Prawicarjo w Francoskej regionalne wólby dobyli

Paris (dpa/SN/K). Wólbny wuspěch historiskeho razu je so w prěnim kole francoskich komunalnych wólbow ekstremnje prawicarskej Front National (FN) zešlachćił. Strona Mariny Le Pen nažnja wčera 28 procentow.

Le Pen ma tuž Front National hižo za „prěnju stronu Francoskeje“. 47lětna politikarka sebjewědomje praji: „Smy k tomu powołani docpěć narodnu jednotu, kotruž kraj trjeba.“ Druhe městno wobsadźa republikanojo eksprezidenta Nikolasa Sarkozyja z něhdźe 27 procentami před socialistami prezidenta Françoisa Hollandea z 22,5 procentami. Ze 44,6 milionami wolerjow wobdźěli so dobrych 50 procentow na wólbach. Po hrózbnych teroristiskich atakach IS w Parisu wotměchu so wone pod sylnym škitom policije a wojerstwa. Po cyłym kraju knježi dale wuwzaćny staw.

Tři wagony sławneje Wuppertalskeje powjaznicy chcychu dźensa rozdarić. W běhu dnja měješe so wozjewić, štó smě 24 metrow dołhe wagony přichodnje wužiwać. Ludźo běchu přizjewili, zo chcyli wozy na kofejownju, rjadownisku rumnosć abo tribunu na sportnišću přetwarić. Wuppertalski měšćanski zawod chce 40 lět staru železnicu, kotraž wšědnje hač do 80 000 ludźi wozy, zešrotować a z nowymi wozami narunać.

Winowu princesnu wobkradnyli su w bayerskim Randersackeru njedaloko Würzburga. Njeznaći běchu so kónc tydźenja w Mnichowje do transportera zadobyli, z kotrymž bě princesna po puću. Nimo pjenjez a wupokazow pokradnychu z njeho tež wudebjenu pozłoćanu krónu, kotruž smě princesna na oficialnych zarjadowanjach nosyć. Winowa princesna Klara Zehnder, hakle wot septembra w zastojnstwje, je „šokowana“.