FDP. W lisće rěka, zo je ministerstwo po aktualnych zakonjach k naprawam nuzowane, njedyrbjał-li nowy zakoń hač do 15. julija płaćiwy być.
Voigt a Höcke sej nadawałoj
Erfurt (dpa/SN). W telewizijnym rozestajenju staj sej šef durinskeje CDU Mario Voigt a prawicarski politikar AfD Björn Höcke raznje rozestajałoj. Načolnaj kandidataj za wólby krajneho sejma w septembru sej mjez sobu wumjetowaštaj, zo Němskej a hospodarstwje Němskeje zeškodźitaj. Wobaj nadawaštaj sej tež wosobinsce. Voigt mjenowaše Höckeho „jěd za Durinsku“. Tón Voigtej wumjetowaše, zo je populistiski a zo argumenty AfD scyła njerozumi.
Přiměr za zastajencow trěbny
Aktiwistki pólskeje iniciatiwy za liberalniše prawo wotehnaća su ...
Nakupowanska kartka schwalena
Berlin (dpa/SN). Zwjazkowy sejm je dźensa zawjedźenje nakupowanskeje kartki za ćěkancow a požadarjow azyla schwalił. Parlament je w tym zwisku wo cyłoněmskim prawniskim zakładźe předewzaća rozsudźił. Požadarjo azyla maja přichodnje dźěl statnych popłatkow k žiwjenju jako dobroměće dóstać a nic wjace jako pjenjezy do ruki.
Pozadk je dojednanje mjez zwjazkowym kanclerom Olafom Scholzom (SPD) z ministerskimi prezidentami zwjazkowych krajow. Z kartku chcedźa tomu zadźěwać, zo migranća pjenjezy z Němskeje pašowarjam ludźi abo swójbnym přepokazaja. Wuwzaća su pak dale móžne.
Dalša tema dźensnišeho wuradźowanja bě zakoń wo samopostajowanju. Z nim móža ludźo přichodnje swój splah a předmjeno na stawnistwje změnić dać. Dotal trjebaja za to lěkarski atest.
Ruska nowy partner Nigera
Lědma štó wěri do dobyća Kijewa
Globalizacija dołhodobnje zesłabjena
Mnichow (dpa/SN). Němska eksportna industrija dyrbi so po posudku instituta Prognos dołhodobnje na zesłabjenu globalizaciju nastajić. Wožiwjenje mjezynarodneho globalneho zhromadneho dźěła njeje prawdźepodobne, fachowcy za wonkowne hospodarstwo poradźowanskeho předewzaća pisaja. Realistiske po jich měnjenju skerje je, zo so hospodarska globalizacija dale wróćo wuwije. Rizika a potencielne škody za předewzaća a cyłe ludoweho hospodarstwa w Europje su hoberske, wosebje za Němsku, w posudku instituta rěka.
Aktualnje po wobličenjach instituta třećinu wšěch nadźěłanych tworow Němskeje eksportuja. Při tym wostanje Europa dale najwažniši wikowanski partner Němskeje. Wotwisnosć wot Chiny pak dale přiběra, na přikład na polu kompjuteroweje techniki. Wulku hospodarsku škodu zawostajił je tež přetorhnjeny eksport němskich tworow do Ruskeje po nadpadźe na Ukrainu 2022.
„Strona PiS so prosće njezhubi“
Bywši pólski prezident Aleksander Kwaśniewski nowe knježerstwo warnuje
Waršawa. Wuslědk komunalnych wólbow minjenu njedźelu w Pólskej zjawnosć kraja dale zaběra. Hłowne prašenje při tym je, štó je wothłosowanje dobył a štó přěhrał. Po ličbach wólbneje komisije je něhdy knježaca narodno-konserwatiwna strona Prawo a sprawnosć (PiS) ze swojim předsydu Jarosławom Kaczyńskim na čole wjace hłosow w 16 komunalnych parlamentach zdobyła hač nowe knježerstwo Donalda Tuska. PiS móže na 34,27 procentow pokazać, Tusk ze swojej Wobydlerskej koaliciju (KO) na 30,59 procentow.
Piwo w hosćencach Sakskeje dróše
To a tamne (12.04.24)
Najstarše zwěrjo Berlinskeje coologiskeje zahrody ma narodniny. Gorilowa dama Fatou swjeći jutře swoje 67ćiny. Hižo dźensa chcychu ju z „wulkej zelenej“ překwapjenku zwjeselić, nawodnistwo zwěrjenca zdźěla. Hladajo na starobu wobydlerjo na to dźiwaja, zo njedóstanje Fatou přewjele słódkich płodow. Prawdźepodobnje je Fatou najstarši gorila na swěće. Hoberske zwěrjata docpěwaja w přirodźe starobu 35 lět, w zwěrjencach 50 lět.
18 kilogramow złota namakali su policisća při kontroli awta na awtodróze w Bayerskej. Sobujěduceju nachwilnje zajachu, wumjetujo jimaj „płokanje pjenjez“. Złoto bě do dulow late, njeměješe pak hamtsku ličbu podźěla złota zadypanu. Po aktualnych kursach złota na wikach bě złoto znajmjeńša 400 000 eurow wunjesło. Ciwilnym zastojnikam bě awto napadnyło, na čož je přeslědźichu.
Skorža přećiwo borzdźidle
Berlin (dpa/SN). Zwjazk wobsedźerjow domow a ležownosćow chce přećiwo planowemu podlěšenju systema k wobmjezowanju podruže na Zwjazkowym wustawowym sudnistwje skoržić. Tole připowědźa prezident zwjazka Kai Warnecke. Zwjazkowe wustawowe sudnistwo bě prěnje borzdźidło jenož akceptowało, dokelž bě na pjeć lěta wobmjezowane. Z dalšim podlěšenjom amplowa koalicija wustawu wědomje rani, Warnecke rjekny. Amplowa koalicija chcyła borzdźidło podruže hač do 2029 podlěšić.
Scholz pola ratarskeje komisije
Berlin (dpa/SN). Zwjazkowy kancler Olaf Scholz (SPD) je dźensa z knježerstwowej komisiju za přichod ratarstwa wuradźował. Při tym chcychu po cyłoněmskich protestach ratarjow přećiwo šmórnjenju lěpšinow pola agrarneho diesela wo móžnej podpěrje na dobro ratarjow rěčeć. Zwjazkowe knježerstwo přilubja mjez druhim mjenje běrokratiskeho poćežowanja w dawkowych naležnosćach. Tole chcedźa spěšnje přesadźić.
Konferenca bjez Ruskeje
