Wojerecy (SN/bn). Institutny dźeń Serbskeho instituta (SI) je „přiležnosć, zjawnosć wo našich aktualnych slědźenskich projektach a předewzaćach informować. Prěni raz přewjedźemy jón we Wojerecach a zdobom prěni raz tež wirtuelnje“, witaše wčera direktor SI dr. Hauke Bartels přitomnych w Kulturnej fabrice kaž tež za wobrazowkami. Hosćićel zarjadowanja, měšćanosta Měrko Pink, postrowi wobdźělnikow serbsce a wuzběhny, zo chce „aspektam serbskosće a dwurěčnosće we Wojerecach přichodnje wjace kedźbnosće wěnować, hač bě to dotal z wašnjom“.

Budyšin (CRM/SN). Lipšćanski pozawnowy kwartet Opus 4 słuša k elitarnemu kruhej po cyłej Europje požadanych hudźbnych cyłkow. Jemu přisłušeja wot lěta jeho załoženja 1994 zwjetša hudźbnicy, kotřiž hraja w swětosławnym sukelnicowym orchestrje wikoweho a zdobom hudźbneho města Lipska. Minjenu póndźelu koncertowaše ekscelentne ćěleso na iniciatiwu Budyskeho ekume­niskeho tachantskeho wobchoda kaž tež z podpěru tudyšeho Rotaryjoweho kluba w cyrkwi swj. Pětra. Mnohich wopytowarjow je koncert kwarteta dosć rědkeje instrumentalneje zestawy jara zajimował, mjez nimi tež někotrych Serbow. Přetož wulka běše radosć, zo bě so poradźiło wu­branych wuměłcow do Budyšina zwabić. A wočakowanja so w połnej měrje spjelnichu.